ტექნოლოგიური სამყარო მუდმივად ვითარდება და ცვლილებას განიცდის, ხოლო მის ცენტრში დგანან ადამიანები, რომლებსაც აქვთ უნარი არა მხოლოდ აჰყვნენ ამ ცვლილებებს, არამედ აქტიურად შეუწყონ ხელი ინოვაციას. სანდრო გამრეკელაშვილი სწორედ ასეთი პროფესიონალია, რომელმაც სპორტიდან ტექნოლოგიების სამყაროში გადაინაცვლა და დღეს წარმატებით უძღვება ფრონტ-ენდის გუნდს Talkpal AI-ში. AI-პლატფორმა Talkpal-ის წარმატებების შესახებ ცოტა ხნის წინ გესაუბრეთ. მოკლე დროში ქართულმა სტარტაპმა შთამბეჭდავი შედეგები აჩვენა – მომხმარებელთა რაოდენობა რამდენიმე ასეული ათასიდან 3 მილიონზე მეტამდე გაიზარდა. ყოველთვიურად Talkpal-ს დაახლოებით 400,000 ახალი მომხმარებელი უერთდება.
სანდროს პროფესიული მოგზაურობა დაიწყო სკოლის წლებში, როდესაც გააცნობიერა, რომ პროგრამირება არის ძლიერი ინსტრუმენტი იდეების რეალობად გარდასაქმნელად. სპორტმა მას შესძინა უნარები, რომლებიც დღეს ტექნოლოგიურ სფეროში ეხმარება – სწრაფი ანალიზის, კრიტიკული აზროვნებისა და სტრესულ სიტუაციებში გადაწყვეტილებების მიღების უნარები. მისი პროფესიული გზა მოიცავდა მუშაობას ვებგვერდებზე, მობილურ აპლიკაციებსა და რობოტების დეველოპმენტზე, სანამ საბოლოოდ ფრონტ-ენდ დეველოპმენტს მიაგნებდა როგორც მისთვის ყველაზე საინტერესო მიმართულებას. დღეს, როგორც Talkpal AI-ის Front-end Team Lead-ი, ის განსაზღვრავს ფრონტ-ენდის არქიტექტურას, ნერგავს საუკეთესო პრაქტიკებს, უძღვება გუნდს და მონაწილეობს პროექტის დაგეგმვის პროცესებში. სანდროს იზიდავს ხელოვნური ინტელექტის სფერო და მისი პოტენციალი, განსაკუთრებით კი შთაგონებულია ამ ტექნოლოგიის გამოყენებით განათლების მიმართულებით. სამომავლოდ, სანდრო გეგმავს კიდევ უფრო გაიღრმაოს ცოდნა ხელოვნური ინტელექტის გამოყენების შესაძლებლობებზე ფრონტ-ენდ დეველოპმენტში და აქტიურად ჩაერთოს ქართული ტექნოლოგიური ეკოსისტემის განვითარებაში.
„პროგრამირებისადმი ინტერესი სკოლის პერიოდში გამიჩნდა. პირველი შეხებისთანავე მივხვდი, რომ პროგრამირება არის ის ძლიერი ინსტრუმენტი, რომელიც იდეების რეალობად გარდაქმნის საშუალებას იძლევა. საინტერესოა, რომ სანამ სრულად პროგრამირებაზე გადავერთვებოდი, აქტიურად ვიყავი ჩართული სპორტში. ახლა ვხვდები, რომ სწორედ სპორტმა შემძინა უნარები, რომლებიც დღეს ტექნოლოგიურ სფეროში ძალიან მეხმარება – სწრაფი ანალიზის უნარი, კრიტიკული აზროვნება და სტრესულ სიტუაციებში გადაწყვეტილებების ეფექტურად მიღების შესაძლებლობა.
ჩემი პროფესიული გზა რამდენიმე პროგრამული ენის საფუძვლების შესწავლით დაიწყო, რის შემდეგაც სხვადასხვა პროექტებზე მუშაობის შესაძლებლობა მომეცა. ვმუშაობდი როგორც ვებგვერდებზე, ასევე მობილურ აპლიკაციებსა და რობოტების დეველოპმენტზე. სწორედ ამ მრავალფეროვანი გამოცდილების მიღების პროცესში მოვახერხე იმის გარკვევა, თუ რომელი მიმართულება იყო ჩემთვის ყველაზე საინტერესო და მიმზიდველი. ასე აღმოვჩნდი ფრონტ-ენდ დეველოპმენტის სფეროში.
