თხრობის სამყაროში ერთი ძალიან მარტივი, თითქმის ელემენტარული კონცეფცია არსებობს, რომელიც ე. წ. „გმირის მოგზაურობას“ უკავშირდება. ეს უკანასკნელი განიმარტება, როგორც გმირი ბოროტმოქმედთა წინააღმდეგ.
გმირის ერთ-ერთი ყველაზე ცნობილ მოგზაურობად კი ჰომეროსის „ოდისეას“ დასახელება შეგვიძლია. ტროას ომის დასრულებიდან 10 წლის განმავლობაში ოდისევსი ითაკაში, თავის სახლში დაბრუნებას ცდილობს. უბრალოდ, გზად უამრავ გამოწვევასა და მითურ არსებას აწყდება — მომაჯადოებელი ქალთევზები, ამაზრზენი ციკლოპები და მომხიბვლელი ჯადოქარი…
შეიძლება ითქვას, გარკვეული სახის გამოწვევის წინაშე დგომის კონცეფცია და დაბრკოლებების დაძლევა ჭეშმარიტი ფორმულაა ადამიანების ცნობისმოყვარეობის გასაღვივებლად. ამბები ჩვენს გონებაში შემეცნებით სტრუქტურას ქმნის ინფორმაციის დასაშიფრად, რის გამოც ხშირად ფაქტები საკმარისი არაა ხალხის დასარწმუნებლად. ამიტომაც, გვჭირდება თხრობის ფორმა, რომელიც აღვიძებს ჩვენს წარმოსახვას.
ძალიან დიდი ხნის განმავლობაში ბრენდები უგულებელყოფდნენ გმირის წინააღმდეგ ბოროტმოქმედების კომპლექსს. თუმცა ვინც ამ ფორმულას მიჰყვებოდა, საკმაოდ დიდი წარმატება მიიღო. მაგალითად, წარმოიდგინეთ სიუჟეტი, რომელშიც კონკრეტული პროდუქტი დაბრკოლებების ქაოსში გახვეულ გმირს დახმარებად მოევლინება. ისიც გასათვალისწინებელია, რომ „ბოროტმოქმედი“ სულაც არ ნიშნავს მტერს, რომელიც თქვენს განადგურებას ცდილობს. შეიძლება, ეს უბრალოდ რაიმე გამოწვევას, კონფლიქტს ნიშნავდეს, ან როგორც მარეკეტერები ამას უწოდებენ, „ადამიანის დაძაბულობას“.
სხვა სიტყვებით რომ ვთქვათ, თუ ბრენდი მომხმარებლებს დაძაბულობის გადაჭრაში არ დაეხმარება, უბრალოდ დროის საკითხია მისი ბაზრიდან გაქრობა. ამიტომ, მენეჯერებმა უკიდურესი გულწრფელობა უნდა გამოიჩინონ. თუნდაც ავიღოთ ენერგეტიკული ბიზნესი, რომელსაც გარემოსდაცვითი მოძრაობები აქტიურად უპირისპირდებიან. აქ მომხმარებლებისთვის მთავარი კონფლიქტი საზიანო ფაქტორებია, რომლებიც გარემოზე მნიშვნელოვნად მოქმედებს. ამის გათვალისწინებით, ენერგეტიკასთან დაკავშირებული ბრენდები, რომლებიც ენერგიის შეგნებული მოხმარებისკენ მოუწოდებენ საზოგადოებას, დადებით ყურადღებას მიიპყრობენ. ეს მარტივი, მაგრამ გაბედული ნაბიჯია დამაჯერებელი ნარატივის შესაქმნელად, თუ როგორ აყენებთ თქვენს ბრენდს ბოროტმოქმედის წინააღმდეგ.
ამავდროულად, არქეტიპებსაც დიდი ძალა აქვს ბრენდის მნიშვნელობის გასამძაფრებლად. მაგალითად, Disney ჯადოქარია, რომელიც საოცარ ჯადოსნობას მატებს ჩვენს ცხოვრებას. სინამდვილეში, ყველა ბრენდი კონკრეტული არქეტიპის მატარებელია. ხოლო შესაბამისის პოვნა და მის მიხედვით პოზიციონირება სამიზნე აუდიტორიას გამოწვევების გადალახვაში დაეხმარება, რაც იგივე „ბოროტმოქმედის“ შესატყვისია.
