in

როგორ მოარგო “თიბისი დაზღვევამ” სერვისი პანდემიურ “ახალ რეალობას”?

პანდემიის გამოცხადებისთანავე, კომპანიები, მთელი მსოფლიოს მასშტაბით, ახალ რეალობასთან ექსტრემალური ადაპტირების გადაუდებელი საჭიროების წინაშე დადგნენ. დისტანციურ რეჟიმზე გადასვლამ ბევრი მათგანისგან განსხვავებული ტაქტიკის სწრაფად შემუშავება მოითხოვა. კომპანიებს, რომლებმაც ციფრულ სერვისზე უფრო ადრე იზრუნეს, რეალობაზე მორგება უფრო გაუადვილდათ და მალევე მიხვდნენ, რომ სტაბილური განვითარებისთვის ახალი და უფრო მოქნილი სერვისების შეთავაზება დასჭირდებოდათ. ასე მოიქცა “თიბისი დაზღვევაც”, რომელმაც გრძელვადიანი პერსპექტივების სწრაფად გაანალიზებისთანავე დაიწყო “ახალ რეალობაზე” მორგებული და სრულიად ახალი სერვისების დანერგვა. როგორ განვითარდა “თიბისი დაზღვევა” 2020 წელს, დეტალებზე კომპანიის გენერალური დირექტორის მოადგილე დავით კიღურაძე გვესაუბრა.

M: 2020 წელი ბევრი კომპანიისთვის აღმოჩნდა გამოწვევა, დისტანციური მომსახურების თვალსაზრისით. გვიამბეთ, როგორ შეძლო “თიბისი დაზღვევამ” ონლაინ რეჟიმში ეფექტიანად ოპერირება?

2020 წელი ნამდვილად ახალი გამოწვევებისა და განსხვავებულ, აქამდე წარმოუდგენელ რეალობაში ოპერირების პერიოდი აღმოჩნდა. ერთი შეხედვით, ბევრ დაბრკოლებასა და საფიქრალთან ასოცირდებოდა მთელი კომპანიის დისტანციური მუშაობის რეჟიმზე გადასვლა, ვინაიდან ჩვენთვის მნიშვნელოვანი იყო სამუშაო პროცესი ისეთივე წარმატებით გაგრძელებულიყო, როგორც პანდემიამდელ რეალობაში მიმდინარეობდა. თუმცა, იმის გათვალისწინებით, რომ “თიბისი დაზღვევის” როგორც „ოფლაინ“, ასევე ონლაინ სერვისებისა და მომსახურებების მნიშვნელოვანი ნაწილი გამართული და ორიენტირებულია მომხმარებლისათვის ცხოვრების გამარტივებაზე, ახალ გარემოში ადაპტირება შედარებით მარტივად შევძელით. ადამიანებს კვლავ შეეძლოთ შეუფერხებლად, სულ რამდენიმე წუთში შეეძინათ დაზღვევა, ესარგებლათ სადაზღვევო პროდუქტებით, მიეღოთ ანაზღაურება, ან თუნდაც, განეახლებინათ თავიანთი პოლისი სახლიდან გაუსვლელად.

M: შეიცვალა თუ არა სადაზღვევო პროდუქტებზე მოთხოვნა პანდემიის დროს?

პანდემიამ, რა თქმა უნდა, გარკვეული გავლენა იქონია მომხმარებლის ქცევაზე სადაზღვევო პროდუქტების შეძენის და შემდგომი მომსახურების მიღების თვალსაზრისით. აღსანიშნავია, რომ მოთხოვნა კვლავ შენარჩუნდა ინდივიდუალური დაზღვევის პროდუქტებზე, როგორიცაა ავტომობილის და ქონების დაზღვევა. თუმცა, იმისათვის, რომ მომხმარებელს მეტი ფინანსური მოქნილობის შანსი მისცემოდა, ჩვენს კლიენტებს აპრილის დასაწყისიდან შევთავაზეთ ავტომობილის დაზღვევის პოლისების შეჩერება 2 თვის ვადით, რადგან ავტოტრანსპორტით გადაადგილება მნიშვნელოვნად შეიზღუდა. დამატებით შევიმუშავეთ ახალი, უფრო ხელმისაწვდომი პროდუქტი – „ავტომინი“, რომელიც დიდწილად ფარავს ყველა იმ გაუთვალისწინებელ შემთხვევას, რაც ავტომობილის სტანდარტული დაზღვევით ანაზღაურდება და ამ გზით მომხმარებელს მივეცით მეტი თავისუფლება თავად შეერჩია დაზღვევის ინდივიდუალური დაფარვები, ფასის ოპტიმიზაციის მიზნით.

