in

UX დიზაინი, როგორც მომხმარებლის პულსის კონტროლი – თიბისი Global Finance-ის რჩეულია!

UX, იგივე user experience, ანუ მომხმარებლის გამოცდილება ის ტერმინებია, რომლებიც ყოველდღე გვხვდება და უკვე ყველა მცოდნემ თუ არამცოდნემ დილეტანტის დონეზე მაინც იცის, რას ნიშნავს ის და როგორი მნიშვნელოვანია. ჩვენც, Marketer-ში ამ თემის სხვადასხვაგვარ გაშლას ხშირად გთავაზობთ.

მომხმარებლის გამოცდილება არის ერთგვარი კონცეფცია, რომელსაც აქვს მრავალი განზომილება და ის მოიცავს სხვადასხვა დისციპლინას, როგორებიცაა: ინტერაქციის დიზაინი, ინფორმაციის არქიტექტურა, ვიზუალური დიზაინი, გამოყენებადობა და ადამიანისა და კომპიუტერის ურთიერთქმედება. ბიზნესში UX დიზაინის მიზანია, გააუმჯობესოს მომხმარებელთა კმაყოფილება და ლოიალობა; თავისი მოქნილობითა და დახვეწილობით, მომხმარებელს მიანიჭოს როგორც პრაქტიკული, ისე ესთეტიკური სიამოვნება. 

სწორედ ამ მიზეზების გამო, ბრენდები მუდამ ცდილობენ, მომხმარებელთან ახლო კონტაქტში იყვნენ, იცოდნენ მათი სურვილები და მოარგონ თავიანთი პროდუქტები ამ სურვილებს. თიბისი ის ბრენდია, რომელიც 24/7-ზე უთმობს დროს მომხმარებელს, მის უკეთეს გამოცდილებას. ახლახან თიბისიმ Global Finance-ის დაჯილდოებაზე რამდენიმე ჯილდო აიღო და მათ შორის ერთ-ერთი ციფრული ბანკის საუკეთესო UX დიზაინი იყო. 

ამ თემაზე საუბარი ვთხოვეთ გიგი ჯანელიძეს, რომელიც თიბისის დიზაინისა და UX ლიდერია და პარალელურად მიჰყავს თიბისიში დიზაინ ტრანსფორმაციის პროცესი:

M: გიგი, უპირველეს ყოვლისა, დავიწყოთ გამარჯვებით – თიბისი საფინანსო ინსტიტუტია. რას ნიშნავს ციფრული ბანკის საუკეთესო UX დიზაინის ჯილდოს აღება თქვენთვის?

პირველ რიგში, ეს ნიშნავს იმას, რომ ჩვენ სწორ გზაზე ვდგავართ და ის პროცესები, რომლებიც დავიწყეთ დიზაინ ტრანსფორმაციის დროს გამართლებული იყო. მომხმარებლების გამოცდილებაზე ზრუნვა ჩვენთვის არ არის მხოლოდ სიტყვები, რადგან ჩვენ დღე და ღამე ვიკვლევთ მომხმარებლის სურვილებს, მათ პრობლემებს, ვცდილობთ, რომ ჩვენი მომხმარებლები თავად იყვნენ ჩართულები ჩვენი პროდუქტების და სერვისების განვითარების პროცესში. ასევე, როცა ვსაუბრობთ მომხმარებლებზე, ჩვენ სულ ვგულისხმობთ არა მხოლოდ გარე მომხმარებლებს, არამედ ჩვენი ყოველი თანამშრომლის გამოცდილების გაუნჯობესებას, რადგან გვჯერა, რომ MAKE PEOPLE’S LIVES EASIER! იწყება მაშინ, როცა თანამშრომლებიც გრძნობენ იმას, რომ მათი იდეები, სურვილები და ჩართულობა ამ პროცესში არის მნიშვნელოვანი. 

M: თქვენი აზრით, რამ განაპირობა ის, რომ ეს ჯილდო მოიპოვეთ, რით დააკმაყოფილა თიბისის ციფრულმა ბანკმა ყველა კრიტერიუმი?

იმით, რომ ჩვენ იტერაციულად ვავითარებთ ჩვენს პროდუქტებს და არ ვტოვებთ ყურადღების გარეშე მომხმარებლის მოლოდინებს. უფრო მეტს გეტყვით – ჩვენთვის მნიშვნელოვანი არის ხარისხობრივი კვლევების ჩატარება, რაც გულისხმობს იმას, რომ თავად განვითარების პროცესში მომხმარებელი არის ჩართული, რაც აძლევს ჩვენი გუნდის წევრებს იმის საშუალებას, რომ მომხმარებლის ხმა და მომხმარებლის მიმართ ემპათია გაიზარდოს. ასევე ჩვენ გვესმის, რომ დიზაინი და გამოცდილების გაუმჯობესება არის მუდმივი პროცეს და არა მხოლოდ მიზანი, რომლის მიღწევის შემდეგ შეგვიძლია, რომ შევჩერდეთ.

