in

როგორ იყენებენ ქართული კომპანიები Spotify-ს კომუნიკაციისთვის?

ბრენდების მომხმარებელთან საკომუნიკაციო საშუალებებს შორის, უმნიშვნელოვანესი როლი აქვთ ციფრულ არხებს. იმ დროს, როდესაც კომპანიების მნიშვნელოვანი ნაწილი, მომხმარებლებთან სასაუბროდ, ძირითადად, სოციალურ მედიას (მეტწილად Facebook, Instagram, ნაკლებად – LinkedIn, TikTok და სხვები) იყენებს, სხვები ისეთ ალტერნატიულ პლატფორმებსაც ეძებენ, სადაც სამიზნე აუდიტორიაა წარმოდგენილი და მათზე ადაპტირებული კონტენტით ცდილობენ ღირებულების შექმნას. ერთ-ერთი ასეთი პლატფორმაა Spotify, რომელიც მომხმარებელს სასურველ აუდიოკონტენტზე წვდომის საშუალებას აძლევს. ქართული კომპანიები Spotify-ის საშუალებით, ნიშურ აუდიტორიას სპეციალურ კონტენტს სთავაზობენ – მაგალითად, საქართველოს ბანკი ბიზნესი, Marketer.ge-სთან, პოდკასტების სერიას ქმნის, „მეამამ“ კი, სპეციალურად Spotify-ის სეგმენტისთვის მუსიკალური კომპოზიციები გამოუშვა. როგორ ხედავენ Spotify-ის, როგორც მომხმარებელთან კომუნიკაციის საშუალებას? ამის შესახებ, საქართველოს ბანკის ციფრული მარკეტერი ქალდა არაბული და „მეამას“ ციფრული მარკეტინგის ხელმძღვანელი გიორგი კალანდია გვესაუბრნენ.

M: რითაა საინტერესო თქვენთვის, როგორც ბრენდისთვის Spotify-ის მომხმარებელთან საკომუნიკაციო არხად გამოყენება?

ქალდა არაბული: „სპოტიფაი ერთ-ერთი ყველაზე დიდი სტრიმინგ პლატფორმაა, რომელსაც მსოფლიოში 422 მილიონი აქტიური მომხმარებელი ჰყავს. აქ, როგორც ბრენდმა, შეგიძლია გაუშვა სხვადასხვა სახის ბანერული თუ ვიდეო რეკლამა, შექმნა ფლეილისტები, გააზიარო პოდკასტები, რაც საშუალებას გაძლევს გააცნო შენი ბრენდი უკეთ, ასევე შენც მეტად დაუახლოვდე აუდიტორიას და გაიგო მეტი მათ ინტერესებზე, ცხოვრების სტილსა თუ გემოვნებაზე.“

გიორგი კალანდია:მეამასთვის, როგორც ბრენდისთვის, ყველაზე საინტერესო ამ ეტაპზე არის, Spotify-ის დახმარებით, Facebook/Instagram-ის Story-ზე ჩვენთვის შექმნილი და ასევე ჩვენთვის საინტერესო მელოდიების გავრცელება. Spotify-ზე ყოველდღიურად იზრდება მომხმარებელთა რაოდენობა, მათ შორის, საქართველოშიც და მალე ეს არხი არა მხოლოდ მცირე მიზნებისთვის, არამედ ძალიან საინტერესო იქნება როგორც Voice Advertising-. შესაბამისად ის ბრენდის საკომინიკაციო მესიჯების გასავრცელებლად ერთერთი საუკეთესო არხია. Voice Advertising-ის გაციფრულება ბევრად საინტერესოა, ის შესაძლებლობას გვაძლევს მივწვდეთ  ზუსტ და მიზნობრივ აუდიტორიას.

M: თქვენი დაკვირვებით, რა სახის კონტენტი აინტერესებს Spotify-ის მომხმარებელს ბრენდებისგან?

ქალდა არაბული: „როგორც მრავალი კვლევა გვეუბნება, ბოლო წლებია მსოფლიოში პოდკასტების მსმენელების რაოდენობა იზრდება, ორჯერ მეტია წინა ათწლეულთან შედარებით. ჩვენთანაც მკვიდრდება ეს კულტურა, უკვე ბევრი ბრენდი გვთავაზობს, სპოტიფაი კი ერთ-ერთი ყველაზე კარგი და მოსახერხებელი საშუალებაა მათი განთავსებისთვის. ჯერ დიდი და აქტიური მსმენელი ქართულ პოდკასტებს არ ჰყავს, მაგრამ რაც უფრო მრავალფეროვან თემებს ვთავაზობთ ბრენდები, მით უფრო მეტი მსმენელიც ჩნდება. ასევე არ უნდა დაგვავიწყდეს ფლეილისტების შექმნა და მათი გაზიარება აუდიტორიისთვის. ეს ბრენდს ეხმარება უკეთ გამოხატოს თავისი tone of voice და მომხმარებლებისთვისაც პოზიტიურ ამბავთან – მუსიკასთან იყოს დაკავშირებული.“

გიორგი კალანდია: ამ ეტაპზე ინტერესის სფერო მხოლოდ მუსიკაა, რადგან Spotify- ასე თუ ისე მაინც ახალია საქართველოში. ეტაპობრივად ჩვენც ვერგებით ამ პლატფორმას, ვფიქრობთ, რომ მომავალში პოდკასტების მოსმენის კულტურაც გაიზრდება და ამ მიმართულებას ექნება უფრო მეტი დაინტერესება.

M: როგორ დაახასიათებდით Spotify-ის მომხმარებელ სამიზნე აუდიტორიას, რასაც კონტენტის შექმნისას ითვალისწინებთ?

