2010 წელი იქნებოდა, კავკასიის უნივერსიტეტში სტუმრად USA2GEORGIA.COM-ის ერთ-ერთი დამფუძნებელი გვეწვია. მაშინ MediClubGeorgia-ში ვმუშაობდი და ჩემთვის, ისევე, როგორც საქართველოს მოსახლეობის უმეტესობითვის, ამერიკიდან რაღაცების გამოწერა ძალიან ახალი ხილი იყო, თუმცა ჩემი IT მეგობრების მეოხებით, ნელნელა ვუშინაურდებოდი ამ მომსახურებას. ერთი რამე გვაწუხებდა, 1-ზე მეტ ამანათს თუ გამოიწერდი, ვერასდროს მიხვდებოდი ადგილზე, ამერიკის საწყობში რომელი მათგანი იყო მისული, ფაქტიურად ბრმად გამოგქონდა გზავნილი, მხოლოდ ე.წ. Tracking Code-ს ხედავდი.
სტუმრით და ბრენდის შექმნის ამბით აღტაცებულმა, დრო ვიხელთე და ჩვენი იდეა დამფუძნებელს გავუზიარე – რა მაგარი იქნებოდა, კომენტარის დამატება რომ შეგეძლოსთქო. იცით, რა მოხდა? 2 კვირაში ვებგვერდს კომენტარის დამატების ფუნქცია დაემატა. აღფრთოვანებული ვიყავი დღემდე, მართლა ათასჯერ მაქვს ეს ისტორია სტუდენტებისთვისაც მოყოლილი – იმის მაგალითად, თუ როგორ უნდა შეძლოს თანამედროვე ბრენდმა, ბრენდის მართვის ერთ-ერთი უმთავრესი პრინციპი – „მომხმარებლის ჩართულობა“ აღასრულოს, შეასრულოს.
იმის მერე ბევრმა წყალმა და ტრენდმა ჩაიარა და როგორც ქართველებს გვჩვევია ხოლმე, ბევრ ტრენდს ავყევით და ბევრიც მივივიწყეთ, გააზრების, გონებაში და კრიტიკაში გატარების გარეშე, რა თქმა უნდა.
ასე იყო, „MBA სიტყვებით“, საუბრის ტრენდი – ყველა ბრენდი რომ გაპრიალებული, ფოე-ფოე, ვითომ ინტელექტუალური სიტყვებით გელაპარაკებოდა. ეს ტრენდი რეალურ ცხოვრებაში ჯერ კიდევ ცოცხლობს, მაგრამ აი, სოციალურ მედიაში სრულიად გაქრა – ახლა მოდაში მომხმარებელთან ადამიანური, ჩვეულებრივი, ხუმრობანარევი საუბარია.
ერთი შეხედვით, ხომ კარგია? მაგრამ ძაღლის თავიც ზუსტად მანდ იმალება.
საყოველთაო, ბრენდის რაობის და სტრატეგიის გააზრების გარეშე ღლიცინი, შეიძლება პატარა ბომბი იყოს, რომელიც ერთ დღეს ასე აფეთქდება. მომხმარებელი უკმაყოფილებას გამოთქვამს, თქვენ „წაეღადავებით“, ის ისევ უკმაყოფილოა და თქვენც ბოლომდე „აწვებით თქვენსას“ – ბარემ შეურაცხყოფასაც აყენებთ. ასე, განსაკუთრებით მაშინ ხდება, როცა ჩვენი სურვილი, საუბრის ტონის ფურცელზე დაწერილი სტრატეგის – „იუმორნარევის“ აღსრულებაზე არ ვფიქრობთ და ვერ ვიაზრებთ, ამ სტრატეგიას შესაბამის დონეზე რომ უნდა აღსრულება.
რა თქმა უნდა, ადამიანურობაში ცუდი არაფერია, მართლა საუკეთესო რამაა, რაც ბრენდებს ახლა სჭირდებათ, მაგრამ, ალბათ დამეთანხმებით, არც ადამიანებს, თუნდაც საუკეთესო მეგობრებს შორის მოსულა პრობლემაზე საუბრისას ღლიცინი, უნიჭოდ ხუმრობა.
ასე რომ, ჩემო საყვარლებო,
- გაითვალისწინეთ, სოციალური მედია თქვენი ბრენდის ერთ-ერთი ფუნქცია კი არა, მისი სახეა, მისი საუკეთესო გამოხატულება იმ სამყაროში, სადაც თქვენი მომხმარებლის უდიდესი ნაწილი, უდიდეს დროს ატარებს.
- გთხოვთ, დაფიქრდით, ვინაა თქვენი ბრენდი, შეეფერება თუ არა მომხმარებელთან იუმორით საუბარი მის პიროვნებას და რაც მთავარია, თუ შეეფერება – რა დოზით და რა სიტუაციებში.
- მოუსმინეთ მომხმარებელს, ჩართეთ ის საკუთარი პროდუქტის გაუმჯობესებაში. თუ ამას ვერ ახერებთ, ის მომხმარებელი მაინც დააფასეთ ვინც თავად იჩენს გაუმჯობესებაში მონაწილეობის ინიციატივას. კვლევებმა აჩვენა, რომ მომხმარებელთა მხოლოდ 5% გიზიარებთ უკმაყოფილებას პირდაპირ, დაუზარებლად. პატივი ეცით ამ 5%-ს, ყველაზე ღირებული ხალხია თქვენს გარშემო
- განსაზღვრეთ შემთხვევები, როცა იუმორი „მოსულა“ და შემთხვევები, როცა მომხმარებელს მართლა დახმარება სჭირდება
- გახსოვდეთ, ყველა ბრენდი, ისევე როგორც თითოეული ადამიანი უნიკალურია და მზა, ერთი შეხედვით საინტერესო რეცეპტებით მისი მართვა უმეტეს შემთხვევაში დიდი შეცდომაა.
