ყველა ბრენდს, ისევე როგორც ყველა ადამიანს, თავისი ინდივიდუალიზმი აქვს და მიჰყვება გზას, რომელიც მას აქვს დასახული. ამას ბრენდინგში სტრატეგიას ეძახიან და ზოგს ის თავიდანვე აქვს განსაზღვრული, ზოგი კი მას გზადაგზა პოულობს. ეს უკანასკნელი, მარკეტერების მხრიდან, მაინცდამაინც რეკომენდებული არ არის და ისინი ურჩევენ კომპანიებს, რომ თავიდანვე სწორად შეარჩიონ და დაისახონ არა მხოლოდ კონკრეტული მიმართულების, არამედ მთლიანად ბრენდის ზოგადი სტრატეგია.
დღევანდელი ამბავი ფასეული უძრავი ქონების განვითარების კომპანიის, „სიმეტრია”, ახალ სტრატეგიაზე, მის ფილოსოფიასა და ვიზუალურ იდენტობაზეა. „სიმეტრია” 2011 წლიდან მოღვაწეობს უძრავი ქონების განვითარების სფეროში. დაარსების დღიდან მის პორტფოლიოში მრავალი მნიშვნელოვანი პროექტი მოგროვდა. მაგალითად: Best Western – პირველი ბრენდული სასტუმრო ქუთაისში; Holiday Inn Express – თბილისში; სავაჭრო ცენტრი „გლდანი მოლი“; საცხოვრებელი კომპლექსები – „სიმეტრია ვაკე” და „სიმეტრია ლისი“. ამ ეტაპზე დასრულების პროცესშია პრემიუმ კლასის საცხოვრებელი უბანი „სიმეტრია პარკი“ მთაწმინდის რაიონში, რომელიც სრულიად ახალ, განსხვავებულ გამოცდილებას გვთავაზობს.
რა თქმა უნდა, კომპანია მხოლოდ განხორციელებულ პროექტებს არ სჯერდება და მიმდინარე საქმეებითაცაა დატვირთული. ესენია: ორი საცხოვრებელი კომპლექსი თბილისში და სასტუმროები სამთო კურორტებზე. ამასთან, როგორც „სიმეტრიაში” გვეუბნებიან, შეთანხმების პროცესშია მათთვის ერთ-ერთი ყველაზე მნიშვნელოვანი და საქვეყნო მასშტაბის პროექტი რაჭაში, რომელიც კურორტ შოვის რეაბილიტაციასა და განვითარებას გულისხმობს.
წარმატებულ და დატვირთულ წელს „სიმეტრია” ბევრი სიახლით ემშვიდობება და ახალ, 2023 წელს განახლებული სტრატეგიითა და ვიზუალური ბრენდბუქით ხვდება. ისეთ სააგენტოებთან თანამშრომლობით, როგორებიცაა: LIVE და „კრაკენი”, შეიქმნა ბრენდის სტრატეგიის სრული დოკუმენტი, განისაზღვრა: ბრენდის ღირებულებები, საქმიანობის პრინციპები, სამიზნე აუდიტორიები, სტრატეგიული და საკომუნიკაციო ატრიბუტიკები, ბრენდის არქიტექტურა. შეიქმნა ბრენდის პლატფორმა და ეს ყველაფერი ვიზუალური ბრენდბუქით დაგვირგვინდა.
გადავხედოთ ჩვენი რესპონდენტების მონათხრობს და გავიგოთ, რატომ, რა და როგორ შეიცვალა „სიმეტრიას” ბრენდინგში.
ირაკლი მკერვალიშვილი, „სიმეტრიას” მარკეტინგის ხელმძღვანელი:
დაარსების დღიდან დღემდე „სიმეტრიაში” დიდი და საინტერესო გამოცდილება დაგვიგროვდა. გაიზარდა როგორც კომპანიის პორტფოლიო, ასევე გუნდიც. „სიმეტრიაში“ გვჯერა, რომ ის ფასეულობები, რაც გაგვაჩნია, კარგად უნდა იყოს გააზრებული თითოეული თანამშრომლის მიერ. სწორედ ამ ღირებულებებზე დაფუძნებით უნდა ხდებოდეს გადაწყვეტილების მიღება ნებისმიერ რგოლში. შესაბამისად, კომპანიის სტრატეგიის გადახედვა, გაანალიზება, დღევანდელი პოზიციონირების განსაზღვრა და სრულყოფილი ბრენდის სტრატეგიის შექმნა იყო ის ლოგიკური ნაბიჯი, რაც ბოლო წლების განვითარებას უნდა მოჰყოლოდა.
M: რა პროდუქტს ქმნის სიმეტრია და როგორია მისი, როგორც ბრენდის ფილოსოფია?