TBC-ის კულტურის ნაწილი არის მომხმარებელზე ზრუნვა, ამიტომ ჩვენთვის გამოცდილების გაუმჯობესება არ არის ვალდებულება, ეს ჩვენი კულტურისა და პრინციპების ნაწილია, რათა შევქმნათ საუკეთესო გამოცდილება და მუდმივად ვიზრუნოთ ჩვენს მომხმარებლებზე. 

M: თქვენ უშუალოდ მუშაობთ ამ ყველაფერზე – რას ითვალისწინებთ, როცა დიზაინზე ფიქრობთ, რას ეყრდნობა თქვენი გადაწყვეტილებები?

მე მჯერა, რომ როცა ხალხს ეძლევა საშუალება, დასახოს ამბიციური გეგმები, გამოთქვას თავისი იდეები, უშუალოდ იყოს ჩართული განვითარების პროცესში; ასევე, როცა აქვს ყველა თანამედროვე ინსტრუმენტი და ხვდება, რომ მასზე ზრუნავენ, ეს არის იმის დიდი საფუძველი, რომ დაინერგოს სწორი დიზაინ პროცესი, რაც გულისხმობს იმას, რომ ინოვაციურობა, ემპათია, კრეატიული აზროვნება, კრიტიკული დისკუსია, საუკეთესო გამოცდილების შექმნა ხდება ის კომპონენტები, რომლებიც კომპანიის კულტურის ნაწილია.

M: როგორ ზრუნავთ დიზაინ ტრანსფორმაციაზე, რა პროცესები მიმდინარეობს თიბისიში ამისთვის?

დავასახელებ სამ ძირითად კომპონენტს: 

1) დიზაინ პროცესების ბიზნეს პროცესებში იმპლემენტაცია, რაც გულისხმობს იმას, რომ ბიზნეს გეგმებს მოჰყვება UX გეგმები და პროცესები, რაც უზრუნველყოფს არა მხოლოდ ბიზნეს გეგმების შერულებას, არამედ იმასაც, რომ მომხმარებლის გამოცდილების ხარისხი უნდა გაუმჯობესდეს. ამ კომპონენტში ჩვენ გვეხმარება ორი ძირითადი მეთოდოლოგიის იმპლემენტაცია – დიზაინ ფიქრი (Design Thinking Methodology) და მომხმარებლის მოგზაურობის რუკები (Journey Mapping Methodology). 

2) მეორე კომპონენტი არის თვითონ დიზაინისა და UX კომპეტენციების, ორგანიზაციული სტრუქტურის გაძლიერება, რაშიც ვიყენებთ DesignOps და ResearchOps პრინციპებს, ამაში შედის როგორც ოპერაციული მართვა, ასევე კომპეტენციების ზრდა და კულტურის ნაწილის განვითარება. 

3) თანმიმდევრული გამოცდილების შექმნა (რაშიც დიზაინ სისტემის გუნდი არის ჩართული) და UX და დიზაინ მეტრიკების დანერგვა და გაუნჯობესება. 

M: ბოლო წლებში UX, მომხმარებლის გამოცდილება ერთ-ერთი ყველაზე განხილვადი საკითხია. თქვენი აზრით, რამ გაზარდა მისდამი ასეთი მოთხოვნა და კონკურენციაც ბრენდების მხრიდან?

პირველ რიგში, დიდი გავლენა იქონია ტექნოლოგიურმა პროგრესმა. მაგალითად iPhone’ის ტიპის გაჯეტების გამოჩენამ დაბადა ახალი ტიპის გამოცდილება. თუ ადრე თქვენ გიწევდათ სტაციონალურ კომპიუტერთან ჯდომა, რომ ინფორმაცია გაგეგოთ, ახლა შეგიძლიათ, ეს ინფორმაცია მიიღოთ ნებისმიერ ადგილას და ნებისმიერ მომენტში. ეს რადიკალურად ცვლის როგორც გამოცდილების შექმნას, ასევე ბიზნეს ლანდშაფტს. ახლა ფაქტობრივად ყველა შენი სერვისი გაქვს „On Demand” და ჯიბეში. ამიტომ კიდევ უფრო მნიშვნელოვანი არის რომ გამოცდილებას დავაკვირდეთ, გამოვიკვლიოთ და გავაუმჯობესოთ, რადგან მომხმარებელი უკვე მიჩვეული არის იმას, თუ რა არის კარგი და რა არის ცუდი. თუ ადრე დიდი დრო დასჭირდებოდა, რომ ერთი სერვისიდან მეორეზე გადართულიყო, ახლა სჭირდება 90 წამი. ისე, მომხმარებლის გამოცდილება პირდაპირ არის კავშირში ადამიანის კონგიტიური ფუნქციების კვლევაში, მაგრამ ეს საკმაოდ დიდი თემა არის, რაზეც ცალკე დიდი მასალის მომზადება შეიძლება.

[R]

ნახეთ: როგორია თაობა Z-ისთვის შექმნილი Polaroid-ი

ნახეთ: ჰაბლის ტელესკოპმა ორიონის ნისლეულის ფოტო გადაიღო