რას ნიშნავს იყო ჯანმრთელი? WHO-ს კონსტიტუციის მიხედვით, ჯანმრთელობა ფიზიკურ, მენტალურ და სოციალურ კეთილდღეობას მოიაზრებს და არა მხოლოდ დაავადების სიმპტომების არ არსებობას. თუმცა, სწრაფი და სტრესული ცხოვრების პირობებში, ჯანმრთელობაზე პრევენციული ზრუნვა მთავარ გამოწვევად რჩება და უფრო ძირეულ – ჯანმრთელობაზე ზრუნვის კულტურის ცვლილებას მოითხოვს.
ევექსი ჰოსპიტლებმა ბრენდის ახალ სტრატეგიასა და ვიზუალურ იდენტობაზე მუშაობა თითქმის ორი წელია რაც დაიწყო და ახალი სახელწოდებით – ვიან (Lat.: სიცოცხლით სავსე) მოგვევლინა. ბრენდმა მისიად დაისახა განავითაროს ჯანმრთელობაზე ზრუნვის კულტურა მისი თანამშრომლების, მომხმარებლების და საზოგადოების ცხოვრების ხარისხის გასაუმჯობესებლად.
ბრენდის სტრატეგიაზე ბრიტანელმა კონსულტანტმა ნიკ კეპელ-პალმერმა იმუშავა (The Good Growth Company თანადამფუძნებელი, Wolff Olins სტრატეგი), სახელდებაზე – კრეატიულმა ლიდმა ირინა საყვარელიძემ, ხოლო ვიზუალურ იდენტობაზე – იტალიურმა დიზაინ სააგენტო DINN!-მა.
M: როგორ მიხვედით რებრენდინგის გადაწყვეტილებამდე და როგორი იყო ახალი ბრენდის ხედვა?
ლევან გიორგაძე, ვიანის გენერალური დირექტორის მოადგილე: ჩვენი ბრენდის ახალი სტრატეგია ადამიანებთან გრძელვადიანი ურთიერთობის განვითარებას გულისხმობს და არა მხოლოდ „დაავადებების მართვას“. ვიანი ადამიანების ყოველდღიურობის ნაწილი, სანდო მრჩეველი და ჯანმრთელობის გრძელვადიანი პარტნიორი იქნება: პოზიტიური და მამოტივირებელი მიდგომით, პრევენციული ჯანმრთელობის პოპულარიზაციით, განათლების და ცნობიერების ამაღლებით. გვჯერა, რომ ჩვენი, როგორც ბრენდის როლი სწორედ ადამიანების მხარდაჭერა და მოტივირებაა, მცირე ნაბიჯებით ყოველდღიურად იზრუნონ საკუთარ ჯანმრთელობაზე. ეს კი საკმაოდ მარტივია, განსაკუთრებით მაშინ როდესაც ინფორმირებული ვართ.
M: რა იყო ამოსავალი წერტილი ვიანის ბრენდინგის სტრატეგიაზე მუშაობისას?
ნიკ კეპელ-პალმერი, სტრატეგი: ბრენდის სტრატეგიაზე მუშაობა კვლევით დავიწყეთ, იმისთვის, რომ განგვესაზღვრა თანამშრომლების დამოკიდებულება ბრენდის მიმართ, მათი ხმა და რეალური ამბები მოგვესმინა. დიდი დრო გავატარეთ ქსელის ჰოსპიტლებში, საქართველოს სხვადასხვა რეგიონში. აღმოვაჩინეთ, რომ თანამშრომლების მთავარ მოტივაციას სხვა ადამიანებზე ზრუნვა წარმოადგენდა, ჰოსპიტლის კედლებთანაც კი განსაკუთრებულ ემოციურ სიახლოვეს გრძნობდნენ. იხსენებდნენ პანდემიის პერიოდს, როდესაც სიცოცხლისთვის ბრძოლაში ჰუმანურობით და ერთიანობით უპასუხეს მსოფლიო გამოწვევას. სწორედ ამ სამმა საკვანძო ფაქტორმა შთაგვაგონა სტრატეგიის შემუშავებისას: სიცოცხლე, ერთიანობა და ჰუმანურობა.
ვიანს საფუძვლად სიცოცხლე უდევს. ეს არ არის გზა, რომელიც ადამიანებს სიკვდილისგან იხსნის, არამედ გზა, რომელსაც ადამიანები უფრო ხანგრძლივი სიცოცხლისკენ მიჰყავს და პროაქტიულ მიდგომას გულისხმობს ჯანმრთელობის მიმართ.
ზოგადად, ადამიანები ექიმთან მისვლისგან თავს იკავებენ, უჭირთ განსაზღვრა, თუ რომელ ექიმს მიმართონ, ერიდებიან ვიზიტს სანამ თავს ძალიან ცუდად არ იგრძნობენ. შევამჩნიეთ, რომ გამოწვევა სისტემურია. საინტერესოა, თავად „ჰოსპიტალს“ როგორ აღიქვამენ სხვადასხვა კულტურაში – უმეტესად სიტყვა გულისხმობს „უსაფრთხო და გამოჯანმრთელებისთვის განკუთვნილ ადგილს“, თუმცა ქართულად ის განიმარტება „დაავადებული ადამიანებისთვის განკუთვნილ ადგილად“.
