მკითხველი, ალბათ დაგვეთანხმება, რომ როდესაც რომელიმე ხელსაწყო გაგვიფუჭდება, მისი სერვის ცენტრში მიტანა ან ხელოსნის გამოძახება, არც ისე იოლ საქმედ გვევლინება. როგორც წესი, რთულია შესაბამისი მომსახურების მოკლე დროში და მოსაწყენი ორგანიზების გარეშე მიღება, თუმცა კომპანიებმა Bosch და Onway, ერთობლივი კოლაბორაციით, იფიქრეს ამ პრობლემებზე და გადაჭრის მშვენიერი გზაც მოუძებნეს.
ახალი პლატფორმა მომხმარებელს საშუალებას აძლევს, უმტკივნეულოდ მიიღოს მისთვის სასურველი მომსახურება. კურიერის საშუალებით გააგზავნოს ხელსაწყო და შემდეგ სახლში დაიბრუნოს, შეკეთებული და განახლებული.
მეტი ინფორმაციისთვის, Marketer ორივე კომპანიის წარმომადგენელს დაუკავშირდა. ჩვენს კითხვებს Onway-ის დირექტორმა, თამუნა გოგოლაშვილმა უპასუხა:
რა იყო მთავარი ამოცანა და როგორ მოიფიქრეთ მისი გადაწყვეტა?
კომპანია “ბოშმა” მიზნად დაისახა, საგარანტიო მომსახურების დაფარვის ზონა მთელი საქართველოს მასშტაბით გაეფართოვებინა. Სწორედ ამ ამოცანით მომართა ონვეის: მას ერთი მხრივ, სურდა საოპერაციო პარტნიორის შერჩევა, რომელიც მიწოდების სერვისს გაუწევდა, ხოლო მეორე მხრივ, ციფრული პლატფორმის შექმნა, რომელზეც მომხმარებელი პირადად დაარეგისტრირებდა საგარანტიო ცენტრში გასაგზავნ გზავნილს. ონვეი მზად იყო ორივე გადაწყვეტა შეეთავაზებინა კომპანიისთვის და დავიწყეთ საერთო პროექტზე მუშაობა – პირველ რიგში შევქმენით ციფრული პლატფორმა და დავაერთეთ ის ჩვენს ახალ ლოგისტიკურ სოფტთან.
რას მოიცავს ეს ახალი პლატფორმა, რა შესაძლებლობები აქვს?
იმ შემთხვევაში, თუ ნივთი დაზიანდა ან რაიმე წუნი აღმოაჩნდა – მომხმარებელი შედის ზემოთ აღნიშნულ საიტზე.
არეგისტრირებს გაგზავნის მისამართს, საიდანაც კურიერი აიღებს შეკვეთას, Შეჰყავს ხელსაწყოს სერიული ნომერი და აფიქსირებს კონკრეტულად რატომ სურს მისი სერვის ცენტრში გაგზავნა. ირჩევს სასურველ სერვის ცენტრს და აფიქსირებს შეკვეთას. შემოსული შეკვეთა პირველ რიგში ონვეის სისტემაში ფიქსირდება, რის შემდეგაც კურიერი მითითებული მისამართიდან იღებს ნივთს და მიგვაქვს ის სერვის ცენტრში შესაკეთებლად. Შეკეთებული ნივთი ისევ გამგზავნს უბრუნდება და ეს ყველაფერი სრულიად უფასოდ ხდება.
რამდენად მარტივია პლატფორმა მომხმარებლისთვის?
ვფიქრობ, ეს თავად მომხმარებელმა უნდა შეაფასოს, თუმცა პირველი შეფასებები ძალიან დადებითია. პორტალი მობილურზე ადაპტირებულიც არის, შესაბამისად მისი გამოყენება ყველა მოწყობილობაზე ძალიან მოქნილია.
როგორ გაუმარტივებს პლატფორმა კომპანიას საქმეს?
