in

გზები, თუ როგორ ვმართოთ სტრესი

სტრესი ჩვენი ცხოვრების განუყოფელი ნაწილია. სამსახურის დაკარგვა, ავადმყოფობა, ოჯახის წევრის გარდაცვალება და სხვა მსგავსი მტკივნეული მოვლენები ავტომატურად იწვევს სტრესს. თქვენ შეიძლება გრძნობდეთ დაღლილობას ან შფოთვას, რაც გარკვეული პერიოდის განმავლობაში ნორმალურია.

გაესაუბრეთ ექიმს, თუ გრძნობთ წუხილს ან შფოთვას რამოდენიმე კვირაზე მეტი ხნის განმავლობაში, ან თუ იგი ხელს უშლის თქვენს სახლს ან სამუშაო ცხოვრებას. თერაპია, მედიკამენტები და სხვა სტრატეგიები ამაში დაგეხმარებათ. თუმცა, ამავდროულად, არსებობს ისეთი რამ, რისი სწავლაც შეგიძლიათ იმისთვის, რომ სტრესი თავად მართოთ.

ამაში დაგეხმარებათ:

ვარჯიში

დასაწყისისთვის, ფიზიკური დატვირთვა დაგეხმარებათ თქვენი ძილის გაუმჯობესებაში. უკეთესი ძილი ნიშნავს სტრესის უკეთ მართვას. ექიმებმა ჯერ ზუსტად არ იციან რატომ, მაგრამ ადამიანები, რომლებიც უფრო მეტს ვარჯიშობენ, უკეთესად იღებენ ღრმა “ნელი ტალღის” ძილს, რაც ხელს უწყობს ტვინისა და სხეულის “განახლებას”, ენერგიით ავსებას. უბრალოდ იზრუნეთ, რომ ზუსტად ძილის წინ არ ივარჯიშოთ, ეს ზოგჯერ ძილს არღვევს.

ვარჯიში ასევე ეხმარება განწყობის ამაღლებას. ამის მიზეზი შეიძლება იყოს ის, რომ იგი ასტიმულირებს თქვენს სხეულს, გამოყოფს ჰორმონებს, როგორიცაა ენდორფინები და ენდოკანაბინოიდები, რომლებიც ხელს უშლიან ტკივილს, აუმჯობესებენ ძილს და აწყნარებენ გონებას.

ადამიანები, რომლებიც ვარჯიშობენ, ნაკლებად ღელავენ და უფრო პოზიტიურად გრძნობენ თავს. როდესაც თქვენი სხეული თავს კარგად გრძნობს, თქვენი გონება ხშირად მას მიჰყვება. შეიმსუბუქეთ სტრესი:

  • სირბილით
  • ცურვით
  • ცეკვით
  • ველოსიპედით სეირნობით
  • აერობიკით

კვება

ჯანსაღმა კვებამ შეიძლება შეამციროს სტრესის სიმძაფრე, გააძლიეროს თქვენი იმუნური სისტემა, უკეთესი გახადოს განწყობა და შეამციროს არტერიული წნევა. ჭარბ შაქარს და ცხიმს კი შესაძლოა ჰქონდეს საპირისპირო ეფექტი. უსარგებლო საკვები შეიძლება უფრო მიმზიდველი ჩანდეს, როდესაც ძლიერ სტრესში იმყოფებით.

საკუთარი მენტალური თუ ფიზიკური ჯანმრთელობის შესანარჩუნებლად, მიიღეთ რთული ნახშირწყლები, ცილები და ცხიმოვანი მჟავები, რომლებიც გვხვდება თევზში, ხორცში, კვერცხსა და კაკალში.

ასეთ დროს ანტიოქსიდანტებიც გვეხმარებიან. ისინი იცავენ თქვენს უჯრედებს ქრონიკული სტრესის დაზიანებისგან. ანტიოქსიდანტებს ვხვდებით: ლობიოში, ხილში, კენკრაში, ბოსტნეულში და სანელებლებში.

ძილი

სტრესის გვერდითი მოვლენა ძილის რეჟიმის დარღვევაა. თუკი უძილო ღამეები კვირაში სამჯერ მაინც მეორდება და მინიმუმ 3 თვე გრძელდება, ამ შემთხვევებს უკვე ქრონიკული უძილობა შეიძლება დაერქვას. ძილის ნაკლებობამ ასევე შეიძლება გააძლიეროს სტრესის დონეც.

იმისთვის, რომ ძილის რეჟიმი გაიუმჯობესოთ, საჭიროა:

  • ივარჯიშოთ რეგულარულად
  • გახვიდეთ მზის შუქზე
  • დალიოთ ნაკლები ალკოჰოლი და კოფეინი ძილის წინ ახლოს
  • განსაზღვროთ ძილის გრაფიკი
  • არ “სქროლოთ” სოციალური ქსელები ძილამდე 30-60 წუთით ადრე
  • სცადოთ მედიტაცია ან რელაქსაციის სხვა საშუალებები

და ბოლოს – სცადეთ რელაქსაციის ხერხები

იოგა – ეს ერთგვარი ვარჯიშის ფორმაა, მაგრამ შეიძლება მას მედიტაციაც ეწოდოს. არსებობს მრავალი სახის იოგა. ის ფორმები, რომლებიც ფოკუსირებულია ნელ მოძრაობაზე, დაჭიმვასა და ღრმა სუნთქვაზე, საუკეთესოა თქვენი შფოთისა და სტრესის შესამცირებლად.

მედიტაცია – რელაქსაციის ეს ფორმა უკვე 5000 წელზე მეტია, არსებობს. მედიტაცია ბევრ ადამიანზე დადებითად მოქმედებს და ბევრნაირი სარგებელი მოაქვს. მას შეუძლია შეამციროს სტრესი, შფოთვა და ქრონიკული ტკივილი, ასევე გააუმჯობესოს ძილი, ენერგიის დონე და განწყობა.

ღრმა სუნთქვა – როდესაც ღრმად სუნთქავთ, თქვენი სხეული ბუნებრივად დუნდება. მოდუნება კი სტრესს ავტომატურად ამცირებს. ღრმა სუნთქვა უფრო მეტ ჟანგბადს აწვდის თქვენს ტვინს და ამშვიდებს თქვენი ნერვული სისტემის იმ ნაწილს, რომელიც განტვირთვას ემსახურება.

სიცილის თერაპია – როდესაც იცინით, მეტ ჟანგბადს იღებთ. იზრდება თქვენი გულის, ფილტვებისა და კუნთების სტიმულირება და სხეული სასარგებლო ჰორმონებს გამოიმუშავებს. სიცილი ასევე აუმჯობესებს თქვენს იმუნურ სისტემას, ამცირებს ტკივილს და აუმჯობესებს თქვენს განწყობას ხანგრძლივი პერიოდის განმავლობაში.

რუბრიკას ჯანსაღი ცხოვრების წესზე წარმოგიდგენთ ფარმადეპო.

ავტორი: თინათინ უგრეხელიძე

შტორმის ტალღები, როგორც მითოლოგიური პერსონაჟები – Rachael Talibart-ის ნამუშევრები

თქვენი პროფესიული გადაწვა და ძალების აღდგენა უნიკალური გამოცდილებაა