ქართული ჩაი „მანნა“ აშშ-ის ბაზარზე შევიდა. ამის შესახებ კომპანიის დირექტორმა ირაკლი ღურჭუმელიამ „საქმის კურსთან” ისაუბრა. მისი თქმით, პროდუქცია, ამერიკაში, საცდელი პარტიის სახით, პირველ ეტაპზე, 2 პალეტის გაიტანეს.
„წლევანდელ გეგმებში გვაქვს, რომ აშშ-ის ბაზარზე უფრო ღრმად შევიდეთ, იქ გვყავს პარტნიორი სადისტრიბუციო კომპანია, რომელიც გვეხმარება. ჯერ ვაკვირდებით ამ ბაზარს, მხოლოდ აქედან რომ ჩავიდეს პროდუქცია აშშ-ში, დაახლოებით, 2 თვე სჭირდება”, – ამბობს ირაკლი ღურჭუმელია.
საწარმო „მანნა” საგურამოში მდებარეობს და „ერთიანი აგროპროექტის“ ფარგლებში შეიქმნა. კომპანია ქართულ ბაზარზე, ამ დროისთვის, 10 დასახელების პროდუქციას უშვებს და ახლო მომავალში ხილის ჩაის დამატებას გეგმავს.
