Snap-მა ტექნოლოგიურ კონფერენციაზე სრულიად ახალი მოწყობილობა – Specs-ის სათვალე წარადგინა. კომპანიის თანადამფუძნებელი ევან შპიგელი მიიჩნევს, რომ ბრენდი საკუთარ მთავარ მისიას ამ პროდუქტის გარეშე უბრალოდ ვერ შეასრულებს. სათვალის წინასწარი შეკვეთებიც უკვე დაწყებულია. პროდუქტი ბაზარზე მიმდინარე შემოდგომაზე გამოვა და მისი ფასი 2,195 დოლარი იქნება.
პროექტზე მუშაობა ჯერ კიდევ ათი წლის წინ დაიწყო, მოგვიანებით კი პროცესი სხვა სპეციალიზებული სტარტაპების შესყიდვით გაგრძელდა. შპიგელის ინტერესი ამ ტექნოლოგიის მიმართ სტუდენტობის პერიოდიდან მოდის, როდესაც მან პირველი გიგანტური პროტოტიპები იხილა და მიხვდა, რომ ციფრული სამყაროს ტრადიციული ეკრანებიდან რეალურ გარემოში გადმოტანა ბევრად უფრო ბუნებრივი და პერსპექტიული იდეა იყო.
ეს ამბიცია კომპანიამ შიდა კრიზისების, აქციების ფასის ვარდნისა და თანამშრომელთა გეგმური შემცირების ფონზეც შეინარჩუნა. Snap-მა ბევრი არაპროფილური მიმართულება დახურა, თუმცა სათვალეების იდეაზე უარი არ უთქვამს. სტრატეგიული ფოკუსისა და დამატებითი ინვესტიციების მოსაზიდად, მიმართულება ცალკე შვილობილ კომპანიად ჩამოყალიბდა, თუმცა კავშირი ძირითად აპლიკაციასთან კვლავ მყარია.
დღეს, Snapchat-ის პლატფორმაზე მილიონობით ეფექტია შექმნილი, რომლებსაც მომხმარებლები ყოველდღიურად უამრავჯერ იყენებენ. მობილური აპლიკაციისგან განსხვავებით, ახალი სათვალე გაცილებით დიდ სივრცეს აჩენს კრეატივისთვის. მისი დახმარებით შესაძლებელია სივრცეში მცურავი ბრაუზერის გააქტიურება, ვიდეოების სტრიმინგი, ინტერაქციული რუკების გამოყენება, მანქანის შეკეთების ვიზუალური გაიდების თუ კულინარიული რეცეპტების გაშვება.
ტექნიკური ევოლუცია და ფასი
წინა ექსპერიმენტულ ვერსიებთან შედარებით, ახალი მოდელი 40%-ით მსუბუქია, აქვს ხუთჯერ უფრო მძლავრი ელემენტი და გაფართოებული ხედვის არეალი. რაც მთავარია, ის სრულიად დამოუკიდებელი მოწყობილობაა – არ სჭირდება გარე ელემენტის ბლოკი, სმარტფონთან მიბმა ან მავთულები. სათვალეს ორი ვერსია აქვს – სხვადასხვა ზომის და საშუალოდ 132-დან 136 გრამამდე იწონის, რაც კონკურენტების ანალოგებზე ბევრად მსუბუქია. მოწყობილობა ერთი დამუხტვით ოთხ საათამდე მუშაობს, სპეციალური სატენი ქეისი კი მას დამატებით რამდენჯერმე მუხტავს.
შპიგელი არ მიიჩნევს, რომ სმარტფონების ეპოქა დასრულდა – სათვალე ამ ეტაპზე არსებული მოწყობილობების შემავსებელი აქსესუარია. მისი მთავარი სიძლიერე და ახალი ფუნქციები დამოუკიდებელი დეველოპერებისგან წამოვა, ზუსტად ისე, როგორც iPhone-ის გამოსვლისას ბევრი პოპულარული აპლიკაციის იდეა თავად მწარმოებელს წინასწარ არ ჰქონია.
მთავარ ბარიერად მაინც მაღალი ფასი რჩება. მენეჯმენტის თქმით, ტექნოლოგიური თვალსაზრისით ეს ღირებულება სერიოზული საინჟინრო მიღწევაა ბაზარზე არსებულ სხვა ძვირადღირებულ ალტერნატივებთან შედარებით. თუმცა, სანამ სათვალე საშუალო ლეპტოპზე ძვირი ღირს, ბაზრის დიდ წილს კვლავ კონკურენტი ბრენდები გააკონტროლებენ, რომლებიც შედარებით ბიუჯეტურ სეგმენტზე მუშაობენ. კომპანიაში იმედოვნებენ, რომ მომავალ თაობებში საწარმოო ხარჯების შემცირებას და პროდუქტის მასობრივ ბაზარზე გატანას შეძლებენ.
წყარო: Fastcompany
