არდადეგების მოახლოება გვახსენებს წიგნებს – იმ მაღალი ხარისხის ლიტერატურას, რომელიც თავისუფალ დროს გულისხმიერ მეგობრობას გვიწევს. ამ წელს, ივნისის დასაწყისში, თბილისელებს განსაკუთრებული შესაძლებლობა ეძლევათ – შინაარსიანად დააგეგმონ არდადეგები და თანაც, კარგი საქმეც გააკეთონ.
6, 7 და 8 ივნისს „ბაზარი“ გახდება ლიტერატურული ღონისძიებების ცენტრი, სადაც „წიგნის ბაზარი – არდადეგები“ მოვლენა წიგნის კულტურის მოყვარულებს და მოქალაქეებრივ აქტივობაში ჩართულ ადამიანებს ერთ სივრცეში შეხვედრის საშუალებას მისცემს.
პროექტის მთავარი ღირებულება მისი კომპლექსურობაშია – აქ ერთდროულად შეიძლება წიგნების შეძენა ხელსაყრელ ფასებში, ცნობილ ავტორებთან შეხვედრა და რეგიონული ბიბლიოთეკების მხარდაჭერაში მონაწილეობა. ღონისძიება „ბაზარის“, გიორგი კეკელიძის, „ბიბლუსისა“ და წიგნიერების გამავრცელებელი საზოგადოების ერთობლივი ძალისხმევით ხორციელდება. აღნიშნულ პროცესს, „ბაზართან“ ერთად, კურირებს გიორგი კეკელიძე, რომელიც პროექტის ოფიციალური ამბასადორი.
ღონისძიება სრულიად უფასოა, რაც მას ნებისმიერი ასაკისა და შემოსავლის მქონე ადამიანისთვის ხელმისაწვდომს ხდის. ამგვარი მიდგომა განსაკუთრებით მნიშვნელოვანია იმ დროს, როცა კულტურული ღონისძიებების ხელმისაწვდომობა ხშირად შეზღუდულია. დეტალებზე გიორგი კეკელიძე და „ბაზარის“ პიარ მენეჯერი ნატალი გოგიჩაიშვილი გვესაუბრნენ.
„ბაზარისთვის“ ეს განსაკუთრებული პროექტია, ამ ღონისძიებიდან სამ ძირითად მიმართულებას გამოვყოფდი. პირველი და უმნიშვნელოვანესი საქველმოქმედო მიზანია – 8 ივნისის ჩათვლით, სპეციალურად გამოყოფილ სივრცეში ვიზიტორების მიერ დატოვებულ წიგნებს პროექტის ამბასადორთან, გიორგი კეკელიძესთან ერთად რეგიონების ბიბოლიოთეკებს გადავცემთ. ამას გარდა, „ბაზარის“ სივრცეში „ბიბლუსთან“ თანამშრომლობით, 6, 7 და 8 ივნისს წიგნების გამოფენა-გაყიდვა და სალექციო სესიები გაიმართება. ჩვენ მუდმივად ვცდილობთ, რომ „ბაზარის“ მულტიფუნქციურ სივრცეში დროის ნაყოფიერად გატარებისთვის, გართობისა და დასვენებისთვის ყველა პირობა შევქმნათ და ეს პროექტიც ჩვენი ძალიან საინტერესო მიზნების ერთი ნაწილია. ვფიქრობ, დაგეგმილი ღონისძიებებით ვიზიტორები კმაყოფილი დარჩებიან და „ბაზარისა“ და „ბიბლუსის“ თანამშრომლობა ამ კუთხით სისტემატურ სახეს მიიღებს“, – განაცხადა ნატალი გოგიჩაიშვილმა.
M: უკვე არაერთი წელია ამ საქმით ხართ დაკავებული – რატომ არის მნიშვნელოვანი რეგიონული ბიბლიოთეკების მხარდაჭერა?
„წიგნიერების გამავრცელებელი საზოგადოება“ სხვა სახელითა და ფორმით, 2012 წელს დავაფუძნე ეროვნულ ბიბლიოთეკაში – მაშინ „ეკვილიბრიუმი“ ერქვა. ბიბლიოთეკის მოსაწყობად, ორიათასზე მეტ სოფელში ჩავიტანეთ წიგნი, კომპიუტერი თუ სხვა აუცილებელი ნივთი.
იმ ადამიანებმა ზუსტად იციან, რა მნიშვნელობის ინსტრუმენტია წიგნი სხვა პრობლემების დასაძლევად, ამიტომაც ყოველდღიურად ათიათასობით წერილს ვიღებ სკოლის მოსწავლეებისგან და მასწავლებლებისგან ახალი წიგნების მოთხოვნის სურვილით.
2024 წელს, როცა ეროვნული ბიბლიოთეკიდან წამოვედი, სწორედ ირაკლი თევდორაშვილი და ირაკლი გაგნიძე შემხვდნენ და მითხრეს, რომ „ბიბლუსში“ ეს საქმე ახალი ძალისხმევით გაგვეგრძელებინა – ასე დაიბადა „წიგნიერების გამავრცელებელი საზოგადოება“. 2500 სოფლის ბიბლიოთეკა მოვიარეთ უკვე და წინ დიდი გეგმები გვაქვს.
M: 8 ივნისს თქვენი ლექცია ეძღვნება საბავშვო ლიტერატურას. როგორ უწყობს ხელს ეს ღონისძიება ახალგაზრდებში კითხვის ტრადიციის განვითარებას?
ეს ლაპარაკი დიდწილად ჩემს წიგნს „თომას ზღაპრებს“ შეეხება, თუმცა ზოგად ნაწილსაც იგულისხმებს – რამდენად მნიშვნელოვანია ლიტერატურა ბავშვისთვის, როგორც აქამდე დაგროვილი მეხსიერების ჯამი, განცდის და ცოდნის კრებული, რომელიც მის ცნობიერებას, სამომავლოდ, დიდ საყრდენად შეიძლება ექცეს.
M: როგორ აფასებთ „წიგნის ბაზარი – არდადეგების“ როლს ქართული ლიტერატურული კულტურის განვითარებაში?
იმედი მაქვს, ეს ფესტივალი ტრადიციულად ღონისძიებად იქცევა. თაობებისთვის ზაფხულს წიგნის სუნიც ჰქონდა – გვინდა ეს ამბავი გავაღვიძოთ და ახალ თაობასაც გადავცეთ. ფესტივალის სლოგანი სწორედ ამ განზრახულობითაა შექმნილი – „დაისვენე შინაარსიანად“
მიხარია, რომ ბაზარი ორბელიანის ინიციატივით წიგნებიც შეგროვდება და სოფლის ბიბლიოთეკებს გადაეცემა.
[R]
