ზოგისთვის სუპერთასი ამერიკულ ფეხბურთთან ასოცირდება, ზოგისთვის კი – გრანდიოზულ „ჰალფთაიმ შოუსთან“. თუმცა, ბევრი ჩვენგანისთვის მთავარი ვარსკვლავი ის სარეკლამო რგოლებია, რომელთა საეთერო დროც რეკორდულად ძვირი ღირს.
სუპერთასი LX-ის (60) დასრულების შემდეგ დროა, შევაჯამოთ ის რეკლამები, რომლებმაც მაყურებელს თავი დაამახსოვრეს. ზოგიერთი მათგანი ინტერნეტში თამაშამდე ერთი კვირით ადრე გავრცელდა, ნაწილმა კი თავისი „სვლა“ უშუალოდ მატჩის დროს გააკეთა. გთავაზობთ წლევანდელი სუპერთასის საუკეთესო ნამუშევრების მიმოხილვას.
Anthropic
ხელოვნური ინტელექტის კომპანია Anthropic-მა სუპერთასის ეთერი კონკურენტის გასაკრიტიკებლად გამოიყენა. მათ მოამზადეს სარეკლამო სერია, სადაც ღიად დასცინიან OpenAI-ს იმის გამო, რომ ეს უკანასკნელი ChatGPT-ში რეკლამების ინტეგრირებას გეგმავს.
Bosch
ინტერნეტში პოპულარულმა შეფ-მზარეულმა, გაი ფიერიმ ელექტროინსტრუმენტების მწარმოებელ Bosch-თან ითანამშრომლა კამპანიისთვის Like a Bosch. რგოლის დასაწყისში მაყურებელი სრულიად განსხვავებულ, გაპარსულ და ჩვეულებრივ ფიერის ხედავს, რომელიც ყოველდღიური საქმეებითაა დაკავებული. თუმცა, როგორც კი საქმეში Bosch-ის ხელსაწყოები ერთვება, ის მომენტალურად უბრუნდება თავის ცეცხლოვან და ქარიზმატულ იმიჯს.
Budweiser
ტრადიცია არ ირღვევა – Budweiser-ის ლეგენდარული ცხენები ეკრანებს დაუბრუნდნენ. ბრენდმა კიდევ ერთხელ გაუსვა ხაზი თავის მრავალწლიან ისტორიასა და სუპერთასთან მჭიდრო კავშირს.
ტექნოლოგიურმა გიგანტმა თავისი AI-ს, Gemini-ს გაადამიანურება სცადა. რეკლამაში New Home ნაჩვენებია დედა, რომელიც შვილთან ერთად ახალ, ცარიელ სახლს ათვალიერებს. Gemini ეხმარება მათ, ვირტუალურად შეავსონ ოთახები ავეჯითა და ნივთებით, ზუსტად ისე, როგორც ბიჭს სურს. რგოლი თბილ და იმედისმომცემ ტონალობაშია გადაწყვეტილი და მიზნად ისახავს AI-ს წარმოჩენას დამხმარე პარტნიორად და არა ცივ, აბსტრაქტულ ძალად – სწორედ ამ უკანასკნელის ეშინიათ ხშირად ChatGPT-ის მომხმარებლებს.
Amazon
კრის ჰემსვორთი Amazon-ის რეკლამის მთავარი გმირია. ის პანიკაშია იმის გამო, თუ რამდენად განვითარდა Alexa. მსახიობი დარწმუნებულია, რომ ხელოვნურ ინტელექტს მისი მოკვლა შეუძლია. სანამ „შურისმაძიებლების“ ვარსკვლავი დრამატულად ემზადება ყველაზე ცუდი სცენარისთვის და დათვთან საბრძოლველადაც კი ემზადება, Alexa მშვიდად არწმუნებს მას, რომ არანაირი ბოროტი ზრახვა არ აქვს.
Rippling
HR-ტექნოლოგიების კომპანია Rippling-მა ისარგებლა The Chair Company-ის წარმატებით და 30-წამიან რგოლში კომიკოსი ტიმ რობინსონი მიიწვია. რეკლამაში ის აღმოაჩენს, რომ ხელფასი ჯერ კიდევ არ ჩარიცხვია, მისი კომპანია კი გაურკვევლად ჟონგლირებს მრავალ გლობალურ სახელფასო პლატფორმას შორის.
