ჩვენ სახლების საზღვრებიდან გასვლა, არა სავაჭროდ, არამედ იმერსიული გამოცდილების მისაღებად დავიწყეთ. ეს ეკონომიკის შემთხვევაში აშკარაც გახდა: დისნეილენდი სავსეა, ფრენები დაჯავშნილია, სასტუმროებს ვაკანსიები აღარ აქვთ, ფესტივალების ბილეთები კი წამებში იყიდება… ხოლო მსგავსი გლობალური გადასვლისას ეკონომიკის საკითხებიდან, გამოცდილების ეკონომიკამდე, ბრენდებს, რომლებიც გადარჩებიან, ადაპტირებაც მოუწევთ.
Lululemon-ის აღმასრულებელმა დირექტორმა კალვინ მაკდონალდმა ორი წლის წინ ამაყად გამოაცხადა, რომ ბრენდი უკვე არა ტანსაცმელების, არამედ გამოცდილების კომპანია იყო. მან დიდი ფსონი იმერსიულ გამოცდილებაზე დადო, რომელიც მეტ ერთგულებას იწვევს, ვიდრე ცოტათი გაუმჯობესებული იოგას შარვლები… იგი ყოველწლიურად 300 მილიონ დოლარს ხარჯავდა მაღაზიებისა და იოგის, პილატესის, მარათონებისა თუ მედიტაციის ონლაინ გაკვეთილებზე.
საინტერესოა ისიც, რომ ზოგიერთი ბრენდი არსებული გამოცდილების წარმოსაჩენად ბიზნესმოდელებსაც კი ცვლის. REI თვლის, რომ 10 წელიწადში იგი უფრო მეტ შემოსავალს არა ნივთების, არამედ გამოცდილების გაყიდვიდან მიიღებს. გარე საცალო ვაჭრობა არა მხოლოდ მაღაზიებში არსებულ სერვისსა და ცოდნას აუმჯობესებს, არამედ ეროვნულ პარკებში ზურგჩანთებით მოგზაურობას აგრძელებს, ტრენინგებს ატარებს და კარვებით ექსკურსიებსაც კი მართავს. შედეგად, ბევრი მომხმარებელი მათგან არა მხოლოდ თავგადასავლებისთვის საჭირო აღჭურვილობას, არამედ თავგადასავლებსაც ყიდულობს, ასე რომ, რატომ არ უნდა ფლობდეს ბრენდი მთლიან გამოცდილებას?
წამყვანი ბრენდები კი არა მხოლოდ გამოცდილებაზე ფიქრობენ, არამედ ისინი მომხმარებელთა ჩართულობისთვის ახალ მოდელებს იკვლევენ. ზოგი მომხმარებლისგან უკუკავშირსაც იღებს, რათა დარწმუნდეს, რომ სამომხმარებლო ლანდშაფტის გაზრდასთან ერთად, ისინიც ვითარდებიან.
ამ ბრძოლაში მანქანის ბრენდებიც კი აბიჯებენ. იმის გამო, რომ ახალი მანქანების გლობალური გაყიდვები ბოლო 5 წლის განმავლობაში 15%-ით შემცირდა, ისინი მომხმარებელთა შენარჩუნებასა და ლოიალობაზე არიან ორიენტირებულნი. მაგალითად, Volvo-მ და BMW-მ მუზეუმებისა და თემატური პარკების გამოცდილება შექმნა. ამასთან, გააუმჯობესა ტესტ-დრაივი და ტურის შეთავაზებები. რაც შეეხება Tesla-ს, იგი მომხმარებლებს კალიფორნიაში საკუთარი ქარხნის დათვალიერების საშუალებას აძლევს. ეს გამოცდილება მათში ბრენდის სიყვარულსა და ლოიალობას აძლიერებს — Tesla-ს მფლობელების 70,7% არჩევანს კვლავ ამ ბრენდზე აჩერებს.
ხოლო თუ მსგავს გამოცდილებებს თქვენი კომპანიის ბუნებრივ ნაწილად ვერ ხედავთ, ამ აზრს უნდა გადააბიჯოთ და დაფიქრდეთ, რა აინტერესებს თქვენს დემოგრაფიულ სამიზნეს და რა მიიზიდავს მათ იმისათვის, რომ დრო თქვენს ბრენდთან გაატარონ. მაგალითად, Grubhub კონცერტებს მასპინძლობს, რადგან ის მუსიკას საზოგადოების შექმნისა და მომხმარებელთა მოზიდვის ეფექტურ გზად მიიჩნევს. ამასთან, თქვენი ბრენდის ექსპერიმენტულ ტრანსფორმაციაში კონსულტანტები და შესაბამისი სააგენტოებიც შეგიძლიათ დაიხმაროთ.
როგორც სხვა შემთხვევებში, აქაც ტესტირებითა და პილოტირებით უნდა დაიწყოთ, რათა დარწმუნდეთ, რომ წარმატების საზომი სწორად ჩამოაყალიბეთ — რა გამოცდილებები მოგიტანთ მეტ გაყიდვებს ან რა აქცევს ახალ მომხმარებლებს ბრენდის ელჩებად. აქვე, აუცილებელია, ის ენა და შეხედულებებიც განვითარდეს, რომლებსაც კომპანიის მართვისას იყენებთ. დიახ, ჩვენ ვშორდებით სამყაროს, რომელიც მოძველებულ საზომებს მიმართავს, ისეთებს, როგორიცაა გაყიდვები კვადრატულ მეტრზე და უკვე ისეთი გამოცდილებების შექმნისკენ მივდივართ, რომლებიც ბრენდის ცვლილებასთან, ლოიალობასა და ღირებულებასთან არის დაკავშირებული. ხოლო ამის შემდეგ კარგი იქნება თუ ექსპერიმენტულ ინვესტიციებს გაიმეორებთ, ზუსტად ისე, როგორც ამას, ახალი ციფრული ან სოციალური მედიის კამპანიის შემთხვევაში გააკეთებდით…
დაბოლოს, ბრენდები, რომლებიც მსგავს გრძელ ხედვებს ეყრდნობა, მომავალში თავიანთი ინდუსტრიების ბედსაც განსაზღვრავს.
