ამერიკაში, ნიუ-იორკის რესტორანში, AVRA Madison გამართულ ვახშამზე წინანდლის მამულის ღვინოების ოფიციალური დებიუტი შედგა. ღონისძიებას მასპინძლობდნენ კომპანია „წინანდლის მამული”, ექსკლუზიური ალკოჰოლური სასმელების პოპულარიზაციის პლატფორმა Haute Wine Society და ჟურნალი Haute Living. ვახშამს ესწრებოდნენ ცნობილი ადამიანები და ამერიკელი ღვინის კოლექციონერები, მათ შორის, ნიუ-იორკის მერი ერიკ ადამსი, ცნობილი შეფმზარეული ტოდ ინგლიში, ჟურნალ Time-ის რედაქტორი მოლი ბოლი, Fox Business-ის თანაწამყვანი შერილ კასონი, ცნობილი ამერიკელი მევიოლინეები ჯოშუა ბელი და ფილიპ ქუინთი, წინანდლის ფესტივალის თანადამფუძნებელი მარტინ ენგსტრომი და მრავალი სხვა. წინანდლის ღვინოების გარდა, ვახშამი გამოირჩეოდა ნამდვილი ქართული სტუმართმოყვარეობით და ტრადიციული ქართული სადღეგრძელოებით.
წინანდლის მამულის თანადამფუძნებლებმა, გიორგი რამიშვილმა და ერკინ ტატიშევმა, ისევე, როგორც კომპანიის სხვა წარმომადგენლებმა, ისაუბრეს მამულის უნიკალურ ისტორიაზე, გამორჩეულ ღვინოებზე და ქართული მეღვინეობის უძველეს ტრადიციებზე.
„ჩვენს ამერიკელ მეგობრებთან ერთად აღვნიშნეთ წინანდლის ღვინოების ოფიციალური ჩამოსვლა ამერიკის შეერთებულ შტატებში. მოხარული ვართ, რომ ჩვენი ღვინოები წარმოდგენილი იქნება ნიუ-იორკში. მადლობელი ვართ, რომ გვესტუმრა ნიუ-იორკის მერი ბატონი ერიკ ადამსი და სხვა არაჩვეულებრივი ადამიანები. წარმოუდგენელია უკეთესი გარემო და უკეთესი სტუმრები ჩვენი ღვინოების ნიუ-იორკში წარსადგენად“, – აღნიშნა გიორგი რამიშვილმა.
წინანდლის მამულის ღვინოების გაყიდვის დაწყება მიმდინარე წლის დეკემბრიდან ყველაზე პრესტიჟულ ღვინის მაღაზიებსა და ნიუ-იორკის ყველაზე რეიტინგულ რესტორნებში იგეგმება.
[პარტნიორის კონტენტი]