ქვეყნებს შორის მიმოსვლის შეზღუდვამ მნიშვნელოვანად შეამცირა სამოგზაურო დაზღვევის პროდუქტზე მოთხოვნა. მიუხედავად ამისა, ჩვენ გავაგრძელეთ მის გაუმჯობესებაზე მუშაობა და სტანდარტულ სამოგზაურო დაზღვევის ნაკრებს (რომელიც ანაზღაურებს სამედიცინო ხარჯებს საზღვარგარეთ მოგზაურობისას), დავამატეთ ახალი დაფარვები, როგორიცაა მოგზაურობის გაუქმება, ბარგის დაკარგვის, დაზიანების და დაგვიანების, ასევე მგზავრობისას საბუთების დაკარგვის/დაზიანების დაზღვევა. ვიმედოვნებთ, რომ მოგზაურობის აღდგენასთან ერთად, კომპანიის  ახალი სამოგზაურო დაზღვევა ჩვენი ერთგული მომხმარებლების დიდ მოწონებას დაიმსახურებს.

კიდევ ერთი მნიშვნელოვანი სიახლე, რომელიც პირველებმა დავნერგეთ საქართველოში,   COVID-19-ის გართულებებისა და სიცოცხლის დაზღვევის რისკებს ფარავს. პროდუქტი საკმაოდ დიდი პოპულარობით სარგებლობს და მისი ღირებულება მხოლოდ 19 ლარს შეადგენს.

M: როგორ შეიცვალა მომხმარებლის მოთხოვნილება ციფრული სადაზღვევო სერვისების თვალსაზრისით და თქვენ როგორ დააკმაყოფილეთ ამის  საჭიროება ბაზარზე?

პანდემიამ თითოეული ადამიანის ყოველდღიურობა შეცვალა. გამკაცრდა სახელმწიფო რეგულაციები, შეიზღუდა ბევრი სერვისი და მომსახურება. ადამიანები ერიდებოდებიან ხშირ და ახლო კონტაქტს, სხვადასხვა მომსახურების ფიზიკური ვიზიტის მეშვეობით მიღებას. ამ ცვლილებებმა კიდევ უფრო მკაფიოდ დაგვანახა იმის საჭიროება, რომ მეტი  ძალისხმევა მიგვემართა ახალ ტექნოლოგიებზე ციფრული მომსახურების ნაწილში და ჩვენი ონლაინ სერვისები კიდევ უფრო მოქნილი და მოსახერხებელი გაგვეხადა.

ამიტომაც, პანდემიის დასაწყისიდან ჩვენი ძალისხმევა მივმართეთ სწორედ ისეთი პროცესების სრულყოფისაკენ, რომლის დახმარებითაც მომხმარებელს სადაზღვევო სერვისებით დისტანციურად სარგებლობისას მაქსიმალური კომფორტი შეექმნებოდა. ამ პროცესებს შორის პირველი, რაც დავნერგეთ,  ავტომობილის დასურათების ფუნქციონალი იყო ბი ბოტში. ამ სიახლით დაზღვეულებს საშუალება მივეცით თავად დაესურათებინათ დასაზღვევი ავტომობილი, ოფისში მოსვლის გარეშე. ამავე დროს, ავტომობილის სადაზღვევო შემთხვევის ონლაინდარეგულირების მიზნით, დავნერგეთ მომსახურების განახლებული პროცედურები და სისტემები. შედეგად, შემცირდა სადაზღვევო შემთხვევებზე დაზღვევის ოფიცრების გასვლის საჭიროება, გამარტივდა სადაზღვევო შემთხვევის შედეგად გამოწვეული ზარალის დისტანციურად შეფასება და მნიშვნელოვნად დაჩქარდა  ანაზღაურება.

ჯანმრთელობის დაზღვევის მომხმარებლებისთვის კი შევქმენით ახალი მობაილ აპლიკაცია, რომელმაც მნიშვნელოვნად გაუმარტივა დაზღვეულებს სამედიცინო მომსახურების მიღება სასურველ კლინიკაში ჩაწერით, გაწეული სამედიცინო ხარჯების ონლაინანაზღაურებით, სადაზღვევო ლიმიტების მონიტორინგით და სხვა დამატებითი სერვისებით. სულ ახლახან რედმედთან კოლაბორაციის შედეგად, ჩვენს სამედიცინო დაზღვეულებს საშუალება მიეცათ მიიღონ ონლაინ სამედიცინო კონსულტაცია ვიდეოზარის მეშვეობით, ან გამოიძახონ სასურველი მიმართულების ექიმი სახლში.