თანამედროვე სამყაროში, განსაკუთრებით ელექტრონული პროდუქტების განვითარების პარალელურად, მნიშვნელოვანია კომპანიას აღრიცხვისა და მართვის ციფრული მექანიზმები ჰქონდეს. სწორედ ასეთია ახალი პლატფორმა: ის დაკავშირებულია ბოშის ელექტრონულ პორტალთან, სადაც კომპანია თვალს ადევნებს მომხმარებლების მიერ დარეგისტრირებულ შეკვეთებს, მათ გადაგზავნას სერვის ცენტრებში და შემდგომ რეაგირებებს.
გარდა ამისა, პლატფორმაზე ინტეგრირებულია ბოშის სასაქონლო მარაგების კოდები, თავისი წონებით, რაც, ერთი მხრივ, მომხმარებელს უმარტივებს, მოიძიოს თავისი ნივთი ჩამონათვალიდან, ხოლო ჩვენ გვიმარტივებს წონისა და შესაბამისად ტარიფის გამოანგარიშებას.
გარდა ამისა, მომხმარებელს მისდის შეტყობინება თრექინგ კოდით, შესაბამისად გზავნილის გადაადგილების შემოწმება მას ელექტრონულადაც შეუძლია. მთელი ეს დისტანციური მართვის სისტემა ბოშსა და ონვეის აძლევს შესაძლებლობას, უზრუნველყონ სწრაფი და მოქნილი ლოგისტიკური მომსახურება მომხმარებლებისთვის.
ჩვენ Bosch-საც გავესაუბრეთ, სადაც გვეუბნებიან, რომ ახალი სერვისი, სახელწოდებით service online ნებისმიერ ელექტრო სამშენებლო ხელსაწყოზეა გათვლილი და საგარანტიო ვადის ამოწურვამდე მისით სარგებლობა მომხმარებლებისთვის უსასყიდლოა. ასევე, კომპანია მიიჩნევს, რომ მისი მომხმარებელი ბევრად უფრო სწრაფად მოაგვარებს მსგავსი ტიპის პრობლემებს, ვიდრე ამის შესაძლებლობა აქამდე ჰქონდა.
რითია მნიშვნელოვანი ბოშისთვის ამ პროდუქტის შექმნა?
კომპანია “ბოშის” უმთავრესი ამოცანაა მომხმარებლის მუდმივი კომფორტის ზონაში ყოფნა.
ნებისმიერი სარგებელი უნდა იყოს ორმხრივად ხელმისაწვდომი და ბოშის მხრიდან კიდევ ერთი შეთავაზება ვფიქრობთ, მომხმარებლისთვის რეალურად ხელშესახები იქნება, რომელიც მისცემს მას შესაძლებლობას, დაზოგოს დრო და საკუთარი ფინანსები.
დღევანდელი ტენდენციები იძლევა იმის საშუალებას, რომ ციფრული ტექნოლოგიების დახმარებით, ყველა სერვისი თუ კომუნიკაცია უსწრაფესად მიწოდებულ იქნას მომხმარებლისთვის. ბოშის ინოვაციური შეთავაზება Service Online-იც სწორედ ამას ემსახურება.
რამდენი ხანია, რაც ბრენდი არსებობს ქართულ ბაზარზე და როგორ ზრუნავს მომხმარებელთა კმაყოფილებაზე?
გერმანული კომპანია რობერტ ბოშის წარმომადგენლობა ამიერკავკასიის რეგიონში უკვე 10 წელზე მეტია, ოპერირებს ელექტრო-სამშენებლო ინსტრუმენტების მიმართულებით და ემსახურება საქართველოს, აზერბაიჯანისა და სომხეთის ბაზრებს.
მომხმარებელს მუდმივად ვთავაზობთ აბსოლუტურად ევროპული სტანდარტებით განსაზღვრულ პროდუქციას და ვაწვდით უმაღლესი ხარისხის სასერვისო მომსახურებას. ეს გამოხატულია როგორც რეგიონალურ დონეზე სადისტრიბუციო ქსელის არსებობითა და პროდუქციის ხელმისაწვდომობით, ასევე ხარისხთან შესაბამისობაში არსებული ფასებითა და საგარანტიო პირობებით, – თამთა ქართველიშვილი, Bosch.
[R]
