ხშირად ყველაზე მასშტაბური ტექნოლოგიური რევოლუციები სრულიად მარტივი, ადამიანური საჭიროებებიდან და პირადი ბარიერების გადალახვის სურვილიდან იწყება. უცხო ენის შესწავლა ხომ ბევრი ჩვენგანისთვის უდიდეს ძალისხმევასთან, დროის კარგვასთან და იმ კომპლექსებთან ასოცირდება, რომლებიც საუბრის დაწყებისას გვბოჭავს. სწორედ ეს ნაცნობი გამოცდილება და ტრადიციული საგანმანათლებლო მეთოდების ერთფეროვნება იქცა შთაგონების მთავარ წყაროდ იმისთვის, რომ ენების ათვისების პროცესი გლობალურად და შეუქცევადად შეცვლილიყო.
ასე შეიქმნა Talkpal – ხელოვნურ ინტელექტზე დაფუძნებული ენის სასწავლო პლატფორმა, რომელმაც კლასიკური მიდგომები სრულიად ახალ ეტაპზე აიყვანა. დღეს სტარტაპი უკვე მსოფლიოს 180-ზე მეტ ქვეყანაში 10 მილიონზე მეტ მომხმარებელს 130-ზე მეტი ენის ინდივიდუალურ ათვისებაში ეხმარება, როგორც ვებსივრცეში, ისე მობილურ პლატფორმებზე. Talkpal-მა დაამტკიცა, რომ სწორი ხედვითა და მოქნილი სისტემების ინჟინერიით შესაძლებელია ისეთი პროდუქტის შექმნა, რომელიც გლობალურ ციფრულ ბაზარს დაიპყრობს.
თუმცა, როგორ მუშაობს ეს გიგანტური ტექნოლოგიური მექანიზმი შიგნიდან? როგორ ახერხებს პლატფორმა, რომ მკაცრად გაწერილი ალგორითმების მიღმა პროდუქტი მაქსიმალურად „ადამიანური“, ცოცხალი და მომხმარებლისთვის კომფორტული იყოს? Talkpal-ის კულტურაზე, ხელოვნურ ინტელექტთან მუშაობის შემოქმედებით აზარტსა და ტექნოლოგიურ კულუარებზე პლატფორმის ხარისხის უზრუნველყოფის (QA) სპეციალისტი, ელენე ფილიშვილი გვიამბობს.
M: ელენე, საინტერესოა, რას უკავშირდება თქვენი ინტერესი ტექნოლოგიების მიმართ და როგორ დაიწყო თქვენი გზა ამ სამყაროში?
საბანკო სფეროში გატარებული რამდენიმე წლის შემდეგ, სულ უფრო ხშირად ვფიქრობდი იმაზე, რომ ეს რუტინა არ იყო ის, რაც ნამდვილად მაბედნიერებდა. ვგრძნობდი, რომ ჩემი პოტენციალი ბოლომდე არ რეალიზდებოდა და საკუთარი თავის ძიება დავიწყე. სწორედ მაშინ, როცა აქტიურად დაიწყო საუბარი მომავლის პროფესიებზე, პროგრამული უზრუნველყოფის ტესტირება აღმოვაჩინე. იმ პერიოდში საქართველოში ამ მიმართულებაზე ბევრმა არაფერი იცოდა.
ჩემი ინტერესი იმან გააღვიძა, რომ QA – Quality Assurance – არ არის შემოსაზღვრული ხარვეზების პოვნით, ის მოიცავს პროდუქტის ლოგიკის სიღრმისეულ გააზრებას, მომხმარებლის ინტერესების დაცვასა და კრიტიკულ აზროვნებას. დავიწყე ონლაინ კურსების გავლა, ინფორმაციის ძიება და დასაწყისშივე მივხვდი, რომ ვიპოვე საქმე, რომელიც შემოქმედებით თავისუფლებასა და დიდ სიამოვნებას მანიჭებდა.
M: როგორ გადახვედი საბანკო სფეროდან ასეთ დინამიკურ, გლობალურ სტარტაპში?
