in

როგორ შეიქმნა „სმარტის“ განახლებული კონცეფცია და ბრენდინგი

„კეთილ მგზავრობას“ ისე არაფერი უხდება, როგორც გემრიელი შესვენება. Wissol-ის მასშტაბური განახლების შემდეგ, „სმარტის“ რებრენდინგის შესახებ გიყვებით, რაზეც მარკეტინგის გუნდთან ერთად, სააგენტო +VAT-მა, More Studio-მ და ინტერიერის დიზაინერმა დოდოშკა ჩხეიძემ იმუშავეს. პროექტი განსაკუთრებით საინტერესო იმითაც იყო, რომ ორი დიდი ბრენდის განახლება პარალელურად მიმდინარეობდა. შემოქმედებითი ჯგუფის მნიშვნელოვანი საზრუნავი იყო ისიც, რომ ერთმანეთისგან დამოუკიდებელი ორი ბრენდი გარდაესახათ და ერთ სივრცეში გაეერთიანებინათ. მოდით, ერთად გავიცნოთ, როგორი იყო განახლებულ ბრენდზე მუშაობის პროცესი.

BOG
BOG

M: როგორ მიხვედით რებრენდინგის გადაწყვეტილებამდე?

სალომე გველესიანი, Wissol: დიდი ხნის განმავლობაში, „სმარტი“ იყო ოჯახური  სუპერმარკეტების ქსელი. შემდეგ, ფორმატი შეიცვალა და „სმარტი“ გამოჩნდა გზებზე, მოგზაურებისათვის კომფორტის შესაქმნელად, სასიამოვნო შესვენებებისთვის, ისეთ ადგილებში, სადაც მაღაზიას არ ელოდები – მაგისტრალებზე. ფორმატის ცვლილებამ განაპირობა ასორტიმენტის განახლება. ბუნებრივია, ეს ყველაფერი ბრენდშიც უნდა ასახულიყო.

ვიფიქრეთ იმაზეც, ხომ არ სჯობდა „სმარტის“ Wissol-ის სთორად ინტეგრირება, თუმცა დავინახეთ, რამდენად დამოუკიდებელია ეს ბრენდი და მისი განვითარების ცალკე გეზი ავიღეთ.

„კეთილი მგზავრობა“ – სწორედ ამ დაპირების გარშემო გაერთიანდა ორივე ბრენდი.

M: როგორია ახლა „სმარტი“, როგორც ბრენდი?

განახლებული „სმარტი“ ორიენტირებულია ისეთ პროდუქტებზე, რაც გზაზე გვესაჭიროება ხოლმე ხშირად – ყავა, წყალი, საკვები, გემრიელი ხემსი, საავტომობილო აქსესუარები, სიმ-ბარათის შეძენაც კი შეგიძლიათ. წარმოების ნაწილში ჩაერთო ლუკა ნაჭყებია, რომელმაც მენიუ განაახლა, ასე რომ, ყავასთან მისაყოლებლად გემრიელი წასახემსებელი გელით. ძალიან დიდი ყურადღება მივაქციეთ ასორტიმენტის მრავალფეროვნებას, რათა მომხმარებლისთვის ექსკლუზიური და საინტერესო პროდუქტების შეთავაზება შეგვძლებოდა.

M: „სმარტის“ ბრენდი Wissol-ის პარალელურად განახლდა. როგორი იყო ორ ბრენდზე ერთდროულად მუშაობა, რის შედეგადაც ისინი ერთიმეორეს თანხვედრაში უნდა მოგეყვანათ?

ორი ხელით მუშაობას ჰგავდა. ერთი მხრივ, უნდა გვემუშავა Wissol-ისა და „სმარტის“ ერთმანეთთან ინტეგრირებაზე, რომ ერთიანი აღქმა ჰქონოდა მომხმარებლისთვის. მეორე მხრივ, კი, დამოუკიდებლობა და ინდივიდუალიზმი შეგვენარჩუნებინა ორივესთვის და ცალცალკე განვითარების საშუალება მიგვეცა.

M: როგორ მივედით ბრენდის არსებულ კონცეფციამდე და როგორ შეიქმნა განახლებული ვიზუალური იდენტობა?

