სოციალური მედიის რომელი ტრენდი გახსენდებათ? და თქვენი აზრით, კომპანიებიც რომ ჩაერთნენ, რამდენად გამართლებული იყო? თავად რას იზამდით მათ ადგილზე? ტრენდების ტემპი უკვე ძალიან დამღლელი გახდა და გადაწყვეტილების სწრაფად მიღებასაც მოითხოვს. აი, 15 წლის წინ კი მხოლოდ ორ კატეგორიად იყოფოდა, მასკულტურისა და ე. წ. მაგარი ბავშვების კულტურად. პირველი თუ რადიოსა და გაზეთების ყდებით გავრცელდა, მეორე მეტად ნიშური იყო, მაგალითისთვის სტადიონის კონცერტებზე კი არა, მიწისქვეშა მუსიკალურ ღონისძიებებზე დადიოდნენ.
შესაბამისად, ბრენდებისთვისაც მაგიური დრო იყო, რადგან გადაწყვეტილების მისაღებად მხოლოდ ზემოთ აღნიშნული ორი ვარიანტი ჰქონდათ — უნდა გადაეწყვიტათ, უფრო მეტ მომხმარებელზე მასკულტურით გავიდოდნენ თუ ნიშკულტურით. დღეს კი ასე ნამდვილად არ არის, უზომოდ ბევრი ტრენდი არსებობს და ბევრი არჩევანიც. ტერმინი ტრენდფლაციაც კი დაიბადა, რასაც McKinsley აღწერს, როგორც „მასობრივად წარმოებული ტრენდების ზრდას, რომლებსაც დაბალი კულტურული ღირებულება თუ გავლენა აქვს“.
ამიტომ, თუ აქამდე მხოლოდ ფინანსურ ინფლაციაზე გეფიქრებოდათ, ახლა „ტრენდფლაციაზეც“ უნდა იზრუნოთ, რომელიც სულ უფრო და უფრო იზრდება. უკვე კონტენტის კრიზისშიც ამოვყავით თავი და სწრაფადვე მივხვდით, რომ მეტი სულაც არ არის უკეთესი… და რა უნდა გააკეთოს ბრენდმა, როგორ აარჩიოს, რომელ ტრენდში მიიღოს მონაწილეობა ან როგორ განსაზღვროს მისი პოტენციური გავლენა?
ბიზნესებს უფრო ზუსტი გადაწყვეტილების მიღების პროცესის დამკვიდრებას ურჩევენ, რათა განსაზღვრონ, რომელი კულტურული მომენტი ღირს ბრენდის ქმედებად, იქნება ეს კომუნიკაციები, ახალი პროდუქტები და სერვისები თუ სხვა რამ. მარტივ ჩარჩოსაც კი გვიზიარებენ, რომელიც დაგეხმარებათ, გაიგოთ, რომელი ტრენდია ღირებული თქვენი ბიზნესისთვის და რომელი, არა. ამგვარად, სანამ თითოეულ ტრენდს განიხილავთ, დაწერეთ:
„ჩვენი აუდიტორია ღელავს X საკითხზე. მიზეზი, რის გამოც ისინი X-ზე ღელავენ Y-ია. ამ ტრენდში მონაწილეობის მიღებით, ჩვენს ბრენდს შეუძლია, Z-ით ჩვენი აუდიტორიის ცხოვრება უკეთესი გახადოს“.
მაგალითად — აუდიტორიას ღელავს ფულის დაზოგვის საკითხებზე. ხოლო მიზეზი ზოგადი ეკონომიკური და პერსონალური ფინანსური სიტუაციაა. ამ ტრენდში ჩართვით კი თქვენს ბრენდს აუდიტორიისთვის რეალური ფინანსური რჩევის შეთავაზებით მათი ცხოვრების გაუმჯობესება შეუძლია…
ეს განცხადება მრავალ შემოქმედებით შესაძლებლობასაც ბადებს. სამომხმარებლო ბანკის ბრენდმა, შესაძლოა, ინფლუენსერებთან ითანამშრომლოს, რათა მიმდევრებს თანხის დაზოგვის საუკეთესო პრაქტიკა გაუზიარონ ან თუნდაც ინვესტიციები ჩადონ ჩეტბოტში, რათა ახალგაზრდებმა კარგი საბანკო რჩევები მიიღონ… თუმცა ეს მხოლოდ ორი ვარიანტია და მათ კიდევ მრავალი რამ შეუძლიათ, ცადონ.
ამგვარად, თუ თქვენი ბრენდი კულტურულ დიალოგში ჩართვას განიხილავს, ეს მიდგომა გაითვალისწინეთ და გადაწყვეტილების მიღებაც ბევრად გაგიმარტივდებათ. მართალია, ეს ჩარჩო არც ტრენდების ზომას, არც პოპულარობას და არც ხანგრძლივობას განსაზღვრავს, მაგრამ ხელშესახებ ღირებულებას აწვდის თქვენს სამიზნე აუდიტორიას, როგორც ემოციურ, ისე ფუნქციურ დონეზე. ისიც გახსოვდეთ, რომ კულტურული ტრენდები ხშირად ბევრ სიმართლეს ჰფენს ნათელს, მათ შორის ადამიანების მოტივაციებზე, სურვილებსა თუ ღირებულებებზე გვიყვება, რომლებიც სწორედ ამ ტრენდებს განაპირობებს…