ტესტირების მიმართულებით პირველი ნაბიჯები ისევ საბანკო სფეროში გადავდგი. რამდენიმე ბანკში ვიმუშავე, რისთვისაც ძალიან მადლობელი ვარ, რადგან ამ გარემომ ძლიერი ბაზისი და დიდი გამოცდილება მომცა. თუმცა, დროთა განმავლობაში ვიგრძენი, რომ კორპორაციულ ჩარჩოებში ჩემი პროფესიული ზრდა შენელდა და ეს ეტაპი ამოვწურე. ვეძებდი რაღაც ახალს, დინამიკურსა და მასშტაბურს.
სწორედ ამ დროს გამოჩნდა Talkpal-ი. როდესაც გავიგე, რომ ეს იყო ქართული, მაგრამ გლობალური მასშტაბის სტარტაპი, რომელიც ხელოვნურ ინტელექტზე იყო დაფუძნებული, ძალიან დავინტერესდი. ვნახე, თუ როგორ მოახერხეს მათ უმოკლეს დროში მსოფლიო ბაზარზე ასეთი სწრაფი ზრდა. მივხვდი, რომ სტარტაპის ეს მუხტი და განვითარების ტემპი ზუსტად ეხმიანებოდა ჩემს ღირებულებებს. Talkpal-ში CV-ის გაგზავნა ჩემს ცხოვრებაში ერთ-ერთი საუკეთესო და გარდამტეხი გადაწყვეტილება აღმოჩნდა.
M: ტექნიკური თვალსაზრისით, რამ დაგაინტერესათ ყველაზე მეტად Talkpal-ის ხელოვნურ ინტელექტზე დაფუძნებული პროდუქტის მიმართულებაში?
როგორც პროგრამული უზრუნველყოფის ტესტერისთვის, ხელოვნურ ინტელექტთან შეხება სრულიად ახალი და საინტერესო პროფესიული გამოწვევა აღმოჩნდა. სტანდარტული აპლიკაციების ტესტირებისას ყველაფერი წინასწარ განსაზღვრულ, მკაცრად გაწერილ სცენარებსა და ლოგიკას მიჰყვება. AI პროდუქტის შემთხვევაში კი ჩარჩოები არ არსებობს – აქ ტესტირება ბევრად უფრო შემოქმედებით, არასტანდარტულ მიდგომებსა და კვლევით პროცესს მოითხოვს, რაც საქმეს ორმაგად საინტერესოს ხდის.
Talkpal-ი მთლიანად გარდაქმნის ენების სწავლის გამოცდილებას გლობალურ ბაზარზე. ჩემთვის უდიდესი მოტივაციაა იმის გააზრება, რომ ვმუშაობ პროდუქტზე, რომელიც ყოველდღიურად ვითარდება და რეალურ დროში ეხმარება უამრავ ადამიანს კომუნიკაციის ბარიერების გადალახვაში. ეს პასუხისმგებლობაცაა და საოცარი აზარტიც.
M: რას ნიშნავს თქვენთვის ყოველდღიურად ამ საქმის კეთება და პროდუქტის სრულყოფისას ყველაზე მეტად რა მოგწონთ?
ყოველდღიურად ამ საქმის კეთება ჩემთვის უდიდესი პრივილეგიაა. დიდი ბედნიერებაა, როცა აკეთებ იმას, რაც მთელი გულით გიყვარს, მაგრამ კიდევ უფრო დიდი ბედნიერებაა, როცა იპოვი ზუსტად იმ ადგილს, სადაც თავს რეალიზებულად გრძნობ. Talkpal-ი ჩემთვის სწორედ ასეთი ადგილი აღმოჩნდა.
პროდუქტის სრულყოფის პროცესში ყველაზე მეტად ის მომენტი მიყვარს, როდესაც რთულ ლოგიკურ ჯაჭვში დაფარულ ხარვეზს პოულობ და იცი, რომ ამით ათასობით მომხმარებელს აარიდე თავიდან დისკომფორტი. ჩვენთან ყოველი დღე განსხვავებულია, არ არსებობს ერთფეროვნება. ყოველი ახალი ფუნქციონალი საინტერესო თავსატეხია, რომლის ამოხსნაც ყოველდღიურად დიდ აზარტსა და პროფესიულ სიამოვნებას მანიჭებს.
