Snapchat სოციალური ქსელია, რომელიც თავისი ეფემერული კონტენტითა და სათამაშო ფილტრებითაა ცნობილი. მას ყოველდღიურად მილიონობით მომხმარებელი იყენებს. თუმცა, დამაინტრიგებელია აპლიკაციის შემქნის ისტორიაც. მოდით, სანამ თქვენ დილის გემრიელ ყავას იმზადებთ, თვალი გადავავლოთ 2011 წელს და გავიგოთ, როგორი იდეების წყალობით შეიქმნა ინოვაციური პლატფორმა.
ეს ამბავი დაიწყო სტენფორდის უნივერსიტეტში, სადაც სამი სტუდენტი – ევან შპიგელი, ბობი მერფი და რეჯი ბრაუნი – უნიკალური სოციალური ქსელის გამოცდილების შექმნაზე მსჯელობდნენ. ბრაუნმა, რომელიც გავრცელებული ინფორმაციით, კონცეფციის შემქმნელია, წარმოიდგინა აპლიკაცია, სადაც ფოტოები გარკვეული დროის შემდეგ თავისით გაქრებოდა. ციფრული სამყაროს არამუდმივობის იდეით დაინტერესებული ბრაუნი ესაუბრა შპიგელს, რომელიც თავისი ანტრეპრენერული გონებით იყო ცნობილი. მათ გააცნობიერეს იდეის პოტენციალი და საქმეში ჩართეს მერფი, კოდინგის ჯადოქარი, რომელსაც ეს ხედვა რეალობად უნდა ექცია.
2011 წლის ივლისში, სტუდენტებმა შექმნეს აპლიკაცია, სახელწოდებით “Picaboo” და iOS App Store-ში განათავსეს. თუმცა, აპლიკაციაში ჩართვა ნელი ტემპით მიდიოდა. ფოტოების გაქრობის კონცეფცია ზოგიერთი მომხმარებლისთვის უცნაური იყო. გარდა ამისა, არ არსებობდა ეკრანის სქრინების გადაღებისგან დაცვის მექანიზმი. ახალი სოციალური ქსელი ტექნიკური გამოწვევების წინაშე მალე აღმოჩნდა.
შპიგელი და მერფი, რომლებმაც გადაწყვიტეს დაეხვეწათ თავიანთი კონცეფცია, ბრაუნს სადავო გარემოებაში ჩამოშორდნენ. მოგვიანებით, ბრაუნმა მაინც მიიღო ფინანსური სარგებელი, როგორც თანადამფუძნებელმა. შპიგელმა და მერფიმ ყველაფელი სუფთა ფურცლიდან დაიწყეს. 2011 წლის სექტემბერში შეცვალეს აპლიკაცია და დაარქვეს “Snapchat”. ეს გარდამტეხი მომენტი აღმოჩნდა. აქცენტი უბრალო ფოტოების გაზიარებიდან უფრო ინტერაქციულ გამოცდილებაზე გადავიდა. დაინერგა ისეთი ფუნქციები, როგორიცაა შეტყობინებების გაქრობა და მაყურებელთა დროის ლიმიტები.
Snapchat-ის იდეა მოეწონა ახალგაზრდა თაობას, განსაკუთრებით მათ, ვინც მეგობრებთან შთაბეჭდილებების გაზიარების სპეციფიკურ გზას ეძებს. აპლიკაციამ მოიპოვა პოპულარობა კოლეჯის კამპუსებში და ორგანულად გავრცელდა ზეპირსიტყვიერად. უცნაური ფილტრებისა და ინტერაქციული ფუნქციების დამატებამ, როგორიცაა ხატვის ხელსაწყოები, კიდევ უფრო გააძლიერა მომხმარებლის ჩართულობა. Snapchat არ იყო მხოლოდ გაზიარების საშუალება, ეს იყო სახალისო გამოცდილების შექმნა.
ახალი ტექნოლოგიების პოტენციალის დახმარებით, Snapchat-მა დანერგა გაფართოებული რეალობის (AR) ფუნქციები. ეს ფილტრები მომხმარებლებს საშუალებას აძლევდა ვირტუალური ობიექტები მოეთავსებინათ თავიანთ ფონზე, რაც უფრო ინტერაქტიულ გამოცდილებას ქმნიდა. ამ ინოვაციამ არა მხოლოდ გაზარდა მომხმარებლის ჩართულობა, არამედ კარი გახსნა კრეატიული მარკეტინგული კამპანიებისა და პარტნიორობისთვის.
Snapchat ფოტოების მარტივად გაზიარების აპლიკაციიდან გადაიქცა მრავალმხრივ პლატფორმად, რომელიც მოიცავს შეტყობინებებს, ისტორიებს, AR გამოცდილებას და ახალი ამბების კონტენტსაც კი.
რუბრიკის „ყავასთან საკითხავი“ წარმდგენია Dunkin’.