ერთი წინადადებით რომ ვთქვათ, სიმეტრია არის ფასეული უძრავი ქონების განვითარების კომპანია, რომლის მისიაც ფასეული უძრავი ქონების განვითარების კულტურის შექმნაა. ჩვენი მიზანია, გავხდეთ საიმედო პარტნიორი უძრავი ქონებით დაინტერესებული ადამიანებისთვის, რათა ამ ადამიანებთან ერთად შევქმნათ ისეთი აქტივები, საიდანაც ყველა სიმეტრიულ სარგებელს მიიღებს.
„სიმეტრიას” საზრუნავია, რომ თანამშრომლებმა – იამაყონ განხორციელებული პროექტებით; ინვესტორებმა – იცოდნენ, რომ სიმეტრიას განვითარებულ პროექტებში დაბანდებით ყოველთვის მოიგებენ; მყიდველებმა იგრძნონ, რომ ჩვენი პროექტები არის ადგილი უკეთესი ცხოვრებისა და ინვესტიციისთვის, სადაც ადამიანზე ბევრია ნაფიქრი.
გვჯერა, რომ სიმეტრიული სარგებელი, როგორც პარტნიორობის ფილოსოფია, არის ის, რაც იწვევს ჩვენდამი ნდობას და უზრუნველყოფს პროექტების წარმატებას.
M: ვინ არის ბრენდის ძირითადი აუდიტორია ?
„სიმეტრიასთვის” პროექტში ჩართული ყველა მხარე მნიშვნელოვანია – იქნება ეს ინვესტორი, აქტივის მფლობელი, მყიდველი, თანამშრომელი, შემსრულებელი, ფინანსური ინსტიტუტები თუ საზოგადოება. თუმცა ორ ძირითად აუდიტორიას გამოვყოფდი: ინვესტორი და მყიდველი.
ინვესტორებში მოიაზრება ის აუდიტორია, რომელსაც მობილიზებული აქვს გარკვეული ფინანსური რესურსები და სურს ფულის დაბანდება, თუმცა მაღალრისკიანი ინვესტიციებისგან თავს იკავებს. ამ აუდიტორიას ურჩევნია დაბალრისკიანი და გრძელვადიანი ინვესტიციები, გარანტირებული, წყნარი IRR-ით. ჩვენი მიზანია, მათ შევთავაზოთ ფასეული უძრავი ქონების განვითარების პროექტებში ინვესტირების დაბალრისკიანი შესაძლებლობა. ამ ყველაფერში სიმეტრია პოზიციონირდება, როგორც საიმედო და კომპეტენტური აღმასრულებელი პარტნიორი ყველა ეტაპზე, იქნება ეს: პროექტის დაგეგმვა, განხორციელება თუ გაყიდვები. იგივე შეიძლება ითქვას იმ კაპიტალის მფლობელებზე, რომლებსაც გააჩნიათ კონკრეტული „მიძინებული“ აქტივი მიწის ან სხვა სახით, თუმცა მისი განვითარებისა და მენეჯმენტის რესურსი არ აქვთ.
მყიდველები – ნებისმიერ მყიდველს უნდა ჰქონდეს განცდა, რომ სიმეტრიასთან ურთიერთობით მან ჭკვიანური არჩევანი გააკეთა და არ წააგო; რომ სიმეტრიაში შეძენილი ბინა, სახლი, ოფისი თუ სავაჭრო ფართი არის მომგებიანი ინვესტიცია და არა უბრალოდ ხარჯი. სწორედ ამიტომაც ვავითარებთ მხოლოდ კარგად ნაფიქრ, გამართულ უძრავი ქონების პროექტებს, რომლებიც ადამიანების კარგი, ხარისხიანი ცხოვრების, მუშაობისა და დასვენებისთვის არის შექმნილი.
