გასული საუკუნიდან დღემდე ბევრი რამ შეიცვალა, თუმცა, როგორც მაშინ იყო ვიდეორეკლამა ერთ-ერთი ყველაზე მიმზიდველი მარკეტინგული იარაღი, ისეა დღესაც. ის არის მომხმარებელთა ჩართულობისა და ბრენდის მიერ დამაჯერებელი შეტყობინებების მიწოდების მძლავრი ინსტრუმენტი. დაწყებული მოკლე, სახალისო თუ სოციალურ თემატიკაზე აგებული სცენარებით, ციფრული სტრიმინგების გზით ამბის თხრობამდე – ვიდეორგოლები მომხმარებელთან ემოციური კავშირის დასამყარებლად უბადლო საშუალებაა.
ჩვენი რესპონდენტი, ეკა ყიფიანი, JWT Metro-ს კრეატიული დირექტორი და არაერთი ცნობილი ვიდეორეკლამის შემოქმედებითი ხელმძღვანელია. ამიტომ სწორედ მასთან ვისაუბრეთ იმ თემაზე, როგორიცაა: ვიდეორეკლამის შექმნა, იდეიდან აღსრულებამდე.
M: ბოლო წლებში არაერთი კრეატიული და საინტერესო ვიდეორგოლი შეიქმნა საქართველოში, მათ შორის, თქვენი უშუალო ჩართულობით. გვესაუბრეთ, როგორ ხდება მსგავს პროექტებზე მუშაობა, რით განსხვავდება სხვა ტიპის კამპანიებისგან და ა.შ.
საინტერესოა თუ უინტერესოა პროექტი, უმეტესწილად ჩვენზეა დამოკიდებული, ამიტომ ყველა პროექტი თავისი არსით არის საინტერესო. კრეატიული სააგენტოს სიტყვათაწყობის პირველივე სიტყვა გვეუბნება, რომ ჩვენი საქმეა კრეატიულის მოფიქრება.
რადგანაც ყველა პროექტი ახალი და თავისებური უნდა იყოს – მათზე სამუშაო გამოცდილებაც სულ სხვადასხვანაირია. ესაა ალბათ ამ ინდუსტრიის ხიბლი და თან სირთულეც. რაც არ უნდა დიდი გამოცდილება გქონდეს, სულ (წესით) აკეთებ რაღაცას პირველად.
M: აღგვიწერეთ პროცესი – რა გზას გადის ვიდეორგოლი, იდეიდან აღსრულებამდე?
პირველ ეტაპზე ხელში ვიჭერთ კრეატული ბრიფს (ანუ დავალებას), გუნდებად ან ინდივიდუალურად ვუდგებით კონცეფციების მოფიქრებას. ამ ეტაპზე ვერსიების რაოდენობასა და მრავალფეროვნებას დიდი მნიშვნელობა აქვს.
ხან ისე ხდება, რომ კლიენტთან პირველადი განხილვა სწორედ ამ მიმართულებებით ხდება. ხანაც ისე, რომ უკვე სახემიცემული სცენარებით ვხვდებით. ეს ყველაფერი ბევრ რამეზეა დამოკიდებული: როგორ ვიცნობთ კლიენტს, რამდენი დრო გვაქვს და ა.შ.
სახემიცემული სცენარი უკვე მიდის პროდაქშენში. ამ ეტაპზე, სცენარის ხასიათიდან გამომდინარე, იკვრება გადამღები ჯგუფი და მიდის ამ სცენარის დეტალური დამუშავება, პირველ რიგში, რეჟისორთან და პროდიუსერებთან ერთად. უნდა გავიაროთ ყველა დეტალი: სტილი, ხასიათი, ხმოვანი გაფორმება, კასტინგი, ლოკაციები, მხატვრობა…
M: რა როლი აქვს სამუშაო პროცესში დამკვეთს, მასთან ერთად თუ გადიხართ იდეებს და თუ შეაქვს თავისი კორექტივები?
ეს პროცესი ორმხრივია. რაც უფრო დიდია ურთიერთნდობა და მსგავსია ორმხრივი ამბიცია – მით უკეთესია შედეგი. დამკვეთთან ხშირად ვიკვეთებით. თუმცა მთავარი ეტაპები ესაა: (1) პირველადი კონცეფციის დამტკიცება და უკუკავშირის მიღება; (2) დეტალური სცენარის გავლა; (3) ბოლოს კი გადაღების დეტალების შეთანხმება, რომელიც გადაღების წინა შეხვედრაზე ხდება (ე.წ. PPM).
M: დაახლოებით რა დრო სჭირდება ერთი სრულფასოვანი ვიდეორგოლის შექმნას?
ვიდეორგოლს გააჩნია. შეიძლება 3 კვირა, შეიძლება 3 თვე. საშუალოდ, პროექტზე მუშაობის დაწყებიდან დასრულებამდე 1.5-2 თვე მაინც გამოდის ხოლმე.