ახალი პროფესიული შესაძლებლობების ძიებისას შემთხვევით წავაწყდი ინფორმაციას Talkpal AI-ის შესახებ. კომპანიის ხედვამ და მისიამ გაცნობისთანავე ძალიან დამაინტერესა. განსაკუთრებით მიმზიდველი ორი ფაქტორი აღმოჩნდა: პირველი – ხელოვნური ინტელექტის სფერო და მისი უზარმაზარი პოტენციალი, მეორე – ამ ინოვაციური ტექნოლოგიის გამოყენება განათლების მიმართულებით. აზრი, რომ შემეძლო ჩემი წვლილი შემეტანა ისეთი პროდუქტის შექმნაში, რომელიც AI-ის მეშვეობით ადამიანებს ენის შესწავლაში ეხმარება, ძალიან მნიშვნელოვანი და შთამაგონებელი აღმოჩნდა ჩემთვის. თუმცა, პროდუქტის ხედვის გარდა, არანაკლებ მნიშვნელოვანი იყო სტარტაპის გარემო. მომწონს დინამიკური, სწრაფად ცვალებადი სამუშაო ატმოსფერო, სადაც უშუალოდ შეგიძლია დაინახო შენი მუშაობის შედეგი და მონაწილეობდე რაღაც ახლის, მნიშვნელოვნის შექმნაში.
ჩემი როლი Talkpal AI-ში საკმაოდ მრავალფეროვანია და სცილდება მხოლოდ კოდის წერას. ვხელმძღვანელობ ფრონტ-ენდის გუნდს, ვზრუნავ მათ განვითარებასა და მხარდაჭერაზე. ჩემი მოვალეობაა ფრონტ-ენდის არქიტექტურისა და ტექნიკური მიმართულების განსაზღვრა, ასევე საუკეთესო პრაქტიკების დანერგვა კომპანიაში. დიდ ყურადღებას ვაქცევ კოდის ხარისხის უზრუნველყოფას და რეგულარულად ვახორციელებ კოდის მიმოხილვას. ასევე, ჩართული ვარ პროექტის დაგეგმვისა და შესრულების მართვის პროცესებში. რა თქმა უნდა, პარალელურად აქტიურად ვმონაწილეობ დეველოპმენტის პროცესშიც, განსაკუთრებით რთული ამოცანების გადაჭრასა და ახალი ტექნოლოგიების დანერგვაში. ეს სამუშაო ჩემთვის უაღრესად საინტერესოა, რადგან მაძლევს შესაძლებლობას, განვვითარდე როგორც ტექნიკურად, ისე ლიდერის უნარების კუთხით. ასევე, ძალიან საინტერესოა გუნდთან ერთად მუშაობა, ერთმანეთისგან სწავლა და საერთო მიზნისთვის ძალისხმევა – შევქმნათ მსოფლიოში მოწინავე, ხელოვნურ ინტელექტზე დაფუძნებული ენის შემსწავლელი პლატფორმა.
Talkpal AI-ის სამუშაო კულტურა ძალიან დინამიკური და კოლაბორაციულია. ჩვენ ვმუშაობთ გარემოში, სადაც ყველა თანამშრომელი ორიენტირებულია საერთო მიზანზე – შევქმნათ ბაზარზე საუკეთესო AI Language Learning პლატფორმა უახლესი ტექნოლოგიების დანერგვით. კომპანიაში ჩამოყალიბებული სამუშაო კულტურა ხელს უწყობს იდეების თავისუფლად გაზიარებასა და სწრაფ ექსპერიმენტებს სხვადასხვა მიმართულებით. ჩვენი გუნდი შედგება ძალიან მოტივირებული, ნიჭიერი და ერთმანეთის მხარდამჭერი ადამიანებისგან. ერთად ვუმკლავდებით გამოწვევებს და ერთად ვიზრდებით. სამუშაო გარემოში ყოველთვის პოზიტიური და პროდუქტიული ატმოსფეროა, რაც განვითარებისთვის აუცილებელ პირობას ქმნის.
