რეკრუტერებისთვის თქვენი უნარებისა და გამოცდილების შეფასების ყველაზე სწრაფი გზა არის კითხვა: „შეგიძლიათ გაგვაცნოთ თქვენი გამოცდილება?“ ეს მარტივი კითხვა ჩანს, მაგრამ ნუ მოტყუვდებით – თქვენი პასუხი განსაზღვრავს, ჩათვლის თუ არა რეკრუტერი თქვენს კანდიდატურას სერიოზულად. რეკრუტერები არ ეძებენ მიღწევების ან პასუხისმგებლობების უბრალო ჩამონათვალს. მათ სურთ მოისმინონ ფოკუსირებული თხრობა, რომელიც ხაზს უსვამს, თუ რატომ ხართ იდეალური კანდიდატი ახალი პოზიციისთვის. თქვენი პასუხი უნდა ჩაეტიოს ორ წუთში, მიუხედავად იმისა, რამდენი სამსახური გქონდათ და რამდენი წელი იმუშავეთ, წინააღმდეგ შემთხვევაში შეიძლება რეკრუტერის ყურადღება დაკარგოთ.
წარმოაჩინეთ თქვენი გამოცდილება ახალი სამსახურის პერსპექტივიდან
განსაზღვრეთ, რომელი მიღწევები, უნარები და შესაძლებლობები უკავშირდება სამუშაო აღწერილობის ძირითად მოთხოვნებს. ნუ გაიმეორებთ ერთსა და იმავე პასუხისმგებლობებს სხვადასხვა სამსახურიდან. მიზანია, აჩვენოთ კარიერული წინსვლა, რომელიც შეესაბამება ახალ პოზიციას. მაგალითად, Paid Media Director-ის პოზიციის აღწერილობა მოიცავს ისეთ მოთხოვნებს, როგორიცაა: კლიენტებთან ურთიერთობების მართვა, მედია დაგეგმვის სტრატეგიის შექმნა კროს-პლატფორმული მონაცემებიდან. აუცილებელია სოციალური მედიის, ელ-ფოსტის და DSP პლატფორმების ცოდნა. წარმატებულ კანდიდატს უნდა ჰქონდეს შესანიშნავი წერის, ანგარიშგებისა და პროექტის მართვის უნარები.
თუ კანდიდატს აქვს შვიდი წლის გამოცდილება მედია დამგეგმავის პოზიციაზე ორ სხვადასხვა სამსახურში და სურს თავისი გამოცდილების შესაბამისობაში მოყვანა სამუშაო აღწერილობასთან, მან უნდა დაიწყოს პირველი სამსახურიდან სკოლის შემდეგ და გადავიდეს მიმდინარე პოზიციაზე:
„კარიერა დავიწყე [სააგენტოს სახელი] ასოცირებული მედია დამგეგმავის პოზიციაზე. ვიკვლევდი და ვაანალიზებდი სამიზნე აუდიტორიებს, ვაკეთებდი ანგარიშებს სარეკლამო კამპანიების შესახებ სხვადასხვა პლატფორმაზე და ვწერდი მონაცემებზე დაფუძნებულ სტრატეგიულ გეგმებს, რომლებსაც პირდაპირ კლიენტებს ვუზიარებდი. ორი წლის განმავლობაში დამაწინაურეს ექაუნთ მენეჯერის პოზიციაზე, შეხება მქონდა ამა და ამ კომპანიებთან. ძლიერი სტრატეგიის შემუშავების წყალობით, შევძელი ამა და ამ ბრენდის ცნობადობის 20%-ით გაზრდა ექვს თვეში სტრატეგიული მედია დაგეგმვის კამპანიით სოციალურ და ციფრულ მედიაში. კონკრეტული ბრენდის ცნობადობა 22%-ით გაიზარდა, სამ თვეში, პროგრამატიკული სარეკლამო კამპანიების მეშვეობით…“
ეს ნაამბობი მოიცავს თითქმის ყველაფერს, რაც ამ კანდიდატმა უნდა თქვას თავისი ფუნდამენტური უნარების ასახსნელად. დაწინაურების ხსენება ამტკიცებს, რომ ის სწრაფად სწავლობს და შეუძლია თავისი უნარების გავლენის დემონსტრირება, რაც პირდაპირ უკავშირდება ახალ სამსახურს.