M: რა სირთულეებმა შეიძლება იჩინოს თავი პროცესში?
პროცესში ნებისმიერმა სირთულემ შეიძლება იჩინოს თავი. აუცილებლად იქნება რამე, რაც არ გამოდის, ვერ ესწრება, ბიუჯეტში არ ეტევა. როგორც ვთქვით, ბევრ რამეს პირველად ვაკეთებთ, მაგრამ ყველაზე კარგი გზა არის, რაც შეძლება ბევრ რამეზე იფიქრო წინასწარ, რაც შეიძლება ბევრი პრობლემა გათვალო. ჟანრის კანონი ასეთია – რაც გეგონა, რომ მარტივი იქნებოდა – ეგ გართულდება; რაც გეგონა, რომ არ გამოვიდოდა – ეგ გამოვა.
M: ვისგან შედგება გუნდი, რომელმაც ვიდეო უნდა შექმნას?
ხშირად ახლად გამოსულ ვიდეოებს ქვემოთ აქვს ხოლმე კრედიტების გრძელი სია. იქ ამოიკითხავთ სრულად ჩართულ პოზიციებს. კლასიკურად თითოეულ ვიდეოს ჰყავს სააგენტოს მხრიდან კრეატიული დირექტორი, არტ დირექტორი, კოპირაიტერი, დიზაინერი, კონტენტკრეატორი, სტრატეგი, ექაუნთმენეჯერი; პროდაქშენის მხრიდან: პროდიუსერი, რეჟისორი, რეჟისორის ასისტენტი, ოპერატორი, მხატვარი, კოსტიუმების მხატვარი, გრიმი, კასტინგის მენეჯერი, ლოკაციის მენეჯერი, გაფერი, გამნათებლების ჯგუფი, კადრირების მხატვარი, ხშირად სპეცეფექტების სპეციალისტები, ზოგჯერ – პრაქტიკული ეფექტების სპეციალისტები, დეკორატორები, კომპოზიტორი, მემონტაჟე, პოსტპროდაქშენის მენეჯერები, საჭიროა ხმის სტუდია, გრაფიკული სტუდია და ასე დაუსრულებლად.
საუბარი არაა კიდევ ე.წ. ბექოფისზე, რომლების გარეშე ფიზიკურად პროცესი ვერ იარსებებს.
M: თუ გეხმარებათ უცხოური რეფერენსები ინსპირაციის პოვნაში?
კი და აუცილებელიცაა. არ არსებობს კინო/ვიდეო ნაწარმი, რომელიც არ ეძებს და პოულობს მილიონ დეტალს რეფერენსებში. ეს შეიძლება იყოს რეკლამა, მუსიკალური ვიდეო, კინო, სერიალი, გიფი, ნახატი, ინსტალაცია, მოდების ჩვენება – მილიონი რამ, საიდანაც მივიღებთ ინსპირაციას. საუკეთესო და მართლა კარგი ვიდეოს შესაქმნელად ძალიან დეტალური მუშაობაა საჭირო. რაც მეტ დეტალს გაივლი, მით უკეთესო გამოვა, ამიტომ სწორი დეტალური გადაწყვეტილებების ძიება აუცილებლად უნდა მიდიოდეს სულ ბოლო ეტაპამდე.
M: რა არის ის მთავარი გზავნილი, რაც ყველა ვიდეომ უნდა დატოვოს მაყურებელზე?
გზავნილი ყველა ვიდეოს აქვს უნიკალური და თავისებური. ეგ არის ის საბოლოო შედეგი, რისთვისაც ვიდეო კეთდება – რაღაც უნდა თქვას, ხმით და კადრებით. ეს გზავნილი უნდა იყოს საინტერესო, კავშირში და სასურველია დასამახსოვრებელი. ისე კი, ყველა ვიდეო რაღაც ამბავს უნდა ჰყვებოდეს, ისეთს, რომ მაყურებლის ამ ვიდეოსთან გატარებული დრო გამართლდეს. სულ უნდა გვახსოვდეს, რომ ძალიან დიდ აუდიტორიასთან გვაქვს წვდომა და ეგ წვდომა ბოროტად (და ზედაპირულად) არ უნდა გამოვიყენოთ (თორემ ზუსტად ამიტომ იძულებენ შემდგომ რეკლამას).
ყველაფერი უნდა ვქნათ იმისთვის, რომ ადამიანებს შევუქმნათ მართლა კარგად მოფიქრებული, გულით გაკეთებული, გათიშვა რომ არ მოგინდება და დამკვეთი კომპანია დადებითად რომ დაგამახსოვრდება – აი, ეგეთი ვიდეო.
ავტორი: მარიამ გოჩიაშვილი