Base44
კომპანიამ მარტივი და პირდაპირი გზა აირჩია. ვიდეორგოლში ნაჩვენებია ოფისის თანამშრომლები, რომლებიც გაოცებულები უყურებენ, როგორ წერს AI-პროგრამა მთლიან აპლიკაციას მოთხოვნის შესაბამისად. გზავნილი ნათელია: შექმენი აპლიკაცია ღილაკზე ერთი თითის დაჭერით. მუშაობს თუ არა პროგრამა რეალურად ისე, როგორც რეკლამაშია და აქვს თუ არა მას უსაფრთხოების პრობლემები, ეს ცალკე საკითხია, თუმცა რეკლამა ამ დეტალებზე არ ამახვილებს ყურადღებას.
T-Mobile
Backstreet Boys დაბრუნდა! T-Mobile-თან თანამშრომლობით, ჯგუფი თაიმს სკვერზე მდებარე მაღაზიაში გამოჩნდა, რათა მომხმარებლებისთვის ემღერა და დაერწმუნებინა ისინი მობილური ოპერატორის შეცვლაში.
Ritz
მსახიობები ჯონ ჰემი და ბოუენ იანგი Ritz-ის კრეკერების რეკლამაში მონაწილეობენ. სიუჟეტი სიტყვების თამაშზეა აგებული – ისინი არიან “Salty” მდგომარეობაში (რაც ინგლისურად ნიშნავს როგორც მარილიანს, ისე გაბრაზებულს) იმის გამო, რომ კუნძულზე გამართულ გრანდიოზულ წვეულებაზე არ დაპატიჟეს.
State Farm
სადაზღვევო კომპანიამ დენი მაკბრაიდი და კიგან-მაიკლ კი დაიქირავა, რათა ბონ ჯოვის ჰიტის, Livin’ on a Prayer-ის პაროდია შეექმნათ. ისინი მღერიან როგორც „სხვა“ სადაზღვევო აგენტები, რომლებიც თითქმის არაფერს ანაზღაურებენ.
Instacart
მომღერალი ბენსონ ბუნი და მსახიობი ბენ სტილერი 80-იანების მუსიკოსების ამპლუას ირგებენ და ბანანების გაყიდვას ცდილობენ. სტილერი ყველანაირად ცდილობს, არ ჩამორჩეს ბუნის აკრობატულ ილეთებს, რაც რგოლს განსაკუთრებულ იუმორს მატებს.
Squarespace
ემა სტოუნი დრამატულ პერფორმანსს დგამს იმის გამო, რომ ყველა კარგი დომენის სახელი უკვე დაკავებულია. Squarespace-მა მსახიობის ნიჭი გამოიყენა იმ პრობლემის საჩვენებლად, რომელიც ვებგვერდის შექმნისას ბევრს აწუხებს.
Pepsi
წლების განმავლობაში პოლარული დათვები Coca-Cola-ს სავიზიტო ბარათი იყო, მაგრამ 2026 წლის სუპერთასზე Pepsi-მ ისინი „მოიპარა“. ჭკვიანურ და პროვოკაციულ რეკლამაში დათვები ძველ ჩვევას ღალატობენ და Pepsi-ს მოყვარულები ხდებიან.
Nerds Gummy Clusters
შოუმენი ენდი კოენი Nerds-ის კანფეტების რეკლამაში წითელ ხალიჩაზე ჩნდება და ჩვეული ენერგიით უწევს პრომოუშენს ტკბილეულს.
Pokémon
იაპონურმა ბრენდმა სუპერთასისთვის ნამდვილი ვარსკვლავთცვენა მოაწყო. Pokémon-ის რეკლამაში მონაწილეობენ ლედი გაგა, ტრევორ ნოა და ფეხბურთელი ლამინ იამალი.
Dunkin’
Dunkin’-მა გადაწყვიტა, ფილმი Good Will Hunting სიტკომად გადაექცია. სახალისო რეკლამაში მონაწილეობენ ჯეისონ ალექსანდერი და მეტ ლებლანი.
Novartis
ფარმაცევტულმა კომპანია Novartis-მა ამერიკული ფეხბურთის პოზიციის, Tight end-ის გარშემო ააგო სიტყვების თამაში. რგოლში ცნობილი სპორტსმენები, ჯორჯ კიტლი და რობ გრონკოვსკი მონაწილეობენ და პროსტატის კიბოს სკრინინგის სისხლის ანალიზით ჩატარების შესაძლებლობაზე საუბრობენ.
წყარო: Mashable