ბრენდის სტრატეგიასა და კონკრეტულად, „სიმეტრიაზე” მუშაობის შესახებ სააგენტო LIVE-ის დამფუძნებელი, ალექს ჩიქოვანი გვესაუბრა:
სტრატეგია არ არის ჩაბეტონებული დოკუმენტი. მსოფლიოში და შესაბამისად, საქართველოში, გარემოებები იმდენად სწრაფად იცვლება, რომ შეუძლებელია დღეს შექმნილი დოკუმენტით ხვალაც ერთი-ერთში იმუშაო. ამიტომ სტრატეგია დროდადრო გადასახედია (მაგრამ დასაკორექტირებლად და არა თავიდან ბოლომდე შესაცვლელად, რადგან სწორად შექმნილ სტრატეგიას შეცვლა არ სჭირდება). ამ გადახედვის მიზანი არის ძალიან კონკრეტული – არ დამყაყდე, როგორც ბრენდი/კომპანია და არ ასცდე რეალობას. გადახედვისას აფასებ, რომელიმე ელემენტი ხომ არ არის დასახვეწი და/ან ახალი ხომ არ არის შესაქმნელი? რამე ხომ არ მოძველდა? მაგრამ აქ ძალიან ფრთხილად უნდა ვიყოთ, რადგან სტრატეგიას აქვს ორი ძირითადი ნაწილი. პირველი, ბრენდის გენეტიკური კოდი – ასე ვთქვათ, ფილოსოფიურ-მორალური ნაწილი, ვინ ხარ შენ, როგორც ბრენდი, რა არის შენი ფასეულობები, რწმენა და მეორე, როგორი გზით დადიხარ (საოპერაციო-აღსრულების ნაწილი), რომ შენი ვინაობიდან გამომდინარე, ადამიანების პრობლემაც გადაწყვიტო და შენც მოიგო. თუ პირველი ნაწილის ცვლილება დაგჭირდა, ესე იგი, თავიდანვე არ იყო რაღაც სწორად გაკეთებული, რადგან ბრენდი, ჩემი რწმენით ადამიანია და როგორც ადამიანის გენეტიკური კოდის შეცვლა „ვერ შეიძლება”, ისე ვერ უნდა იცვლებოდეს ბრენდის გენეტიკური კოდიც. აი, მეორე ნაწილი კი არის გზა – აღსრულების ნაწილი – ამ გზაზე, რა თქმა უნდა, დროდადრო ცვლილებები იქნება შესატანი (პროდუქტის/მომსახურების ტიპი, ფორმა, მიწოდება, კომუნიკაციის ფორმები და მეთოდები და სხვა), მაგრამ ისე, რომ ბრენდმა არ დაკარგოს მისი სახე და ხასიათი.
M: როგორი იყო ბრენდის წინანდელი სტრატეგია და თქვენი მხრიდან სრულად ახალი სტრატეგია შემუშავდა თუ დაყრდნობილი იყო არსებულზე?
საქართველოში ძალიან ბევრია კომპანია, რომელსაც დოკუმენტური სახით სტრატეგია არ გააჩნია. ასეთი კომპანიები ან დამფუძნებლების (და ხელმძღვანელი გუნდის) შინაგანი მრწამსიდან, საქმიანი ფილოსოფიიდან გამომდინარე იწყებენ მუშაობას და თანმიმდევრულად მიჰყვებიან ამას ან უბრალოდ იწყებენ „ისე, როგორც ყველა აკეთებს” და შემდეგ დგებიან სტრატეგიის შექმნის აუცილებლობის წინაშე, რადგან აცნობიერებენ, რომ „ისე, როგორც ყველა აკეთებს” სასურველ შედეგს არ იძლევა. „სიმეტრია” პირველ კატეგორიას მიეკუთვნება, კომპანიაში ძალიან მკაფიო ფილოსოფია და ფასეულობათა სისტემა დაგვხვდა. ეს ყველაფერი დამუშავდა, მკაფიო ფორმულირებები მიეცა და ბაზარზე არსებული პრობლემის „სიმეტრიასეული” გადაწყვეტის არჩევანი გაკეთდა.
M: რა გაითვალისწინეთ სტრატეგიის შექმნისას? რა მარკეტინგულ კომპონენტებს მოიცავს ეს სტრატეგია?
სტრატეგია, ჩემი აზრით, არის – რა გზით იარო, რომ ადამიანებს გადაუწყვიტო პრობლემა და შენც გაიმარჯვო. შესაბამისად, ჩვენ სტრატეგიის შექმნისას უპირველეს ყოვლისა ვითვალისწინებთ იმ საკითხებს, რაც ამ გზას და მასზე სიარულის საკითხებს ითვალისწინებს:
- რა პრობლემა აქვთ ადამიანებს, რა უნდათ მათ? როგორ უნდა გადაჭრა ეს პრობლემა?
- რა გჭირდება იმისთვის რომ ეს პრობლემა ისე გადაჭრა, როგორც ჩაიფიქრე?
- მოიტანს თუ არა ეს სტრატეგია იმ ფინანსურ და რეპუტაციულ შედეგს, რისი მიღებაც გვინდა?
- როგორი საქმიანი ფილოსოფია აქვს კომპანიის გუნდს? სტრატეგიაში ბრენდის აღმასრულებლების მსოფლმხედველობა უნდა აისახებოდეს, შესაბამისად სტრატეგიის აღსრულება მათი ბუნებრივი ქცევა უნდა იყოს.
