in

ინფლუენს მარკეტინგი ჯანმრთელობის სფეროში – ტატიანა გვენეტაძე

მას შემდეგ, რაც სოციალურმა მედიამ ჩვენი ცხოვრების დიდი ნაწილი დაიკავა, ინფლუენს მარკეტინგიც გაჩნდა. ხოლო მას მერე, რაც დიდი საშიშროების წინაშე დადგა ჩვენი ჯანმრთელობა და სიცოცხლე (პანდემიური რეალობა), ექიმებს ახალი სუნთქვა გაეხსნათ და ინფლუენსერობაც შეითავსეს. ინფლუენსერი ექიმები არიან ავტორიტეტული სპეციალისტები ან სწორედ სოციალურ მედიაში აქტივობით ხდებიან ცნობადები და ავტორიტეტულები. ჯანმრთელობის საკითხების მიმართ აუდიტორია და ინტერესი ცხადია, სულ იყო და იქნება. სამედიცინო სფეროს წარმომადგენლები სხვადასხვა მედია ინსტრუმენტით, გარკვეული დოზით, აწვდიდნენ ინფორმაციას ამ აუდიტორიას, თუმცა, პანდემიის რეალობაში გაძლიერდა შფოთვა, შფოთვამ კი თითოეული ჩვენგანი ყველაზე ცნობისმოყვარე ჟურნალისტებად გვაქცია უამრავი შეკითხვით.

შედეგად გვაქვს ის, რომ ბევრი საინტერესო ექიმი გამოჩნდა და პოზიციონირდა. მათ პოპულარობაზე ბევრი რამ ახდენს გავლენას, ინფორმაციაზე მოთხოვნა, ექიმების იმიჯი, რეპუტაცია, ცოდნა, თემების აქტუალობა, რაც პირდაპირ კავშირშია მათი ცნობადობის ზრდასთან.

ინფლუენსერებადქცეული ექიმების და მათი კონტენტის დადებით მხარედ შეგვიძლია იმ კითხვებზე სწრაფი რეაგირება აღვიქვათ, რომლებიც პანდემიის პირობებში იბადება. თანაც, აუდიტორია ამ კითხვებზე საკმაოდ ვრცელ პასუხებს იღებს მათი მხრიდან.  თუმცა, საყურადღებოა შემდეგი:  ვინ გვცემს პასუხს, ანუ – ექიმის კომპეტენცია და იმ პასუხისმგებლობის გააზრება, რაც ჯანმრთელობის საკითხებზე საუბრისას ძალიან მნიშვნელოვანია. ჯანმრთელობის შესახებ რეკომენდაციები სოციალურ სივრცეებში დიდ და ღრმა გააზრებას საჭიროებს, აქ თითოეულ სიტყვას დიდი მნიშვნელობა აქვს.  გადაჭრით საუბარი ამა თუ იმ საკითხზე არ არის სასურველი. საზოგადოება მიღებულ ინფორმაციაზე სხვადასხვა ქცევითი გამოხატულებით რეაგირებს, ერთნი იმდენად დარწმუნდებიან და შეისწავლიან საკითხს (დაიჯერებენ, რომ იციან საფუძვლიანად, და შემდეგ სხვებსაც მისცემენ, ცხადია მათივე ინტერპრეტირებით რჩევებს, რამაც კარგ ამბამდე შეიძლება არ მიგვიყვანოს). მეორენი მყისიერად გადადიან რეკომენდაციების შესრულებაზე. მაგალითად, სხვადასხვა დიაგნოსტიკური კვლევის არამიზნობრივ ჩატარებაზე, რაც, ხშირ შემთხვევაში, დამაზიანებელია.

ამიტომაც, ჯანმრთელობის სფეროში ინფლუენს მარკეტინგის რისკად შეიძლება მოვიაზროთ ზოგჯერ სწორი ინფორმაციის არასწორი ფორმით მიწოდება და ამ ინფორმაციის მაღალი ინტენსივობით გამოწვეული უკურეაქცია საზოგადოების მხრიდან. დიდი დოზით ყველაფერი ხომ ტოქსიკურია. ასევე, რისკია ზოგადად ექიმების იმიჯი და რეპუტაციის საკითხი, იმ სამწუხარო ტენდენციის გათვალისწინებით, რაც უკანასკნელ წლებში ჩვენს ქვეყანაში შესამჩნევია. რაც შეეხება კონტენტის გაფილტვრას, მარტივად რომ ვთქვათ, ჩვენ თავად უნდა დავიცვათ თავი და გავიაზროთ ის, რომ მოწოდებული ინფორმაცია არ არის უნივერსალური.

მნიშვნელოვანია გავიაზროთ:

  • ყველაფერი, რაზეც საუბრობენ სხვადასხვა დაავადებაზე, ყველას ერთნაირად არ გვაქვს;
  • როდესაც საუბრობენ აუცილებელ ძვირადღირებულ ინსტრუმენტულ გამოკვლევებზე, ამის საჭიროებას და აუცილებლობას განსაზღვრავს შესაბამისი კომპეტენციის ექიმი;
  • ყველაფერი არც ექიმმა იცის და არც – მედიცინამ;
  • ადამიანის ორგანიზმი არის უნიკალური და მის ჯანმრთელობას უნდა მივუდგეთ ინდივიდუალურად;
  • შესაძლებელია ბევრი ინფორმაციის გამო გადავდოთ ან უარი ვთქვათ სპეციალისტთან ვიზიტზე, რასაც ცხადია უარყოფითი შედეგები შეიძლება მოყვეს.

აქვე გავაზიარებ რჩევებს, რომელიც ჯანმრთელობის სფეროში მყოფ ინფლუენსერებს ან ინფლუენსერობის მსურველებს გამოადგებათ:

  • ისაუბრეთ მხოლოდ გადამოწმებული ინფორმაციებით, ზუსტ და ავტორიტეტულ წყაროებზე არსებული სტატისტიკებით და რეკომენდაციებით;
  • ისაუბრეთ მარტივ ენაზე  და ინფორმაციის მიწოდების დროს ხაზგასმით აღნიშნეთ, რომ ზოგადი რჩევები მნიშვნელოვანია, თუმცა ეს არ გამორიცხავს ექიმთან ვიზიტს;
  • მსმენელი ძალიან მგრძნობიარეა და ყოველთვის გრძნობს, როდის აჭარბებს საკუთარი თავის ბრენდინგის გამოკვეთილ სურვილები იმ საკითხების რაოდენობას რაზეც საუბრობთ;
  • ექიმების იმიჯს მაქსიმალურად გავუფრთხილდეთ არ დაგვავიწყდეს, რომ ექიმებს ყველაზე დიდი და რთული პასუხისმგებლობა არგუნა სამყარომ სადაც არცერთი შეცდომა არ ეპატიება,არც პრაქტიკაში და ახლა უკვე არც სოციალურ სივრცეში. 

AliExpress საფეხბურთო კლუბ „ლიონის“ სპონსორი გახდა

Super Mario-ს თამაში აუქციონზე 660 000 დოლარად გაიყიდა!