SpaceX დღეს რევოლუციური ნაბიჯის გადასადგმელად მზად იყო, კოსმოსში სრულიად სამოქალაქო ეკიპაჟის გაგზავნას აპირებდა, თუმცა ჰელიუმის გაჟონვის გამო, ეს ამბავი ხვალისთვის, 28 აგვისტოსთვის გადაიდო. Polaris Dawn-ის მისიაზე გესაუბრებით, რომელიც მილიარდერი ჯარედ აიზაკმენის მიერაა ორგანიზებული, ახლა იგი ნასას Kennedy Space Center-იდან დილის 3:38 საათზე (0738 GMT) უნდა აფრინდეს.
SpaceX Dragon-ის კაფსულა სიმაღლის პიკს 1400 კილომეტრზე მიაღწევს – ეს კი იმაზე უფრო მაღალი მაჩვენებელია, ვიდრე ნებისმიერი ეკიპაჟიანი მისიის ბოლო ნახევარი საუკუნის განმავლობაში… აიზაკმენი 4-კაციან გუნდს გაუძღვება და ეს პირველი კომერციული ფრენა იქნება, რომელიც ახლად განვითარებული SpaceX-ის EVA-ს კოსტიუმებით წარიმართება.
გუნდის წევრებს შორის არიან მისიის პილოტი სკოტ პოტიტი, ამერიკის საჰაერო ძალების ყოფილი ლეიტენანტი; მისიის სპეციალისტი სარა გილისი, SpaceX-ის კოსმოსური იპერაციების წამყვანი ინჟინერი; მისიის სპეციალისტი და სამედიცინო ოფიცერი ანა მენონი, რომელიც ასევე კოსმოსური ოპერაციების ინჟინერი გახლავთ SpaceX-ში — ასტრონავტებს მისიისთვის 2 წელზე მეტხანს ამზადებდნენ.
საინტერესოა, რომ Polaris Dawn პირველი იქნება იმ სამი მისიიდან, რომელიც Polaris-ის პროგრამის ქვეშ შესრულდება. ეს უკანასკნელი კი აიზაკმენის, ანუ Shift4 Payments-ის ტექნოლოგიური კომპანიის დამფუძნებლისა და SpaceX-ის თანამშრომლობის შედეგია.
„იდეა ახალი ტექნოლოგიისა და ოპერაციების განვითარებასა და გატესტვაშია, რათა წინ წავწიოთ SpaceX-ის ხედვა, მივცეთ კაცობრიობას საშუალება, იმოგზაურონ ვარსკვლავებში“, — აცხადებს აიზაკმენი.
საინტერესოა, რომ ეკიპაჟი ISS-ის ორბიტაზე თითქმის 3-ჯერ მაღლა მოხვდება, თუმცა 1970 წლის Apollo 13-ის რეკორდის მოხსნამდე ჯერ კიდევ ბევრი აკლია…
რას გააკეთებენ ეკიპაჟის წევრები Polaris Dawn-ის მისიის დროს?
მესამე დღეს ეკიპაჟი თავის უახლეს EVA-ს კოსმოსურ კოსტიუმებს ჩაიცვამს, რომლებიც ჩაფხუტის კამერებით, ეკრანებითა და მობილობის თანამედროვე სისტემებითაა აღჭურვილი და ორ-ორად გავა ხომალდიდან. კოსმოსში თითოეული 15-20 წუთს გაატარებს, დედამიწის ზედაპირიდან დაახლოებით 700 კილომეტრზე. მომდევნო დღეს კი კოსმოსურ ხომალდსა და Starlink-ს შორის ლაზერზე დაფუძნებულ სატელიტური კომუნიკაციების ტესტირებას დაუთმობენ.
სულ ეკიპაჟი 40 ექსპერიმენტს ჩაატარებს, რომლებიც მიზნად ისახავს, გაიგოს მეტი ადამიანის ჯანმრთელობის მდგომარეობის შესახებ დიდხნიანი კოსმოსური ფრენების დროს. კოსმოსში 6 დღის გატარების შემდეგ კი მისია ფლორიდის სანაპიროზე დასრულდება.
დაბოლოს, იმასაც გეტყვით, რომ Polaris-ის მეორე მისიაშიც Dragon-ის კაფსულას გამოიყენებენ, ხოლო მესამე ფინალური მისია იქნება, რა დროსაც Starship გაფრინდება — SpaceX-ის პროტოტიპი, რომელიც გვაცნობს, როგორ შეიძლება გამოიყურებოდეს მომდევნო თაობის რაკეტა, მეტიც, მასკი მას მარსის კოლონიზაციისთვის მთავარ იარაღად მიიჩნევს…
