როგორც დიზაინერმა, წარმოიდგინეთ, რომ დამკვეთს თქვენ მიერ შემუშავებული კამპანია წარუდგინეთ, რომელშიც სრულიად დარწმუნებული ხართ. ამის მიზეზიც გაქვთ, თქვენ ხომ ზედმიწევნით მიჰყევით ბრიფს, ყველა საკითხს გადახედეთ და ყველაფერი ლამაზი დიზაინით შეფუთეთ.
მოკლედ, ეს კარგად შესრულებული სამუშაოა. კლიენტებიც იღიმიან, ერთმანეთს თავს უქნევენ და მადლობას გიხდიან მთელი შრომისთვის. შემდეგ კი დამკვეთი გეუბნებათ სიტყვებს, რომლებიც სიცოცხლის ბოლომდე მწარედ გემახსოვრებათ: „თავს სრულიად უსაფრთხოდ ვგრძნობ“.
ალბათ, ახლა გიკვირთ, რატომ უნდა გეწყინოთ ამის მოსმენა, მაგრამ დიზაინერი სწორედ ის არის, ვინც კლიენტს თავის „არაკომფორტულად“ უნდა აგრძნობინოს. ცოტა შეაშინოს კიდეც. ფაქტობრივად, ეს ამ სამუშაოს აღწერილობის ნაწილია: „კლიენტები ძლიერი კრეატიულობით უნდა დააფრთხოთ და არაუსაფრთხო გარემო შეუქმნათ“.
გამოწვევა და არა, გარიგება
როგორც ნებისმიერ ურთიერთობაში, ადვილია რუტინის ქსელებში გახვევა — მით უმეტეს, მაშინ, როცა საქმის კეთების თანმიმდევრული გზა არსებობს. თანაც, კლიენტთან ურთიერთობისას, როგორც წესი, დიზაინერი კარგად იცნობს მის ბიზნესს, იცის, რა მოსწონს და რას მოითხოვს… შესაბამისად, პროცესი ავტომატურ სახეს იღებს და დიზაინერიც წყვეტს დამოუკიდებელი ექსპერიმენტების ჩატარებას.
ვინაიდან, დიზაინერი კომფორტის ზონაშია, იგი ნამუშევარს უშუალოდ იმისთვის ქმნის, რომ დამკვეთს მოეწონოს და არა იმისთვის, რომ სამიზნე აუდიტორიამდე მიიტანოს რაღაც ინოვაციური. შედეგი? სამუშაო, რომელიც წესებს მიჰყვება, ნაცვლად მათი შეცვლისა, კლასიკური დათვის ხაფანგს წააგავს და კარგად მუშაობს, ვიდრე მარკეტინგის ახალი ხელმძღვანელი არ გამოჩნდება.
უსაფრთხოებაში ცუდი არაფერია. რამდენიმე საუკეთესო რეკლამას შეიძლება „უვნებელიც“ ვუწოდოთ, თუ უაზრო, პროგნოზირებადი და მომაბეზრებელი არ გახდება. სამართლიანობისთვის, ეს ალბათ აღწერს თანამედროვე რეკლამის დიდ უმრავლესობას. მაგრამ როგორც დეივ ტროტი გამუდმებით გვახსენებს, რეკლამაში თანხის 90% იმიტომ იხარჯება, რომ საზოგადოებაში შეუმჩნეველი ან დავიწყებულია.
გამოდით კომფორტის ზონიდან
„დამკვეთი მამაცი უნდა იყოს“, — ამის თქმა ძალიან ადვილია, როცა საქმე თქვენს ფულს და ბიზნესს არ ეხება. ამიტომ, როცა გამოწვევა და კომფორტის ზონიდან გასვლა გჭირდებათ, ეს კლიენტთან შეთანხმებით უნდა გააკეთოთ. უბრალოდ, ძალიან რთულია კლიენტებისთვის დაინტერესებული მხარეების მართვა და კონსენსუსის მიღწევა.
თუმცა „უსაფრთხო“ იდეებზე თანამშრომლობამ შეიძლება წარუმატებლობამდე მიგიყვანოთ. შესაბამისად, უმჯობესია, „ერთად ჯოჯოხეთურად მძიმე მუშაობა გაიაროთ“ და დიდი ჯილდო მიიღოთ.
