როდესაც თქვენი ბიზნესისთვის კონტენტის შესაქმნელად ცალკეულ ადამიანს ან გუნდს ქირაობთ, ბუნებრივია, გიჩნდებათ კითხვა – რამდენ ხანში მიიღებთ შედეგს? ხშირად, დამკვეთებს არ ესმით, რომ კონტენტ მარკეტინგიდან შედეგის მისაღებად ერთი თვე არ კმარა და პირველადი შედეგებისთვის, სულ მცირე, 3-6 თვე ან წელიწადიც კი შეიძლება გახდეს საჭირო. მაინც, რომელია სწორი პასუხი? საქმე ისაა, რომ ამ პასუხს კონკრეტული ადამიანის ვარაუდიდან გამომდინარე კი არ უნდა ისმენდეთ, არამედ მეტრიკიდან გამომდინარე – რა შედეგი გსურთ, რის მიხედვით გაზომავთ შედეგს? როგორია თქვენი ბიზნესის მოდელი, კონკურენცია, კონკურენტული უპირატესობა, რამდენად გაქვთ უკვე ჩამოყალიბებული საკომუნიკაციო არხები, ბიუჯეტი და ა.შ.
ძალიან ბევრი რამ არის დამოკიდებული იმაზე, თუ რის მიხედვით გაზომავთ თქვენს წარმატებას. კარგად გაიაზრეთ, რას უწოდებთ კონტენტ მარკეტინგს? ბლოგ-პოსტი, რომელიც საძიებო სისტემებში კარგ რანკინგს ფლობს? დაწკაპუნება ბლოგის სხვა გვერდზე? ორგანული ტრაფიკის ზრდა? ვებგვერდზე გატარებული დროის ხანგრძლივობა? ადამიანების მიერ გაზიარებული კონტენტი? ბლოგზე ჩართულობის ზრდა გინდათ? რას უწოდებთ შედეგის მიღებას?
კონტენტ მარკეტინგის განხორციელებისას შეგიძლიათ სწორება ლიდების გენერირებაზე აიღოთ. იპოვეთ გზა, როგორ გაზარდოთ თქვენს კონტენტზე დაწკაპუნების ინტენსივობა. უპირველეს ყოფლისა, დაისახეთ მიზნები Google Analytics-ის მიიმართულებით. მაგალითად, ცადეთ უფასო საცდელი რეგისტრაცია, გამოიყენეთ იმეილ მარკეტინგი და ა.შ. შეადარეთ ცალკეული ინსტრუმენტების გამოყენების შედეგები. დააკვირდით, რომელმა მიდგომამ გაამართლა სხვებზე უკეთ. ამგვარად, უკეთ გაიგებთ, რა სტრატეგიული მიდგომით იზიდავთ პოტენციურ მომხმარებლებს.
კონტენტ მარკეტინგი ძალიან ვრცელი თემაა, ამდენად, ამ სტატიაში მის ერთ-ერთ მაგალითს შევეხებით. აქ მოცემულია კონკრეტული შემთხვევა, თუ როგორ მუშაობს X სააგენტო დამკვეთთან. სააგენტომ ახალ ექაუნთზე მუშაობა ძაბრის კონტენტზე მუშაობით დაიწყო. თავდაპირველად, ქმნიდნენ ბმულებს, რომლის საშუალებითაც პოტენციურ აუდიტორიას იზიდავდნენ და შემდეგ, ძაბრის სხვა დონეებზე, სხვადასხვანაირი ფორმით იმეორებდნენ. ეს მიდგომა მუშაობს მაშინ, თუკი ყველაფერს 0-დან იწყებ. თუმცა, როდესაც უფრო გამოცდილ დამკვეთებთან ურთიერთობთ, უფრო ძაბრის ქვედა დონეებზე სჯობს ოპერირება.
მაგალითად, ასეთი სტრატეგია განვიხილოთ:
დამკვეთი VC-ით მხარდაჭერილი გამოწერის ბიზნესია, რომლის აუდიტორიაც მცირე და მიკრო ბიზნესებია. სააგენტომ სტრატეგიის განსაზღვრისას გაითვალისწინა, რომ კონკურენტებთან შედარებით, ამ კომპანიას ჰქონდა საძიებო ბაზა, თუმცა არ გააჩნდა შესაბამისი გვერდი, რომელიც აუდიტორიას კონკურენტული განსხვავების შესახებ აუხსნიდა.