თუ ვისაუბრებთ იმაზე, რაც Talkpal AI-ს გამოარჩევს სხვა კომპანიებისგან, სადაც მქონია მუშაობის გამოცდილება, რამდენიმე მნიშვნელოვან ასპექტს გამოვყოფდი. პირველ რიგში, ეს არის გუნდის წევრებს შორის არსებული განსაკუთრებული სიახლოვე და საერთო მიზნისთვის ერთობლივი ძალისხმევა, რაც მჭიდრო პროფესიულ კავშირებს აყალიბებს. ჩვენს გუნდში მაღალია პროფესიონალიზმი და საქმისადმი სიყვარული, რაც უდიდეს როლს თამაშობს როგორც განვითარების სურვილის გაღვივებაში, ისე საუკეთესო სამუშაო გარემოს შექმნაში. მეორე მნიშვნელოვანი ფაქტორია ის ენერგია და სისწრაფე, რომელიც კომპანიაში იგრძნობა. ეს გაძლევს შესაძლებლობას, თავადაც აჰყვე ამ ტემპს და მეტი პასუხისმგებლობა აიღო საკუთარ თავზე. მესამე გამორჩეული ასპექტი კი ცოდნის აქტიური გაზიარება და გამჭვირვალობაა. როდესაც რაიმე ცვლილება ხდება, იქნება ეს დეველოპმენტში თუ სხვა მიმართულებით, ყოველთვის ხდება განხილვა და დასაბუთება, თუ რატომ განხორციელდა ეს ცვლილება ან რამ განაპირობა ის.
ტექნოლოგიური სფერო მართლაც ძალიან სწრაფად იცვლება და პროფესიონალიზმის შესანარჩუნებლად უწყვეტი სწავლა აუცილებელია. თვითგანვითარებისთვის მე რამდენიმე მიდგომას ვიყენებ. პირველ რიგში, აქტიურად ვეცნობი ახალ ტექნოლოგიებსა და განახლებებს სანდო ტექნიკური ბლოგების, სტატიებისა და ოფიციალური დოკუმენტაციის საშუალებით. ასევე, ვცდილობ მივიღო მონაწილეობა ინდუსტრიის მნიშვნელოვან ღონისძიებებში – დავესწრო კონფერენციებსა და ვებინარებს, სადაც საუკეთესო პრაქტიკების გაზიარება ხდება. განსაკუთრებულ მნიშვნელობას ვანიჭებ ახალი ტექნოლოგიების პრაქტიკაში გამოცდას – მხოლოდ ასე შეიძლება რეალურად შეაფასო მათი ეფექტურობა და გამოყენების შესაძლებლობები. ასევე დიდ მნიშვნელობას ვანიჭებ ცოდნის გაზიარებას როგორც გუნდის შიგნით, ისე მის გარეთ – ერთმანეთისგან ძალიან ბევრს ვსწავლობთ. ამჟამად, ჩემი ძირითადი ფოკუსი კვლავ ფრონტ-ენდ ტექნოლოგიებზეა, თუმცა მუდმივად ვაკვირდები ინდუსტრიაში მიმდინარე ცვლილებებს, რათა არ ჩამოვრჩე განვითარებას და კონკურენტუნარიანი დავრჩე ამ სწრაფად ცვალებად გარემოში.
პროფესიული თვალსაზრისით, ჩემს განვითარებას ვხედავ ლიდერობისა და ტექნიკური დონის დახვეწაში. მსურს გავაფართოო ჩემი ცოდნა ფრონტ-ენდის არქიტექტურის და გუნდის ეფექტური მართვის მიმართულებით. განსაკუთრებით მაინტერესებს, როგორ შეიძლება ტექნოლოგიური გადაწყვეტილებები უფრო მჭიდროდ დავაკავშირო ბიზნესის მიზნებთან და პროდუქტის საერთო ხედვასთან. სამომავლოდ მიზნად მაქვს დასახული, კიდევ უფრო მეტად ჩავუღრმავდე ხელოვნური ინტელექტის გამოყენების შესაძლებლობებს ფრონტ-ენდ დეველოპმენტში და შევისწავლო, როგორ შეიძლება ეს ტექნოლოგია დაეხმაროს მომხმარებლებს უკეთესი გამოცდილების მიღებაში. ასევე, მინდა უფრო აქტიურად ჩავერთო პროფესიულ საზოგადოებაში, გავუზიარო ჩემი გამოცდილება სხვებს და ამით ხელი შევუწყო ქართული ტექნოლოგიური ეკოსისტემის განვითარებას.“
[R]