ვასკა ჩუბინიძე, +VAT: ახალი ბრენდი უნდა ყოფილიყო გზაზე მიმავალი ადამიანებისთვის განკუთვნილი, სადაც შეიძენდნენ ყველაფერს, რაც ასეთ დროს ყველაზე ხშირად სჭირდებათ ხოლმე ადამიანებს. ფაქტობრივად, „სმარტი“ იქცა მაღაზიად და კაფედ ერთდოულად, რაც ახალი ბრენდის ამოსავალ წერტილად დავინახეთ – Market & Cafe – სწორედ ამ წარწერას ნახავთ „სმარტის“ შესასვლელში.

განახლებული პოზიციონირებიდან გამომდინარე, More Studio-სთან ერთად შევიმუშავეთ ვიზუალურ ნაწილზე. გადავწყვიტეთ დაგვეტოვებინა მთავარი სიმბოლო – ციყვი, თუმცა მას ბრენდის დატვირთვიდან გამომდინარე, შევუცვალეთ ხასიათი. მეოჯახე, შემგროვებელი ციყვი ჩაანაცვლა თავგადასავლების მოყვარულმა ენერგიულმა ციყვმა.

ვიზუალურ სტილთან ერთად, Mua-სთან ერთად ვიმუშავეთ ექსტერიერის დიზაინის განახლებაზე. შედეგად, ერთიან ინფრასტრუქტურულ სტილში მოექცა ყველა ფილიალი. შეიცვალა ინტერიერი, რაზეც დოდოშკა ჩხეიძემ იმუშავა და ვიზუალურ იდენტობას შესანიშნავად მოარგო.

M: Wissol-ისა და „სმარტის“ განახლება პარალელურად მიმდინარეობდა. როგორი იყო ეს პროცესი?

განახლების პროცესი ერთდროულად ხდებოდა. ვატარებდით უამრავ ინტერვიუსა და ვორქშოპს, რათა ბრენდი მომხმარებლის ხედვასა და საჭიროებაზე ყოფილიყო მორგებული. თანამშრომლობა იმდენად პროდუქტიული აღმოჩნდა, რომ რებრენდინგის დასრულების შემდეგ, მე და გიორგი ტაბატაძე სტრატეგიული კონსულტანტების როლში ვთანამშრომლობთ ჯგუფთან და მარკეტინგისა და სხვა დეპარტამენტებთან ერთად, რებრენდინგის ეფექტიანობაზე ვმუშაობთ.

წელს, იგეგმება დიდი განახლება, შესაბამისად, ახალი დიზაინის „სმარტი“ სულ უფრო მეტ ადგილას გამოჩნდება და ბევრად დიდი აქტიურობაც გელით ბრენდისგან.

M: როგორი იყო ჩანაფიქრი, განახლებული „სმარტის“ ინტერიერთან დაკავშირებით?

დოდოშკა ჩხეიძე, DodoDesigns: ინტერიერზე ფიქრისას, პირველ რიგში, „სმარტის“ განახლებული ვიზუალური ბრენდბუქი გავითვალისწინეთ. ამის გარდა, სურვილი გვქონდა სხვა მარკეტებისგან განსხვავებული და დასამახსოვრებელი დიზაინი ჰქონოდა. პროდუქციის მრავალფეროვნების გამო, ავეჯზე, ძირითადად, ერთი მასალა გამოვიყენეთ, თუმცა კატეგორიების გამოსარჩევად, განვასხვავეთ ფერებით, რაც მომხმარებელს უმარტივებს ორიენტაციას პროდუქტის დათვალიერებისას. ვფიქრობთ, ავეჯის ფორმები და ფაქტურა კარგად გადმოსცემს ბრენდის ხასიათსა და მარკეტის კონცეფციას.

M: როგორ მოარგე ინტერიერის დიზაინი ვიზუალურ ბრენდინგს?

ვიზუალური ბრენდინგი საკმაოდ ფერადია, რაც ჩვენთვის საინტერესო სამუშაოს ნიშნავს. შესაბამისად, არ შევუშინდით ბრენდინგის ყველა ფერის გამოყენებას ინტერიერის ყველა ელემენტში. იატაკი გავაკეთეთ მკვეთრი ვარდისფერი, რაც საკმაოდ თამამი გადაწყვეტილების მიღებას მოითხოვდა. საბოლოო შედეგს რამდენიმე სიტყვით დავახასიათებდი – ფერადი, მოწესრიგებული, მარტივი და განსხვავებული.


ავტორი: თამარ მეფარიშვილი

ბენ აფლეკს პოპვარსკვლავობა უნდა — Dunkin-ის სახალისო კამპანია

მთვარის მისია ვალენტინობის დღეს გაეშვება