in

როგორ მოვიკრიბოთ ყურადღება, უამრავი გამფანტველი ფაქტორის პირობებში

ალბათ ბევრჯერ ყოფილხართ ამ სიტუაციაში: სხდებით კომპიუტერთან, გაქვთ დიდი გეგმები და მოტივაცია, მაგრამ უცებ იწყება – ჯერ მეილი, მერე მესენჯერი, შემდეგ კი ავტომატურად იღებთ ტელეფონს და სოციალურ ქსელებში ათვალიერებთ „სიახლეებს“. ნაცნობია, არა?

ექსპერტების თქმით, ეს აღარ არის უბრალოდ ცუდი ჩვევა – ეს უკვე ჩვენი ბუნებრივი მდგომარეობაა. ჩვენ ფაქტობრივად „დამოკიდებული“ ვართ გაფანტულობაზე. ეს შემთხვევითი არ არის. ჩვენი გაჯეტები დაპროგრამებულია ამ ფაქტორის გამოსაყენებლად. ისინი გვაწვდიან დოპამინის წამიერ დოზებს შეტყობინებების, მოწონებებისა და გზავნილების საშუალებით, რაც ციფრული ვალიდაციის მუდმივ ციკლში გვამყოფებს.

წარმოიდგინეთ, რომ თქვენი გონება თეთრი დაფაა. ყოველი დავალება ან თემა, რომელზეც ფოკუსირდებით, არის ამ დაფაზე წერა. მულტიტასკინგის მსგავსად, მუდმივად შლით და ხელახლა წერთ სხვადასხვა ინფორმაციას.

ყოველი ეს გადართვა გარკვეულ ფასად გვიჯდება. კვლევები აჩვენებს, რომ მულტიტასკინგი იწვევს დავალების შესრულების დროის გაზრდას, მეტ შეცდომებსა და სტრესს. თქვენი ტვინი იღლება. მას უჭირს გაფანტულობის გაფილტვრა ან გადაწყვეტილებების მიღება, რაც სერიოზულად გაფერხებთ.

მაშ როგორ შეგიძლიათ გააძლიეროთ თქვენი ფოკუსირების უნარები? რა დაგეხმარებათ გაფანტულობის შემცირებაში? როგორ შეგიძლიათ შექმნათ გარემო, რომელიც ხელს უწყობს უკეთეს კონცენტრაციას?

მოამზადეთ საფუძველი

ტვინის ფოკუსირებისთვის ოპტიმიზაცია საკუთარ თავზე ფუნდამენტური ზრუნვით იწყება. პრიორიტეტი უნდა მიანიჭოთ ისეთ ჩვევებს, როგორიცაა ძილი, ჰიდრატაცია, სავარჯიშოები ფსიქიკური ჯანმრთელობისთვის და ფიზიკური აქტივობა.

გარემო სიგნალების თანმიმდევრული შექმნაც მნიშვნელოვანია. გამოიყენეთ სიგნალები, რომლებიც თქვენს ტვინს ეუბნება, რომ კონცენტრაციის დროა. ეს შეიძლება იყოს სპეციალური სამუშაო სივრცე, კონკრეტული მაგიდის მოწყობა, ან რაიმე ტიპის რუტინა, რომელიც ღრმა სამუშაოსთვის გამზადებთ. გამორთეთ შეტყობინებები, დაბლოკეთ ტელეფონი მუშაობისას და გამოიყენეთ აპლიკაციების ბლოკატორები ციფრული ცდუნებების თავიდან ასარიდებლად.

გაავარჯიშეთ ყურადღება

აუცილებლად დაგჭირდებათ თქვენი ბუნებრივი ფოკუსის მართვა. ჩვენი ყურადღება მიზანზეა მიმართული, რაც ნიშნავს, რომ ბუნებრივად ვკონცენტრირდებით მიზნებსა და პრიორიტეტებზე. თუ თქვენი მიზნები ძალიან ნათელია, ეს ფოკუსირებაში დაგეხმარებათ. ჩამოწერეთ თქვენი მიზნები და მოათავსეთ ისეთ ადგილას, სადაც ხშირად დაინახავთ. მიზნების ვიზუალური შეხსენებებით გარშემორტყმა ეხმარება თქვენს ტვინს ფოკუსირებაში მნიშვნელოვანზე.

