Tegeta Motors გუნდის ახალ წევრებს ეძებს – შეავსე აპლიკაცია და დაიწყე კარიერა „თეგეტაში“
დღეს რომ ჰკითხოთ ზაზა კუკულაძეს, რა იყო მის ცხოვრებაში ყველაზე დიდი მოულოდნელობა, გეტყვით, რომ ავტოინდუსტრიაში მოხვედრა. თუ მეორე კითხვასაც დაუსვამთ, 5 წლის შემდეგ თავი სად წარმოუდგენია, მისი პასუხი არ შეიცვლება. არც არის გასაკვირი – 21 წლის სტუდენტი, რომელსაც მანქანების არა თუ რამე გაეგებოდა, მართვის მოწმობაც კი არ ჰქონდა, „თეგეტა მოტორსში“ აღმოჩნდა, უბრალოდ ბედი სცადა და გამოუვიდა. დღეს კი, „თეგეტა მოტორსის“ ბათუმის მომსახურების ფილიალის გაყიდვების ჯგუფს ხელმძღვანელობს.
ყველაფერს დასაწყისი, მაგრამ სხვადასხვანაირი გაგრძელება აქვს, – ზაზას ისტორიას მივყვეთ, – ბიზნეს ადმინისტრირების ფაკულტეტის სტუდენტს მუშაობის დაწყება უნდა და მიზნის მისაღწევად ეძებს გზებს. ასე ხვდება „თეგეტა აკადემიაში“, სადაც ავტომანქანებს ჯერ უბრალოდ შორიდან, ვიზუალურად სწავლობდა და თეორიულ კურსს გადიოდა. უცხო სიტყვები იყო „კატალიზატორის დაჩიკი“ (ჟანგბადის სენსორი), „ბაბინა“ (კოჭა), „პაჩებნიკი“ (საკისარი), არც სარქვლის ზამბარა იცოდა, არც გიტარა და არც „შარავოი“. სამაგიეროდ, ჰქონდა სწავლის სურვილი და ჰყავდა ტრენერები, რომლებმაც დეტალებში გასარკვევად უკვე ძრავაშიც ჩაახედეს.
ერთი შეხედვით ჯადოქრობას თავისი სახელი დაერქვა, ეს იყო მანქანის მექანიზმი, რომლის მუშაობის სპეციფიკასაც, დღეს, ზაზა კუკულაძე სრული სიზუსტით აგიხსნით.
„როდესაც გავიგე ამ შესაძლებლობის შესახებ, ვიფიქრე, სად თუ არა „თეგეტაში“, რომელიც ერთ-ერთი ყველაზე დიდი, წარმატებული და სტაბილური ქართული კომპანიაა. იყო შიშის მომენტი, რამდენად შევძლებდი, იქნებოდა თუ არა საერთოდ ჩემთვის საინტერესო, მაგრამ საბოლოოდ ისე გამოვიდა, რომ ჩემი ცოდნა და უკვე „თეგეტაში“ მიღებული გამოცდილება ერთმანეთს ნელ-ნელა დაუკავშირდა. ამან უფრო გამამხნევა და დღეს უკვე გაყიდვების ჯგუფის უფროსი ვარ“.
ასე იწყება კარიერა „თეგეტაში“. მსურველები ჯერ „თეგეტა აკადემიაში“, თვე-ნახევრიან თეორიულ კურსს გადიან, შემდეგი ნაბიჯი გარანტირებული დასაქმებაა. ამ შესაძლებლობით სარგებლობა და საკუთარი ძალების მოსინჯვა შემოდგომიდან ქუთაისის, ფოთისა და ბათუმის მცხოვრებლებსაც შეუძლიათ.
ამისათვის მხოლოდ განაცხადის შევსებაა საჭირო. სასწავლო კურსი, რომელიც ბათუმში წარიმართება, უფასოა. შერჩეული აპლიკანტების ტრანსპორტირების და თვე-ნახევრის განმავლობაში, ბათუმში ცხოვრების ხარჯებს „თეგეტა მოტორსი“ დაფარავს.
21 წლის იყო ზაზა კუკულაძე, როდესაც „თეგეტაში“ მოხვდა, ამბობს, რომ ეს იყო პირველი სერიოზული სამსახური და პირველი დიდი პასუხისმგებლობა. პარალელურად არც უნივერსიტეტში სწავლა შეუწყვეტავს. შუა გზაზე საქმის მიტოვება არც თვითონ უყვარს და არც ახალი მიღწევების სურვილი დაუკარგავს, – სტაჟირებას ხელშეკრულება და კონსულტანტის პოზიცია, შემდეგ კი დაწინაურება მოჰყვა. დღეს, ჯგუფის უფროსია მის გუნდში კიდევ სამი თანამშრომელია.
„როდესაც თანამშრომელი თავისი საქმის ერთგული და შრომისმოყვარეა, ამას „თეგეტაში“ ყველაზე მეტად აფასებენ და გეტყვით, რატომაც – ყველაზე მძიმე პერიოდში, როცა უკვე კორონას გამო რამის ყველაფერი გაჩერდა, ჩვენი კომპანია ფეხზე იდგა და არა თუ შევინარჩუნეთ სამსახური, არამედ ზუსტად ამ რთულ სიტუაციაშიც, ყველაზე ნაკლებად რომ ველოდი, დამაწინაურეს კიდეც. ის ადამიანიც, ვის ადგილზეც მე დავინიშნე, კიდევ უფრო წინ წავიდა“.
ზაზა არც თვითონ გაჩერებულა, ბაკალავრიატი დაამთავრა და ახლა, ბათუმის უნივერსიტეტში მაგისტრატურის სტუდენტია. თეორიულ ცოდნაზე, აგურ-აგურ, გამოცდილებასაც აშენებს და კარიერის გაგრძელებასაც „თეგეტაში“ გეგმავს.
აქვს თუ არა წარმატებას ფორმულა, ვკითხეთ ზაზას – აღმოჩნდა, რომ არც კარიერის დასაწყისში, სტარტის ხაზთან ხვდები შემთხვევით და ფინიშამდე მისასვლელ გზასაც თავად ირჩევ. მთავარია, არ გაუშვა შანსი, რომელიც ხელისგულზეა.
„თეგეტა მოტორსი“ მის შვილობილ კომპანია „თეგეტა აკადემიასთან“ ერთად, განაგრძობს კამპანიას „დაიწყე კარიერა თეგეტაში“, რომელიც ამჯერად, ქუთაისს, ფოთსა და ბათუმს მოიცავს. მსურველები ამ სამი დიდი ქალაქიდან, თვე-ნახევრიან თეორიულ კურსს გაივლიან, შემდეგი ეტაპი ანაზღაურებადი სტაჟირებაა, რის შემდეგაც კურსდამთავრებულები ავტოინდუსტრიის ერთ-ერთ ლიდერ კომპანიაში გარანტირებულად საქმდებიან.
სასწავლო კურსი უფასოა. სწავლების პროცესი ბათუმის „თეგეტა აკადემიაში“ წარიმართება. კომპანია ამ შემთხვევაშიც ითვალისწინებს აპლიკანტების ინტერესებს და მათ ტრანსპორტირებისა და ცხოვრების ხარჯებს საკუთარ თავზე იღებს.
განაცხადების მიღება უკვე დაწყებულია და 12 სექტემბრამდე გაგრძელდება. სწავლა 20 სექტემბერს დაიწყება.
[პარტნიორის კონტენტი]