M: მიუხედავად იმისა, რომ “თიბისი დაზღვევა” სულ რამდენიმე წელია, რაც ბაზარზეა, ერთ-ერთი ანგარიშგასაწევი კომპანიაა დაზღვევის მიმართულებით. როგორი იყო თქვენი სტრატეგია ამ  შედეგის მისაღწევად?

ჩვენი სტრატეგია პირველივე დღიდან ეფუძნებოდა რამდენიმე საკვანძო ელემენტს, თუმცა აქ გამოვყოფ ყველაზე მნიშვნელოვან ნაწილს:

პირველ რიგში, ჩვენი მიზანი იყო სადაზღვევო ინდუსტრიაში შემოგვეტანა და დაგვენერგა თანამედროვე ტექნოლოგიები, რომელიც მოგვცემდა უნიკალურ კონკურთიბიენტულ უპირატესობას და გაუმარტივებდა ჩვენს მომხმარებელს სადაზღვევო სერვისებით სარგებლობას. ამ მიმართულებით, ბოლო 4 წელიწადში, ჩვენ შევქმენით რამდენიმე თანამედროვე ონლაინ სერვისის სისტემა, მათ შორის  საქართველოში პირველებმა დავნერგეთ სადაზღვევო ჩატ-ბოტი (ბი ბოტი), რომლის დახმარებითაც ადამიანებს Facebook Messenger-ის ჩატიდან გაუსვლელად შეუძლიათ “თიბისი დაზღვევის” სხვადასხვა საცალო პროდუქტის შეძენა, ზარალის ანაზღაურება და მათთვის საჭირო სხვა სერვისის მიღება. ამავე დროს, პირველებმა დავაინტეგრირეთ პოლისების შეძენის ფუნქციონალი “თიბისის ბანკის” სწრაფი გადახდის სისტემებში, ასევე “თიბისი ბანკის” ინტერნეტ და მობაილ აპლიკაციებში. პარალელურად, ონლაინ შეძენის, პოლისების განახლებისა და ზარალის დარეგულირების ფუნქციონალი დავნერგეთ ჩვენს ვებგვერდზე. ხოლო ამ ყველაფერს, როგორც უკვე აღვნიშნე, წელს დაემატა მობაილ აპლიკაცია ჯანმრთელობის დაზღვევის მომხმარებლებისათვის.

სტრატეგიის მეორე და არანაკლებ მნიშვნელოვანი ელემენტია ჩვენი მომსახურების ხარისხი და ამ მომსახურებით კმაყოფილი კლიენტები.  კომპანიის მიზანია მომსახურების მიღების ყველა ეტაპზე  მომხმარებელი იყოს კმაყოფილი ჩვენი და ჩვენი პარტნიორი ორგანიზაციების მიერ გაწეული მომსახურებით. ამ მიზნის მისაღწევად მუდმივად ვზომავთ და ვიკვლევთ  მომსახურების ხარისხს, ვაგროვებთ და ვაანალიზებთ ჩვენი მომხმარებლის შენიშვნებს, ვცდილობთ სწრაფი და ადეკვატური რეაგირება მოვახდინოთ  დაფიქსირებულ ხარვეზებსა და  პრობლემებზე. “თიბისი დაზღვევაში” შეცდომები მოსულა, თუმცა მათი დროული და სრულფასოვანი მოგვარებაა საჭირო, რაც მთელი ჩვენი გუნდის პრიორიტეტია!

საბოლოოდ, შეიძლება ითქვას, რომ “თიბისი დაზღვევის” წარმატება განპირობებულია ახალი ტექნოლოგიების დანერგვით, მომსახურების მუდმივ გაუმჯობაზე ზრუნვით, კლიენტებისათვის გამჭირვალე, სანდო და ხარისხიანი მომსახურების გაწევით. დასახული გეგმების მიღწევა და გამოწვევებთან გამკლავება ბევრად მარტივია, რადგან “თიბისიში” მიზანდასახული, პროფესიონალი, თვითგანვითარებასა და სიახლეების ძიებაზე მომართული გუნდია!

[R]

„სილქნეტმა“ Viber-ის კოლექციას საახალწლო სტიკერები შემატა

„ხალიკ ბანკის“ საახალწლო, „ქეშბექ“ აქცია დაიწყო