მუსიკალური ინდუსტრიის ფერთა პალიტრაში ჯერ ბარბის ვარდისფერი გამეფდა, შემდეგ კი მწვანე. ამჯერად, ტეილორ სვიფტის ახალი ალბომის “The Life of a Showgirl” გამოსვლასთან ერთად, ნარინჯისფერ-ცისფერი კომბინაცია მსოფლიოს ახალ მოდურ ტენდენციად იქცევა.
სვიფტის მე-12 სტუდიური ალბომი, რომელიც ფანებში TS12-ის სახელით არის ცნობილი, მხოლოდ 3 ოქტომბერს გამოვა, თუმცა მისმა ესთეტიკამ უკვე იქონია გავლენა სხვადასხვა ბრენდის მარკეტინგულ აქტივობებზე. გამოცხადებიდან სულ რაღაც ერთ კვირაში, ემპაირ სტეიტ ბილდინგი ნარინჯისფრად განათდა, McLaren-მა სოციალურ ქსელში ხაზი გაუსვა თავისი ავტომობილების ფერის მსგავსებას სვიფტის ახალ სტილთან, ხოლო Duolingo-ს ბუ და Scrubdaddy-ის ღრუბელი ბრჭყვიალა იმიჯით წარდგნენ საზოგადოების წინაშე. Dunkin’, Shake Shack, United და Olipop-მაც Instagram-ზე პოსტები ფერთა ახალი პალიტრით გააფორმეს.
სოციალური მედიის ანალიტიკური პლატფორმა Meltwater-ის მონაცემებით, მას შემდეგ, რაც სვიფტმა თავისი პროექტი პარტნიორის, ტრევის კელსის “New Heights” პოდკასტში წარადგინა, ბრენდებმა 2,600-ზე მეტი შესაბამისი პოსტი გამოაქვეყნეს Instagram-სა და X-ზე. ამ კონტენტმა ჯამში დაახლოებით 20 მილიონიანი აუდიტორია მოიცვა, თუმცა პოტენციური აუდიტორია 600 მილიონამდე აღწევს, რაც მიუთითებს, რომ TS-12 ნარინჯისფერი ტალღა მხოლოდ ახლა იწყებს განვითარებას.
საინტერესოა, რომ წარმატებული ბრენდები არ შემოიფარგლებიან მხოლოდ ლოგოს ფერის შეცვლით – ისინი უფრო ღრმად ინტეგრირდებიან Swifties-ის კულტურაში, რითაც ჩვეულებრივ მარკეტინგულ სვლას უფრო მნიშვნელოვან კულტურულ მოვლენად აქცევენ.
Panera-მ ოპერატიულად აიტაცა მომენტი, როდესაც სვიფტმა პოდკასტში ახსენა, რომ „მჟავე ცომი“ მის ცხოვრებაში მნიშვნელოვან როლს თამაშობს. ბრენდმა და მისმა სააგენტომ 72andSunny New York-მა 16 საათში შექმნეს სპეციალური შეთავაზება სახელწოდებით “Loaf Story” და სვიტშირტები წარწერით “In My Sourdough Era”. კომპანიის მარკეტინგის დირექტორის, მარკ შამბურას თქმით, ეს იყო იდეალური შესაძლებლობა, დაეკავშირებინათ თავიანთი პროდუქტი იმ ისტორიასთან, რომელზეც სვიფტი საუბრობდა. კამპანიის შედეგად, 72 საათში 500 მილიონზე მეტი impression და 550,000-ზე მეტი ორგანული ნახვა დაფიქსირდა, ხოლო მერჩი სამ საათში გაიყიდა.
Reese’s, რომელიც კელსის ძმების პოდკასტის ოფიციალური პარტნიორია, ასევე სწრაფად გამოეხმაურა მოვლენას 15-წამიანი რეკლამით, რომელიც ეპიზოდის გასვლიდან 24 საათში შეიქმნა. კამპანია “You Asked For It” ხაზს უსვამდა მსგავსებას ბრენდის სიგნატურა ნარინჯისფერსა და სვიფტის ახალ ესთეტიკას შორის, ამასთან რეკლამა უკეთდებოდა Reese’s-Oreo კოლაბორაციას. The Hershey Company-ის მედიისა და მარკეტინგის ტექნოლოგიების ვიცე-პრეზიდენტის, ვინი რინალდის თქმით, გადაწყვეტილება კამპანიის შესახებ პოდკასტის ეპიზოდის გასვლიდან წუთებში მიიღეს. ბრენდმა სპეციალურად შეარჩია პლატფორმები, სადაც New Heights-ის აუდიტორია აქტიურობს. შედეგად, Reese’s-ის კონტენტმა TikTok-ზე უსწრაფესად მოაგროვა 500,000-ზე მეტი ნახვა. რინალდი აღნიშნავს, რომ ამგვარი კამპანიების ღირებულება მათ ხანგრძლივობაშია, რადგან Swifties-ებს აქვთ ღრმა ბრენდის ერთგულება და კარგი მეხსიერება. როდესაც ბრენდი მათი კულტურის ნამდვილ გაგებას აჩვენებს, ეს ურთიერთობა სცდება ერთჯერად კამპანიას.
ფაქტია, ფანები ადვილად ამოიცნობენ ბრენდებს, რომლებიც მხოლოდ ყურადღების მოსაპოვებლად იყენებენ ტრენდს. წარმატებული რეაქციული მარკეტინგი არა ყველა ტრენდის გამოყენებას, არამედ სწორ მომენტებში მონაწილეობას გულისხმობს. ბრენდები, რომლებიც თავს არიდებენ ზედაპირულ მიდგომას და ინარჩუნებენ მეთოდურობას, გრძელვადიან კონკურენტულ უპირატესობას იღებენ.
ბრენდები ნარინჯისფერი კონტენტის გამოქვეყნებას ესწრაფვიან, რაც ნიშნავს, რომ სვიფტი და მისი მენეჯმენტის გუნდი, Taylor Nation, ფანებზე ორიენტირებული მარკეტინგის შესანიშნავ მაგალითს აჩვენებენ – ისინი ნელ-ნელა ამჟღავნებენ ალბომის ელემენტებს, რომლებიც ჩამალულია კონცერტებში, ინტერვიუებსა და სოციალურ პოსტებში. ეს მიდგომა მარკეტინგის დირექტორებისთვის შთაგონების წყაროა, რომლებმაც აქტიურად უნდა იბრძოლონ, რომ თავიანთი ადგილი დაიმკვიდრონ სვიფტის ფენომენის მომდევნო თავში.
წყარო: Adweek