ეცადეთ მართოთ ემოციები

მიზნების დასახვა არ არის მხოლოდ დავალებების შესრულება. ეს არის ძლიერი სტრატეგია ემოციების რეგულირებისა და მართვისთვის. ადამიანებს, რომლებიც უფრო პოზიტიურად გრძნობენ თავს, უკეთესად შეუძლიათ ფოკუსირება, მეტის კეთება და უფრო კრეატიულებიც არიან. ჰკითხეთ საკუთარ თავს: როგორ მინდა ვიგრძნო თავი? შეგიძლიათ წარმოიდგინოთ, როგორ მშვიდად და მოდუნებულად ხართ, როგორ ტკბებით წყნარი მომენტით ან ბედნიერად ისვენებთ მეგობრებთან ერთად.

შეწყვიტეთ ავტოპილოტირება

ყურადღების მოკრება სხვადასხვა ფორმით ხდება. ზოგჯერ, შეგნებულად ვართ ფოკუსირებული კონკრეტულ დავალებაზე, როგორიცაა რთული ანგარიშის წერა. როდესაც გრძნობთ სოციალური მედიის შემოწმების დაუძლეველ სურვილს, შეჩერდით და საკუთარ თავს ჰკითხეთ: რა უდევს საფუძვლად ამ ქცევას? ისევ პროკრასტინაცია? რთული სამუშაოს თავიდან არიდებას ვცდილობ? ამ კითხვების დასმა არაცნობიერ ჩვევას გააზრებულ არჩევანად გარდაქმნის. მეტა-ცნობიერება კუნთივითაა – რაც მეტად ვარჯიშობთ ყურადღების დაჭერასა და მიმართვაში, მით უფრო ძლიერდება.

მოერგეთ თქვენი ენერგიის რიტმებს

უმეტესად, ადამიანებს პიკური ფოკუსირების პერიოდები დაახლოებით დილის 11 საათზე აქვთ და შუადღის შემდეგ, თუმცა ეს განსხვავდება ცხოვრების სტილის მიხედვით. თქვენი პირადი რიტმის აღმოსაჩენად, აწარმოეთ დღიური, სადაც აღრიცხავთ თქვენი ენერგიისა და კონცენტრაციის დონეებს დღის განმავლობაში. დაგეგმეთ მთავარი დავალებები თქვენი კოგნიტური პიკის საათებში და ნაკლებად კომპლექსურ სამუშაოს იმ დროს მიუბრუნდით, როდესაც თქვენი ენერგია იკლებს.

ივარჯიშეთ აქტიურ მოსმენაში

ბევრი ადამიანი კარგავს ფოკუსს საუბრისას. ეს ხდება გუნდურ შეხვედრებზე Zoom-ში (მართლა გგონიათ, რომ ვერავინ ამჩნევს, როცა სმარტფონს დაჰყურებთ?) და შეიძლება მოხდეს პირისპირ საუბრისასაც, როდესაც ერთ წუთს კოლეგასთან საუბრობთ,  შემდეგ მენტალურად სხვაგან ხართ, გაფანტული. ჩვენ შევეჩვიეთ ერთმანეთთან არყოფნას, ზედაპირული ურთიერთობები კი ნორმად იქცა. ფოკუსის გასაუმჯობესებლად და კავშირის აღსადგენად, სჯობს, ძალისხმევა მივმართოთ აქტიური მოსმენისკენ. ეს გულისხმობს თვალებით კონტაქტის შენარჩუნებას, მეორე ადამიანის ნათქვამის მოსმენასა და გააზრებული კითხვების დასმას.

წყარო: HBR



ბექჰემი, „ტყუპ ძმასთან“ ერთად, Stella Artois-ის რეკლამაში მონაწილეობს

როგორ შევქმნათ ძლიერი პერსონალური ბრენდი? — 8 რჩევა