- რა უნდა თქვა და გააკეთო ისე, რომ იყო განსხვავებული და გამორჩეული სხვებისგან? როგორი კომუნიკაცია უნდა გვქონდეს ადამიანებთან, რომ გავაგებინოთ ბრენდის ვინაობა და მისი უპირატესობები. აქვე ხაზგასმით ვიტყვი, რომ კომუნიკაციაში არ იგულისხმება მხოლოდ სარეკლამო კომუნიკაცია, კომუნიკაციაში იგულისხმება ყველაფერი, რასაც ბრენდი აკეთებს, დაწყებული პროდუქტიდან და მომსახურებიდან, დამთავრებული მისი მიწოდების, ხელმისაწვდომობის, საფასო პოლიტიკის და, რა თქმა უნდა, მარკეტინგულ-სარეკლამო საკითხებიდან.
ბოლო ეტაპი კი „სიმეტრიას” ბრენდის ვიზუალური განახლება იყო. ბრენდის სტრატეგიის მიხედვით შედგენილი დიზაინის ბრიფი საკომუნიკაციო სააგენტო „კრაკენს” გადაეცა აღსასრულებლად.
სააგენტო „კრაკენის” – კრეატიული დირექტორი, ციცი ბოდოკია და არტ დირექტორი, თინა მაყაშვილი:
ხშირად საქართველოში კომპანიის დამფუძნებლები ბრენდის შენებას სტრატეგიის დოკუმენტის გარეშე, პირდაპირ ლოგოთი და ვიზუალური იდენტობით იწყებენ. სიმეტრიას შემთხვევაში ასე არ მოხდა, ამიტომ ჩვენთვის ამ პროექტზე მუშაობა ორმაგად საინტერესო აღმოჩნდა. ჩვენ მივიღეთ ბრიფი, რომელმაც სწორი მიმართულება მოგვცა და ფიქრის პროცესი გაგვიმარტივა.
ჩვენი ამოცანა იყო, ვიზუალურადაც გამოგვესახა ის ცვლილებები, რომელიც ბრენდმა განიცადა და პოზიციონირდა არა როგორც სტანდარტული დეველოპერული კომპანია, არამედ როგორც საინვესტიციო, პროექტების მენეჯმენტისა და დეველოპერული კომპანიის ერთობლიობა. ვიზუალური მხარე უნდა ყოფილიყო თამამი, გამორჩეული და ამავდროულად დახვეწილი.
M: რა კომპონენტებს მოიცავს ბრენდბუქი და რას გამოხატავს თითოეული მათგანი?
„სიმეტრიას” ლოგოსთვის შეიქმნა უნიკალური ტიპოგრაფია, რომლის სახასიათო ელემენტს წარმოადგენს სიმეტრიულად წაჭრილი ხაზები. ეს ელემენტი, გრაფიკული სტილის გაშლაში გვაძლევს საშუალებას, შევქმნათ პერსპექტივის ილუზია და სხვა მყარი გეომეტრიული ფორმები, როგორც მყარი საინვესტიციო პარტნიორობის სიმბოლო.
სიმეტრიას კონკურენტებისგან გამოარჩევს მკვეთრი და კონტრასტული ფერების კომბინაცია. ძირითად ფერად ავირჩიეთ იისფერი, ხოლო აქცენტებისთვის ნარინჯისფერი. დამხმარე ფერად ფონებისთვის შავი და მისი ტონები, რომელიც ფერებს სიმკვეთრეს და ბრენდს – დახვეწილობას მატებს.
ბრენდის გრაფიკულ სტილს ლაითმოტივად გასდევს მშენებლობასთან დაკავშირებული თემები: გეომეტრია, სიმეტრია, პერსპექტივა.
M: როგორი იყო სამუშაო პროცესი: რამდენი დრო დასჭირდა ახალი ვიზუალური იდენტობის შექმნას, რა სირთულეები იყო და ა.შ.?
მუშაობის პროცესში შევიმუშავეთ რამდენიმე ვიზუალური კონცეფცია, რომელიც ზუსტად უპასუხებდა ბრენდის სტრატეგიას. ყველაზე დიდი სირთულე არჩევანის გაკეთება იყო, თუმცა ყველა ბრენდზე მუშაობის დროს დგება მომენტი, როცა შინაგანი ხმა გკარნახობს, თუ რომელი ვერსია გამოხატავს ყველაზე მეტად ბრენდის სტრატეგიას. ძალიან სასიამოვნოა, როცა დამკვეთის, სტრატეგიის ხელმძღვანელისა და ჩვენი, როგორც შემსრულებლის ხედვები ერთმანეთს ემთხვევა, შესაბამისად, ერთხმად მივედით საბოლოო შედეგამდე.
