სახლის ვიზუალური და ხმოვანი მონიტორინგისთვის შექმნილი ჭკვიანი მოწყობილობები ზოგიერთ ადამიანში კონფიდენციალურობის განცდას არღვევს, რადგან ისინი მუდმივად გვისმენენ და გვაკვირდებიან. Recipe Desing-მა ამის გამოსასწორებლად ახალი მოდელი დააპროექტა — Soove, რომელიც სახლის მონიტორინგისთვის შექმნილ ტიპურ მოწყობილობებთან შედარებით, მომხმარებლისთვის უფრო სანდო და მეგობრული იქნება.
Soove გამორჩეულია თავისი დიზაინით. კონუსის ფორმის კონსტრუქცია დინამიკითაა შეფუთული. თავთან კი უცნაური, საყელოს მსგავსი რგოლი აქვს, რომელიც მოწყობილობას გარშემო არსებული თითქმის ყველა აუდიო სიგნალის მიმართ უფრო მგრძნობიარეს ხდის.. ყველაზე საინტერესო ნიუანსი კი თავზე მოთავსებული შავი შუშის ბურთი და მისი თვალებია, რომელიც ფორმის ცვლილებით სხვადასხვა გამომეტყველებას იღებს. ასე მოწყობილობა თავის ემოციებს გამოხატავს, მას შეუძლია, სტრესული დღის შემდეგ თქვენი სრულფასოვანი მსმენელი გახდეს.
აუდიო ინფორმაციის მიღების გარდა Soove-ს, სახის გამომეტყველებისა და ფიზიკური მდგომარეობის გათვალისწინებით, ადამიანის ემოციების ამოცნობაც შეუძლია. გარდა ამისა, ის სახლში არსებული სხვა ნებისმიერი მოწყობილობიდან მიღებულ ინფორმაციასაც ამუშავებს. სხვადასხვა გზით შეგროვებული მონაცემების შესაბამისად, მოწყობილობა სახლში უფრო სასიამოვნო ატმოსფეროს შექმნას ცდილობს. ამისათვის Soove არეგულირებს განათებას, ტემპერატურას ან მუსიკას. თანაც, მოწყობილობა საჭიროებისამებრ ჰაერზე გასეირნების, დასაძინებლად წასვლის და სხვა სახის რეკომენდაციებსაც გაგიწევთ.
Soove-ის ავტორების ჩანაფიქრია, რომ მათმა პროდუქტმა უფრო მეტად იზრუნოს მომხმარებლის კეთილდღეობაზე, ვიდრე ეს სახლის განათების დარეგულირებისა თუ სხვა შაბლონური ფუნქციების შესრულებით გამოიხატება. საბოლოოდ, ჭკვიანი მოწყობილობა, თავისი მრავალმხრივი შესაძლებლობების გამოყენებით, სახლში უსაფრთხოების კონტროლის გარდა, ადამიანებთან დამეგობრებასაც ცდილობს.