თხრობისას გაითვალისწინეთ მკაფიო გადასვლები
სამსახურების ცვლილების ახსნისას მნიშვნელოვანია კონტექსტის მიწოდება, რომელიც აჩვენებს მიზანმიმართულობას და თქვენი კარიერული ზრდის შესაბამისობას. ხაზი გაუსვით თითოეული ცვლილების მიზეზებს – ეძებდით კონკრეტულ უნარებს, რომლებიც ახლა გადამწყვეტია იმ პოზიციისთვის? ყოფილმა მენეჯერმა ან კოლეგამ დაგიქირავათ, რადგან თქვენს გამოცდილებას აფასებდნენ? ამის ხსენება თქვენს პროფესიულ რეპუტაციას უსვამს ხაზს. თუ ინდუსტრია ან კარიერული მიმართულება შეცვალეთ, ახსენით, რატომ იყო ეს გადასვლა სტრატეგიული ნაბიჯი, რომელმაც მოგამზადათ იმ პოზიციის პასუხისმგებლობებისთვის, რომელზეც აპლიკაციას აკეთებთ.
თუ სამსახურს ყოველ ერთ-ორ წელიწადში იცვლიდით, თქვენი ახსნა სამსახურის შეცვლის შესახებ უნდა იყოს ლოგიკური და მიწოდებული თავდაჯერებულად. თუ გაგათავისუფლეს მასობრივი შემცირების დროს, შეგიძლიათ ახსენოთ, რომ კომპანიამ შეცვალა სტრატეგია ან შეამცირა პროგრამები და ეს თქვენს პოზიციას შეეხო.
მთავარია, იყოთ პროაქტიული და შეავსოთ დასაქმების წყვეტები მანამ, სანამ გკითხავენ მათ შესახებ. დიახ, მისაღებია თქვათ, რომ აიღეთ შესვენება ბავშვების აღსაზრდელად, მაგრამ ისაუბრეთ იმაზე, თუ როგორ განაახლეთ თქვენი უნარები ამ პერიოდში.
წარმოაჩინეთ თქვენი უნიკალური ღირებულება
განსაზღვრეთ, რა განგასხვავებთ სხვა კანდიდატებისგან და ჩართეთ ეს თქვენი წარსული როლების ნარატივში. ხაზი გაუსვით კონკრეტულ უნარებს, გამოცდილებას ან პერსპექტივებს, რომლებიც უნიკალურ ღირებულებას მატებს პოზიციას, რომელზეც აპლიკაციას აკეთებთ. მაგალითად, თუ გაქვთ ფინანსური განათლება, ხაზი გაუსვით, როგორ გაძლევთ ეს მონაცემებზე დაფუძნებულ მიდგომას ახალი როლის ასპექტების მიმართ. ან, თუ გადადიხართ შემოქმედებითი სფეროდან, როგორიცაა ჟურნალისტიკა, მარკეტინგში, ფოკუსირდით უნარებზე, რომლებიც შედეგებს მოიტანს ახალ როლში.
თამამად დააკავშირეთ თქვენი უნიკალური უნარები და პოზიცია, რომელზეც გადადიხართ. აჩვენეთ როგორ გაძლევთ თქვენი გამოცდილება საშუალებას მოიტანოთ გამორჩეული ღირებულება იმაზე მეტი, ვიდრე სხვა კანდიდატებს შეუძლიათ. თქვენი გამოცდილების დაკავშირება სამსახურთან, რომელზეც აპლიკაციას აკეთებთ და პროგრესული უნარების შეძენის მოკლე ისტორიით ჩვენება, ინტერვიუერს კმაყოფილს დატოვებს და დააჯერებს, რომ თქვენ შეგიძლიათ წარმატების მიღწევა ახალ როლში.
წყარო: HBR
