Watermark ქართული ფოტო-ვიდეო სტუდიაა, რომელიც ელ. კომერციის მიმართულებით მომუშავე კომპანიებს პროდუქციის 360 გრადუსით გადაღებას სთავაზობს, მეორე მხრივ კი, სტოკ მედიის პლატფორმებზე ყიდის ფოტოებს (მაგ. Shutterstock-ზე). სტოკ პლატფორმები სხვადასხვა ტიპის ვიზუალურ კონტენტს აერთიანებს, საიდანაც მსოფლიო მედია, თუ სარეკლამო სააგენტოები საჭირო ვიზუალებით „მარაგდებიან“. 2017 წლიდან დღემდე, სტარტაპის პროდუქცია 40-მდე ქვეყანაში გაყიდა და ის დღესაც განაგრძობს საერთაშორისო თუ ადგილობრივი კომპანიებისთვის საინტერესო ვიზუალური კონტენტის შექმნას. რა მნიშვნელობა აქვს 360 გრადუსით გადაღებას ელექტრონული კომერციისთვის და რა სიახლე შემოაქვს სტარტაპს ქართულ ბაზარზე – ამ კითხვებზე Watermark-ისა და ასევე, ბიზნეს საკონსულტაციო კომპანია KAUFMANN-ის დამფუძნებელმა – ოთო შამუგიამ გვიპასუხა:
M: როგორია ვიზუალური კონტენტის შექმნის, ან 360 გრადუსით გადაღების გამოცდილება საქართველოში და თქვენ რა სიახლე შემოგაქვთ ბაზარზე?
საქართველოში საკმაოდ მაღალი დონის კონტენტი იქმნება, განსაკუთრებით ტურისტული ხასიათის, რადგან ჩვენი ქვეყანა უპრეტენზიო და ვიზუალურად ეფექტური მოდელია. გვყავს საერთაშორისო დონეზე აღიარებული ფოტოგრაფები და ვიდეოგრაფებიც, თუმცა ამ სეგმენტში ჩვენთვის მოღვაწეობა გაუმართლებელი იქნებოდა, მრავალი წელი და ათეულობით ათასი ფოტო არის საჭირო იმისთვის, რომ საკუთარი საავტორო სტილი და ხედვა ჩამოუყალიბდეს ფოტოგრაფს. ჩვენ ტექნიკური მიმართულება ავირჩიეთ, ვითვისებთ ყველაფერ იმას, რისი ათვისებაც თეორიულად შეიძლება. ამ ტექნიკური ნიუანსების შესწავლასთან ერთად, ტრენდებსაც ვსწავლობდით და შევამჩნიეთ, რომ 360 გრადუსიან ფოტოგრაფიას ქართულ ბაზარზე მხოლოდ გარემოს (VR) ჭრილში იცნობენ და არა ობიექტების.
