ელფოსტა დუმს. WhatsApp-ის წკაპუნიც არ გაწუხებთ. ინვოისი გაგზავნილია, მაგრამ თანხა არ ჩარიცხულა. ეს ყველაფერი კი თქვენს გულისცემას აჩქარებს – ნაცნობი სიტუაციაა, არა?
როდესაც კლიენტები გაფრთხილების გარეშე ქრებიან, ეს არა მხოლოდ იმედგაცრუებაა, თქვენს თავში ჩნდება კითხვები, თუ რა მოხდა, რა დააშავეთ, რა შეგეშალათ. თქვენ მარტო არ ხართ, ეს შეგრძნება ყველას გამოგვიცდია, ვისაც კლიენტებთან გვაქვს შეხება და რაიმე სერვისს ვაწვდით, ამიტომ მოდი, ვისაუბროთ, როგორ შევინარჩუნოთ სიმშვიდე მსგავს სიტუაციაში.
პირველ რიგში, ღრმად ისუნთქეთ
სანამ თვითდაეჭვების მორევში ჩაეფლობით, გაიხსენეთ, რომ კლიენტების წარმოდგენა შეიძლება იყოს განსხვავებული და საქმე მათშია და არა იმაში, რომ თქვენ რაღაცას ცუდად აკეთებთ.
მიზეზი ბევრია: შეიძლება მათ ბიუჯეტს გადახედეს და მიხვდნენ, რომ არ აწყობთ; შეიძლება მას, ვინც თქვენ გეკონტაქტებოდათ, მოსწონდა თქვენი პროექტი, მაგრამ საქმე საქმეზე რომ მიდგა და ის სხვებმაც განიხილეს, აზრთა სხვადასხვაობა გაჩნდა (და ეს იმაზე ხშირად ხდება, ვიდრე თქვენ წარმოგიდგენიათ); ზოგიერთებს კი უბრალოდ აინტერესებთ საბაზრო ფასები და ამიტომ გეკონტაქტებიან, შემდეგ კი, სათქმელი რომ არაფერი აქვთ, უბრალოდ გაუჩინარებას ამჯობინებენ.
არ იფიქროთ, რომ ეს მხოლოდ თქვენ გემართებათ და ცნობილ დიზაინერებს, კრეატორებს, პროგრამისტებს და ნებისმიერ სხვას ამას „ვერ უბედავენ”. რეალური მიზეზი ერთია – არაპროგნოზირებად სამყაროში კრეატიული ბიზნესის წარმოების საფრთხე, რომელიც ხან გაამართლებს, ხან არა. არავის აუყვანია 100-დან 100 კლიენტი.
შემდგომი ქმედებები
რას ვაკეთებთ იმის შემდგომ, როცა კლიენტი აღარ ჩნდება? როდესაც დუმილი პასუხის გაცემის ყველა რეალურ დროს სცდება, სტრატეგიული მოქმედების დრო დგება.
შეგიძლიათ, გაუგზავნოთ წერილი, რომლის შინაარსშიც აღნიშნული იქნება, რომ უბრალოდ ბოლოს გაგზავნილ წერილზე პასუხის არმიღების მიზეზი გაინტერესებთ და თუ თანამშრომლობას არ აპირებენ, სთხოვეთ, საქმის კურსში ჩაგაყენონ, რადგან სხვა საქმეები დააპრიორიტეტოთ.
შინაარსი უნდა იყოს თავაზიანი, მაგრამ ისე არ უნდა იკითხებოდეს, თითქოს ნერვიულობთ და აქეთ ებოდიშებით.
კიდევ ერთი, აუცილებლად გასათვალისწინებელი ფაქტორი – დრო. ნუ დაელოდებით კვირების განმავლობაში, რადგან ეს იმაზე მიანიშნებს, რომ თქვენს ბიზნესს სერიოზულად არ უყურებთ. ნურც ყოველდღე შეაწუხებთ. საუკეთესო ვარიანტია დაახლოებით 1-კვირიანი დუმილის შემდეგ შეხმიანება.
როგორ დავიცვათ თავი სხვა დროისთვის
მიუხედავად იმისა, რომ კლიენტის ქცევის კონტროლი შეუძლებელია, თავდაცვის გარკვეული მექანიზმი მაინც არსებობს.
პირველი, ეს არის ავანსი. თუ კლიენტი ყოყმანობს ან სახე ეჭმუჭნება, როგორც კი 10 ან 20%-ის ჩარიცხვას სთხოვთ (ეს თქვენს პოლიტიკაზეა დამოკიდებული), ეს იმას ნიშნავს, რომ ის ბოლომდე დარწმუნებული არაა, არ გადაუწყვეტია, დაგიკვეთოთ თუ არა და სხვა ვერსიებსაც განიხილავს. ის კი, ვისაც თანხა აქვს დატოვებული, ნაკლები შანსია, რომ ადგეს და გაქრეს.
დაუთმეთ დრო კონტრაქტს
კარგი კონტრაქტი განსაზღვრავს, თუ რა მოხდება, როცა პროექტები გადაიდება, გაუქმდება ან შეიცვლება. ამიტომ, აუცილებლად დეტალურად აღწერეთ დასრულების დრო, საფასური, გადახდის პირობები და კომუნიკაციის მოლოდინი. როდესაც კლიენტებმა იციან, რომ მათ გაქრობას შედეგები მოჰყვება, ისინი უფრო მეტი ყურადღებით არიან.
დაყავით გადახდა ეტაპებად
გადახდის დასრულებამდე ლოდინის ნაცვლად, დიდი პროექტები დაყავით ნაწილებად და თითოეულ ეტაპზე საერთო თანხის პროცენტი გადაახდევინეთ. ეს ორივე მხარეს ჩართულობას შეინარჩუნებს და შეამცირებს თქვენს ფინანსურ რისკს, თუ საქმეები არასწორად წავა.
გახსოვდეთ, რომ სწორი კლიენტები, რომლებიც პატივს სცემენ თქვენს საქმეს, დროულად იხდიან და პროფესიონალურად ურთიერთობენ, არსებობენ. ისინი ახსნა-განმარტების გარეშე არ ქრებიან. განაგრძეთ თქვენი საქმიანობის წარმოჩენა, პორტფოლიოს განახლება, მოწესრიგება და არ ინერვიულოთ, თუ რომელიმე დამკვეთი არ ჩანს, რადგან ამ ნერვიულობამ ხელი შეიძლება რეალური კლიენტის მოძიებაშიც შეგიშალოთ.
