ზოგადი აზრით, მარკეტერები ვალენტინობის დღეს კომერციულად მომგებიან პერიოდად თვლიან, თუმცა ყველაზე მნიშვნელოვანი მაინც იმაზე დაკვირვებაა, როგორ აღნიშნავენ მას თქვენი მომხმარებლები, ან საერთოდ აღნიშნავენ თუ არა ამ დღეს.
შესაბამისად, ისმის კითხვა – ვალენტინობა მარკეტერებისთვის საოცნებო დღეა თუ პირიქით, დილემა? რეალობა ისაა, რომ ტრადიციული რომანტიკული ნარატივები ყველაზე ერთნაირად აღარ მოქმედებს. სულ უფრო იზრდება იმ მომხმარებლების რაოდენობა, რომლებიც უარს აცხადებენ ამ დღის აღნიშვნაზე და არც განსაკუთრებულად ემზადებიან მისთვის. ამიტომ მათ არც საჩუქრები ადარდებთ, არც ბრენდების შეთავაზებები. ბევრისთვის ერთგვარი ზეწოლაც კია მთელი ეს სარეკლამო ბანერები და შეტყობინებები, რომლებიც კომპანიებისგან მოდის, ბევრისთვის კი იმის შეხსენებაა, რომ მარტოხელაა და სასიყვარულო პარტნიორი არ ჰყავს. ამის საპასუხოდ, ზოგიერთმა ბრენდმა, მაგალითად, ტკბილეულის მწარმოებელმა გამოუშვა შოკოლადის ყუთი მარტომყოფი ადამიანებისთვის.
ამის მიუხედავად, რამდენიც არ უნდა ვილაპარაკოთ ცვლილებებზე, ვალენტინობა იყო და რჩება მიმზიდველ დღედ ბრენდებისთვის, მას მოაქვს შემოსავალი და როგორც მცირე, ისე დიდი ბიზნესისთვის. საჭიროა, უბრალოდ, მარკეტერებმა გადახედონ თავიანთ აქტივობებს და თანამედროვე სეგმენტის ნაირგვარობა კარგად შეისწავლონ.
ტრადიციები ცვლილებების პირისპირ
ვალენტინობის დღე, ისევე როგორც ბევრი სეზონური მარკეტინგული დღესასწაული, დაფუძნებულია დიდი ხნის განმავლობაში დამკვიდრებულ სოციალურ ნორმებში. ათწლეულების განმავლობაში ბრენდები სთავაზობდნენ მომხმარებლებს წითელ ვარდებს, დეკორაციულ სანთლებს, თემატურ, ეტიკეტიან ღვინოს და სხვა.
კულტურული დამოკიდებულების განვითარებასთან ერთად, ასევე, უნდა შეიცვალოს მარკეტინგული მიდგომაც. ბრწყინვალე მაგალითია Toblerone და მისი 2023 წლის კამპანია „Love Insurance”. მისი იდეა იყო შოკოლადის შეზღუდული გამოცემა, რომელსაც მოჰყვებოდა მესიჯი „დააზღვიე შენი სიყვარული”.
მომხმარებელი უფრო „განათლებულია”, ვიდრე ადრე
დღეისათვის მომხმარებელს უფრო მეტი ცოდნა აქვს იმის შესახებ, ვინ არის მომხმარებელი და რა არის ბრენდი. ამიტომ ისინი უფრო კარგად ერკვევიან, შეესაბამება თუ არა ბრენდის შეტყობინებები მის ღირებულებებს; ასევე აკვირდებიან, როგორი პოზიციონირება ჰქონდათ ბრენდებს მთელი წლის განმავლობაში. მხოლოდ ვალენტინობის დღეს თუ გადაწყვიტეთ სიყვარულსა და პოზიტივზე ლაპარაკი, მომხმარებელი ამას აუცილებლად შეამჩნევს.
მარკეტერები გვირჩევენ აუდიტორიის სწორად შერჩევასაც და გვასწავლიან დამაფიქრებელ ფრაზას, რომელიც უნდა დავიმახსოვროთ: „ჩვენ იმდენად მონდომებულები ვართ, ყველას მივმართოთ, რომ საბოლოოდ არავის მივმართავთ”.
ვალენტინობის დღე მხოლოდ ერთი მაგალითია იმისა, თუ როგორ აყალიბებს კულტურა კომერციას – და პირიქით. იგივე შეგვიძლია, ვთქვათ სხვა დღესასწაულებთან დაკავშირებით. მაგალითად, შობას ადრე ყოველთვის აჩენდნენ, როგორც საოჯახო დღესასწაულს, ოჯახის წევრების ერთად შეკრებას, თუმცა დღევანდელი ტენდენციებით, ის შეიძლება მომხმარებელს მივაწოდოთ, როგორც სოლოდღესასწაულიც, რადგან არსებობენ მომხმარებლები, რომლებიც მარტონი ხვდებიან მას.
დასკვნის სახით ისიც უნდა ითქვას, რომ კულტურული ძვრები არ ნიშნავს მაინცდამაინც არსებული მიდგომების მოძველებას, უბრალოდ, ისინი მოითხოვს, რომ ბრენდები შეხვდნენ მომხმარებლებს იქ, სადაც ახლა არიან და არა იქ, სადაც იყვნენ ათწლეულების წინ.
ბოლოსთვის გიტოვებთ GUCCI-ს, ცნობილი მოდის სახლის ახალ სავალენტინობო ვიდეოს, რომლითაც ბრენდმა გამოიყენა ტრადიციული მარკეტინგული მომენტი, რათა შეექმნა მოკლე, ავთენტური ისტორიები და ესაუბრა ბრენდის ყველა შესაძლო აუდიტორიაზე, არა მხოლოდ ერთ სეგმენტზე.
