23
Sep
2019

რჩევები, რომლებიც უნდა გავითვალისწინოთ, სანამ თბილისიმარათონზე ვირბენთ

23 Sep 2019

მათთვის, ვინც უკვე გამოცდილი მორბენალია, მარათონზე სირბილი და მასთან დაკავშირებული სირთულეები ახალი არ არის. თუმცა, დამწყები სპორტსმენებისთვის ან უბრალოდ მოხალისეებისთვის ნახევარმარათონზე ან 10 კილომეტრიან გარბენზე სირბილი საკმაოდ დიდი გამოწვევაა. თბილისიმარათონი გვიახლოვდება, მისთვის მზადება კი აქტიურ ფაზაში გადადის. სწორედ ამასთან დაკავშირებით, გადავწყვიტეთ, რამდენიმე რჩევა შემოგთავაზოთ, რომელიც მარათონისთვის გამოგადგებათ.

მარათონისთვის მოსამზადებელ პერიოდში მოერიდეთ მაღალქუსლიან ფეხსაცმელებს –  მაღალქუსლიანი ფეხსაცმელები ფეხებს ძაბავს, რაც მარათონისთვის და ზოგადად სირბილისთვის ცუდი წინაპირობაა. მარათონისთვის მოსამზადებელ პერიოდში ეცადეთ, კომფორტული სანდლები ან ბოტასები მოირგოთ.

სირბილის შემდეგ გამოიყენეთ ყინული – ყინულის დადება არამხოლოდ ჭრილობებსა თუ დაჟეჟილობებზეა რეკომენდირებული, არამედ – სირბილის შემდეგაც. მაგალითად, ბეისბოლის მოთამაშეები თამაშის შემდეგ პრევენციის მიზნით ყინულებს იდებენ სხეულზე. ასე უნდა მოვიქცეთ მარათონის და ზოგადად გრძელვადიანი სირბილის შემთხვევაშიც. პირველ რიგში, ეს სასიამოვნოა, ასევე, იგი ასევე გიხსნით დაღლილობის შეგრძნებას, სხეულს აახლებს და ენერგიით ავსებს.

ატარეთ ქუდი – დაიფარეთ ქუდი სირბილის დროს, ეს აქსესუარი ნებისმიერი ამინდის დროს ძალიან გამოსადეგია. იგი დაგიცავთ როგორც წვიმის წვეთებისგან, ისე მზიან ამინდშიც და თვალებს კონცენტრირების საშუალებას მისცემს.

ჩაუტარეთ თავს ერთგვარი რეპეტიცია – მარათონამდე ბოლო ხუთი დღის განმავლობაში, (მოსამზადებელ პერიოდში),ჩაიცვით ის სპორტულული ტანსაცმელი და ივარჯიშეთ, რომლითაც მარათონის დღეს აპირებთ სირბილს. ეს დაგეხმარებათ,თავი იგრძნოთ კომფორტულად რბენის დროს.

იქონიეთ მანტრა! – ესაუბრეთ თქვენს თავს მარათონის განმავლობაში და გააძლიერეთ იგი. დაფიქრდით, რომელი ფრაზების მოსმენა უფრო მოგიმატებთ მოტივაციას და რთულ მომენტებში ხშირად გაუმეორეთ ისინი თავს. აუცილებლად უნდა იცოდეთ, რომ თქვენი ყველაზე დიდი გულშემატკივარი თქვენივე თავი შეიძლება იყოს.

როგორ მოვემზადოთ თბილისიმარათონისთვის?!  – მორბენლებს რჩევებს აძლევს ჰაიდელბერგცემენტ თბილისიმარათონის გარბენის დირექტორი, ამავდროულად პროფესიონალი მორბენალი და მწვრთნელი პიტერ გოთვალდი.

M: რამდენი ხანი შეიძლება შესვენება სირბილის დროს და რამდენად მართებულია ის?

რასაკვირველია, შეგიძლიათ შეისვენოთ და ამ დროის განმავლობაში იაროთ, თუმცა, გამოცდილი მორბენალი ცდილობს, მარათონი შესვენების გარეშე დაფაროს. თუმცა, თუკი მაინც გადაწყვეტთ, რომ შეისვენოთ, ეცადეთ, მაქსიმალურად მცირეხნიანი გამოგივიდეთ პაუზა, რადგანაც სირბილის თავიდან დაწყება ერთგვარი გამოწვევაა. სწორედ ამიტომ, გირჩევთ, მაქსიმალურად აირიდოთ შესვენებები რბენის დროს.

M: როდის ჯობს საკვების მიღება-მარათონამდე, მარათონის დროს თუ მარათონის შემდეგ?

სასურველია მარათონის წინა საღამოს მიირთვათ ნახშირწყლებით გაჯერებული საკვები, მაგალითად: პასტა, ბრინჯი ან კარტოფილი. უშუალოდ მარათონის დღეს კი, ორსაათნახევრით ადრე, კვლავაც ნახშირწყლები მიიღოთ, დაწყებამდე კი მიირთვით ბანანი. რაც შეეხება წყალს, მარათონის დაწყებამდე ოცი წუთით ადრე მიიღეთ მინერალური წყალი. სირბილის პროცესში კი, ყოველ ხუთ კილომეტრზე მაქსიმუმ 200 მლ წყლის დალევაა რეკომენდირებული. სირბილის დროს კვება სრულიად არასასურველია, რადგანაც ამგვარი დატვირთვის დროს საჭმლის მონელება ორგანიზმს არ შეუძლია. მარათონის შემდეგ კი, კვლავაც შეგიძლიათ მიიღოთ მინერალური წყალი და ნახშირწყლები და, ასევე, აუცილებლად მოერიდეთ ალკოჰოლს.

M: რა ტიპის სამოსი უნდა გვეცვას მარათონზე?

თბილისის ნახევარმარათონსა და 10 კილომეტრიან გარბენზე სასურველი იქნება, გეცვათ მოკლემკლავიანი ზედა და შორტები. ასევე, კარგი იქნება, თუ იმ ფეხსაცმელს ჩაიცვამთ, რომლითაც ზოგადად ვარჯიშობთ ხოლმე. გირჩევთ, რომ არ ჩაიცვათ ახალი ფეხსაცმელი. თუკი სირბილისას სამოსი დაგისველდებათ, ფინიშთან მისვლის შემდეგ აუცილებლად გამოიცვალეთ, რათა თავიდან აიცილოთ გაციება.

M: როგორ შეგვიძლია, საკუთარ თავს მოტივაცია მივცეთ სირბილის განმავლობაში?

გაამხნევეთ და  ხმამაღლა ესაუბრეთ საკუთარ თავს. არასდროს თქვათ მსგავსი ფრაზა: “ღმერთო ჩემო, კიდევ 5 კილომეტრი დამრჩა სარბენი!”, თქვით! – რა კარგია, უკვე 16 კილომეტრი დამიფარავს!”.  რაც უფრო კარგად ხართ მომზადებული და რაც მეტი გამოცდილება გაქვთ, ბევრად მარტივია სირბილი.

განხილვა