ამას გარდა, არ არსებობდა ბლოგ-პოსტი, სადაც პროდუქტების განხილვა იქნებოდა და მომხმარებელი უკეთ გაერკვეოდა კომპანიის შეთავაზებაში. სააგენტომ გადაწყვიტა შეექმნა რამდენიმე ბლოგ-პოსტი, რომელიც ძაბრის შუა რგოლებისთვის შექმნიდა საძიებო კონტენტს, ასევე, გააზიარებდა დამფუძნებლების ისტორიას – ხედვას, თუ რატომ ჩამოაყლიბეს კომპანია, რა პრობლემის აღმოფხვრა სურთ მომხმარებლისთვის, რა მოტივაცია აქვთ და ა.შ.
საერთო ჯამში, სტრატეგია ძაბრის ძირისკენ უფრო იყო მიმართული და ძაბრის შუა ნაწილისთვის დამახასიათებელი ტაქტიკაც ახლდა. გამომდინარე იქიდან, რომ კომპანია უკვე საკმაოდ მოთხოვნად პროდუქტს ყიდდა, სააგენტოს აქცენტი ძაბრის ზედა ნაწილზე არ გაუმახვილებია.
კონტენტის პოპულარიზაციისთვის, სააგენტომ სამმხრივი მიდგომა აირჩია. ის ფოკუსირდა ფეისბუქ რეკლამასა და კომუნაზე გათვლილი კონტენტის პოპულარიზაციაზე, მოკლევადიანი ტრაფიკის მოსაზიდად. შემდეგ კი, ბმულების შექმნაზე, გრძელვადიანი ტრაფიკის შესაქმნელად.
ფეისბუქზე სამი სხვადასხვა აუდიტორია აირჩიეს: ერთი მხრივ, ცივი ტრაფიკის აუდიტორია, ტრაფიკში მყოფი და ასევე, დარეგისტრირებული ადამიანები. შემდეგ, გააკეთეს თარგეთირება. გრძელვადიანი პოპულარიზაციისთვის, ფოკუსირდნენ SEO-ზე და აქტიური ლინკ-ბილდინგი დაიწყეს. პირველ რიგში, პოსტი საკვანძო სიტყვების ირგვლივ ააწყვეს. პრიორიტეტულ სტატიებს კი ფასიანი რეკლამით ეხმარებოდნენ შედეგის ზრდაში. ამ კომბინირებული მეთოდით, სააგენტო კომპანიას ათასობით ვიზიტორის მოზიდვაში დაეხმარა, პირველი ორი თვის მანძილზე. დამკვეთიც ხომ სწრაფად ელის შედეგებს, შესაბამისად, ასეთი ეფექტი მისთვის წამახალისებელია, უფრო მეტად გენდოთ და თქვენთან ერთად აქტიურად განაგრძოს მუშაობა.
ტრაფიკმა 3500 pageview-ს მიაღწია. შეიძლება ეს მცირე შედეგად მიიჩნიოთ, თუმცა როგორც ზევით აღვნიშნეთ, სააგენტო ორიენტირებული იყო ძაბრის ქვედა დონეებზე, შესაბამისად, უფრო შეზღუდული იყო სამიზნე სეგმენტი და პრიორიტეტი სპეციფიკური აუდიტორიის მოზიდვას ენიჭებოდა.
რაც შეეხება კონვერსიას – ინფორმაციული ბლოგ-პოსტების საშუალებით, მომხმარებლების რეგისტრაციების ზრდა, ჯერ კიდევ, პირველივე თვეში იყო შესამჩნევი. თავიდანვე, დარეგისტრირების უმეტესობა ფასიან ან სოციალური ქსელების კონტენტზე მოდის ხოლმე. შემდეგ, რაც უფრო მეტხანს მუშაობთ კომპანიასთან, როგორც წესი, ძირეულად იცვლება მოცემულობა და რეგისტრაციები ორგანული კონტენტიდან გამომდინარე უფრო მოდის.
როგორია თქვენი გამოცდილება? რა პრობლემებს აწყდებით ყველაზე ხშირად? თქვენი აზრით, რა იწვევს თანამრომლობის შეფერხებას? გაგვიზიარეთ თქვენი გამოცდილება.
წყარო: growandconvert