M: სტარტაპისთვის დამახასიათებელ ამ დინამიკურ გარემოში როგორ ახერხებთ პროფესიულ ზრდას და სიახლეებთან ფეხის აწყობას?
სტარტაპის გარემო ძალიან სწრაფად ცვლადია – რაც გუშინ სიახლე იყო, დღეს უკვე ყოველდღიურობაა. ეს ტემპი მუდმივ ტონუსში გამყოფებს. პროფესიულ ზრდას ხელს უწყობს ის, რომ Talkpal-ში არ გვაქვს შიში სიახლეების ან შეცდომების მიმართ. ახალ ტექნოლოგიებსა და მეთოდოლოგიებს პირდაპირ პროცესში, პრაქტიკით ვსწავლობთ. გარდა ამისა, გუნდში ერთმანეთს მუდმივად ვუზიარებთ სიახლეებს, ვმსჯელობთ და ვცდილობთ, ყოველთვის ფეხი ავუწყოთ გლობალურ ტენდენციებს.
M: როგორ აღწერდით Talkpal-ის შიდა კულტურას და მის გუნდურ გარემოს, რომელიც ამ ტემპს უძლებს?
Talkpal-ის შიდა კულტურა ზუსტად ისაა, რაზეც უამრავი პროფესიონალი ოცნებობს. აქ არ არსებობს ხაზგასმული იერარქიები და ბიუროკრატია, ყველას აზრი თანაბრად მნიშვნელოვანია. ჩვენთან საოცარი სინერგიაა; ვმუშაობთ ეკოსისტემაში, სადაც ყოველი ჩვენგანი ერთი საერთო, დიდი მიზნითაა გაერთიანებული: შევქმნათ მსოფლიოში საუკეთესო AI Language Learning პლატფორმა. გუნდში ვგრძნობთ საოცარ მხარდაჭერას, ღიაობასა და ნდობას. როდესაც გარშემო ასეთი ნიჭიერი, მოტივირებული და პოზიტიური ადამიანები გყავს, მუშაობა კი არ გეზარება, არამედ პირიქით, გსურს, შენი მაქსიმუმი გაიღო.
M: როგორ ხედავთ თქვენს სამომავლო განვითარებას და რა იქნება თქვენთვის მომდევნო საინტერესო ნაბიჯი ამ გუნდთან ერთად?
ჩემს სამომავლო განვითარებას სრულიად Talkpal-ს ვუკავშირებ, რადგან ეს კომპანია ჩემთვის მუდმივი განვითარებისა და ექსპერიმენტების სივრცეა. პროდუქტი საოცარი სისწრაფით იზრდება, მასთან ერთად იზრდება ჩვენი QA გუნდის მასშტაბები და პასუხისმგებლობებიც.
ჩემთვის მომდევნო საინტერესო ნაბიჯი იქნება კიდევ უფრო მეტად გამოვცადო საკუთარი შესაძლებლობები, ღრმად შევისწავლო რთული ტექნიკური დეტალები და ავითვისო ახალი AI ინსტრუმენტები. ამ ცოდნით მსურს აქტიური მონაწილეობა მივიღო ტესტირების პროცესების ავტომატიზაციაში, ახალი QA სტრატეგიების დანერგვასა და გუნდის გაფართოებაში. Talkpal-ი მაძლევს უნიკალურ შანსს, რომ ყოველი სამუშაო დღე ახალი ტენდენციების ათვისების პროცესად ვაქციო. მინდა, როდესაც Talkpal-ი მსოფლიოში N1 პლატფორმა გახდება, მეც ჩემი მნიშვნელოვანი წვლილი მქონდეს შეტანილი ამ გლობალურ წარმატებაში და ჩვენი მომხმარებლების საუკეთესო გამოცდილებაში.