ბრენდის მიზანია, შევცვალოთ ადამიანების შეხედულება, მათი დამოკიდებულება ჯანმრთელობის მიმართ, გავხადოთ ისინი უფრო პროაქტიული, ავამაღლოთ ცნობიერება და განათლება. იმისთვის, რომ ადამიანებმა, თუნდაც მცირე ნაბიჯების გადადგმით მუდმივად იზრუნონ ფიზიკურ, მენტალურ თუ სოციალურ სიჯანსაღეზე. ეს მიდგომა ჰოსპიტალური ბიზნესიდან ჯანმრთელობის ბიზნესად გვაქცევს, რაც უზარმაზარ შესაძლებლობებს ხსნის ჩვენ წინაშე. ზოგადად ჯანდაცვა ფართო და პოზიტიური სამოქმედო არეალია.
M: როგორია Vian, როგორც ბრენდი?
ლევან გიორგაძე: ზოგადად, სტრატეგიული მიდგომა ბრენდინგში დაგვეხმარა შინაარსიანი ბრენდი შეგვექმნა, რომელიც ჩვენი ერთგვარი DNA-ა. ვიანი პოზიციონირებს როგორც სიცოცხლით სავსე ბრენდი – ბრენდი სავსე ცხოვრებისთვის. სავსე ცხოვრება კი ჯანმრთელობაზე ჰოლისტურად ზრუნვას მოიაზრებს, როგორც ფიზიკური, ისე ემოციური თუ სოციალური სიჯანსაღის კუთხით, რაც საბოლოოდ ადამიანების ცხოვრების ხარისხის გაუმჯობესებაზე ახდენს მნიშვნელოვან გავლენას. ყველასთვის ხელმისაწვდომი სამედიცინო სერვისებით დაწყებული ისტორია, ჯანმრთელობაზე ზრუნვის ახალ ეტაპზე გადასვლით გაგრძელდება – ეტაპით, როდესაც ბრენდი მუდამ თქვენს გვერდითაა და დაავადებების მკურნალობის გარდა ყოველდღიურად გეხმარებათ ჯანმრთელობაზე ზრუნვაში.
M: როგორ მოარგეთ ვიზუალური იდენტობა ბრენდის სტრატეგიას?
ანდრეა ბორსეტო, სააგენტო DINN!-ის თანადამფუძნებელი: DINN! კომპანიის საფუძვლიანი ცვლილებების პროცესში ჩაერთო, როდესაც ის ახალი მიმართულებით იწყებდა მოძრაობას. ჩვენ აქამდეც გვქონია ქართულ კომპანიებთან თანამშრომლობის გამოცდილება, ამდენად, ბრენდის საყრდენი წერტილების ვიზუალურ კონცეფციად გარდაქმნა მოგვანდეს, რასაც ჯანმრთელობისადმი კომპანიის სრულიად ახალი მიდგომა უნდა გამოეხატა.
მიდგომა, რომელიც სამედიცინო მხარდაჭერას სცდება, საჭიროებდა ბრენდის ისეთ ვიზუალურ იდენტობას, რომელიც ხანგრძლივი, ჯანსაღი და ბედნიერი ცხოვრების გამომხატველი იქნებოდა.
ვიანს აქვს ორი ურთიერთდაკავშირებული სული. არის „სიცოცხლით სავსე“, ემპათიური, ოპტიმისტური და მშვიდი მხარე, მეორე მხრივ, სამედიცინო დაწესებულება, რომელიც პროფესიონალური, სანდო და მაღალი სტანდარტების გამტარებელია. ვიზუალური თვალსაზრისით, ძალიან გვინდოდა გამოგვეხატა ორივე მხარე, მეტაფორულად, წარმოგვედგინა ჯანმრთელობის მოვლის განსხვავებული კულტურა. შთაგონება აღმოვაჩინეთ ანრი მატისის ნახატში „ცეკვა (II)“, სადაც ადამიანები თავისუფლად ზეიმობენ ცხოვრებას ერთ-ერთი ყველაზე ძლიერი და ბუნებრივი აქტით, ცეკვით, ზეიმით…
M: როგორ გამოხატავს ვიზუალური სიმბოლიკა ბრენდის შინაარსს?
ანდრეა ბორსეტო: ამდენად, ლოგო ასახავს ორი ადამიანის ცეკვას, ორ მხარეს, დინამიკურ და ენერგიულ მომენტს, რომელიც მათ აკავშირებს. ისინი ქმნიან წრეს, როგორც ფოკუსისა და სიზუსტის სიმბოლოს. რაც შეეხება ფერებს, რბილი გარდამავალი ფერებით გამოვხატეთ მზის ამოსვლის სინათლე, როგორც თითოეული ადამიანის რუტინის კონკრეტული მომენტი. მზის ამოსვლის თბილი შუქი განსაზღვრავს ნათელი მომავლის დასაწყისს. დილის ფერები ავრცელებს ენერგიას, სიმშვიდესა და ოპტიმიზმს, მომავალი დღისთვის. ვიანი იმავე განწყობას უზიარებს ადამიანებს, მათზე ორიენტირებული მიდგომით. თავად წარწერა ვიანის ასოებიც არის დაბალანსების, სიმშვიდისა და თანამედროვეობის ელემენტი, რომელიც სიმყარესა და ნდობას გამოხატავს.
ვიანის ბრენდი თანამშრომლებისთვის ზღვის დონიდან 2,800 მეტრზე, გამთენიისას 06:12-ზე გუდაურის მთაზე დაიბადა. ახალი დღის და ამომავალი მზის ენერგიით გაერთიანებული ადამიანების, ერთიანობის, ოპტიმიზმის და სიცოცხლით სავსე ბრენდის დაბადების ამბავი ემოციურ კადრებად აისახა:
სააგენტო: Metro Production