ქალდა არაბული: „სპოტიფაიზე არიან უმეტესად ახალგაზრდები, gen Z და მილენიალები, რომლებიც ციფრულ არხებთან, სიახლეებთან უფრო მეგობრულები არიან. რა თქმა უნდა, მათი ინტერესები განსხვავდება, რაც გასათვალისწინებელია კონტენტის შექმნისას. რეკლამის დროს ტარგეტირების შესაძლებლობა საშუალებას გაძლევს სხვადასხვა ასაკის, ლოკაციის, დროის და მუსიკალური გემოვნების ადამიანს, მეტად პერსონალიზებული კონტენტი ვაჩვენოთ.“

გიორგი კალანდია: „როგორც სტატისტიკა და ანალიტიკა გვიჩვენებს, აქაც მრავალფეროვანია აუდიტორია, ამიტომ ვცდილობთ ყველას მოვერგოთ და ნებისმიერი აუდიტორიისთვის საინტერესო კონტენტი შევქმნათ, როგორც მუსიკის ასევე პოდკასტების ნაწილში, მაგალითად: როცა საახალწლო კამპანიის ფარგლებში სიმღერებს ვქმნიდით, ვეცადეთ შეგვერჩია განსხვავებული ჟანრები, რათა ყველა გემოვნების ადამიანისთვის მისაღები ყოფილიყო.“

M: როგორ და რა ფორმით მოარგეთ თქვენი კომპანიის კომუნიკაცია Spotify-?

გიორგი კალანდია: „Meama- Spotify-ზე განთავსებულია სპეციალურად Meama-სთვის და Meama Collect-ისთვის სხვადასხვა კამპანიის ფარგლებში, ქართველი შემსრულებელების მიერ შექმნილი რამდენიმე მუსიკა. ასევე ბრენდის ღირებულებებზე დაფუძნებული კამპანიის ფარგლებში –  „სვლა დამოუკიდებლობისკენ“ ჩავწერეთ პოდკასტები, რომელშიც სხვადასხვა სფეროში წარმატებული ადამიანები საუბრობენ დამოუკიდებლობასა და მის მნიშვნელობაზე. Spotify-ის ჩვენი არხი დაკავშირებულია არა რომელიმე პროდუქტთან ან მომსახურებასთან, არამედ მეამას ბრენდთან, მის ფილოსოფიასთან და განსხვავებულ მიდგომებთან.“

ქალდა არაბული: აუდიტორია მრავალფეროვანია ამიტომ, კონკრეტული მიზნის და სეგმენტის გათვალისწინებით, სხვადასხვა კონტენტს ვქმნით, იქნება ეს პოდკასტები პროფესიების თუ ცხოვრების სტილის შესახებ, ფლეილისტები ახალგაზრდებისთვის, თუ ციფრული პროდუქტის გაცნობა აუდიო რეკლამით ყველა სპოტიფაი მსმენელისთვის. მნიშვნელოვანია იმის გააზრება თუ ვის გვინდა მივწვდეთ და რა მიზანი გვაქვს. ამიტომ განსხვავდება ჩვენი კონუმიკაციის შინაარსიც და ფორმაც. მაგალითად, წინა წელს, აბიტურიენტებისთვის მოვამზადეთ გამოცდამდე, გამოცდის შემდეგ და უკვე სტუდენტობისას მოსასმენი ფლეილისტები, რის შემდეგაც სტუდენტები სოციალურ ქსელში გვიზიარებდნენ თავიანთ საყვარელ მუსიკებს; სხვადასხვა თემაზე გვქონია პოდკასტები: SOLO-ს მიმართულებით Lifestyle ამბები მოვყევით, მოდერატორი დათუნა ალადაშვილი ორ კვირაში ერთხელ ხვდებოდა სხვადასხვა სფეროდან ადამიანებს, რომლებიც მსმენელებს უზიარებდნენ საკუთარ პროფესიულ გამოცდილებებს, საუბრობდნენ მათ ჰობიზე და სხვა ისეთ თემებზე, რომლის მოსმენაც თავისუფალ დროს მსმენელისთვის საინტერესოა. ამ ჩანაწერების ნახვა ფლეილისტის სახით, დღესაც შესაძლებელია.

ახლა, გვაქვს ყოველკვირეული პოდკასტები მარკეტერთან ერთად საქართველოს ბანკი ბიზნესისგან, რასაც აქტიური მსმენელი ჰყავს. აქაც სხვადასხვა პროფესიის ადამიანები აზიარებენ თავიანთ ცოდნასა და გამოცდილებას, თუმცა უფრო ბიზნესის და პროდუქტის განვითარების კუთხით. ასევე ვიყენებთ აუდიო რეკლამასაც, რაც პროდუქტის თუ ბრენდის ცნობადობის ზრდაში გვეხმარება. მაქსიმუმ 30 წამიანი ხმა, რომელსაც მიყვება ბანერი, call to action-ი და კლიკებადი ღილაკი, რომ დაინტერესების შემთხვევაში მეტი ინფორმაცია გაიგონ. ერთ-ერთი ციფრული პროდუქტის ლონჩისას გამოვიყენეთ აქტიურად, სპოტიფაიზე ამ დროს მხოლოდ ჩვენს რეკლამას შეხვდებოდით, რამაც ევერნესის ზრდას ხელი შეუწყო და ტრეფიკიც საკმაოდ კარგი გვქონდა.

 


ავტორი: თამარ მეფარიშვილი

Budweiser-ის რეკლამის ნახვით აფრიკელებს სინათლეს მიაწვდით

მინის კუბი, როგორც სარეკლამო კონსტრუქცია — „ვოლვო ქარ საქართველოს“ განსხვავებული მიდგომა კომუნიკაციაში