კანის კრეატიული ფესტივალი მსოფლიოს სარეკლამო ინდუსტრიის უმთავრესი მოვლენაა. 2017 წელს კანში საქართველოს სარეკლამო სააგენტოებმა – Windfor’s, JWT Metro, Leavingstone და ABK 36 განაცხადი გააკეთეს. თამამად შეიძლება ითქვას, რომ წელს Windfor’s-ის წელია, რადგან, ქართულ კრეატიულ ინდუსტრიას წლის უმთავრესი მოსავალი – ვერცხლის და ბრინჯაოს ლომები, სწორედ მან, ნამუშევრით Dinner With Georgia მოუტანა! ესაა პირველი ვერცხლის ლომი ქართული სარეკლამო ინდუსტრიის ისტორიაში! PR-ის კატეგორიაში მიღებული ამ ორი ჯილდოს გარდა, Windfor’s-ის აღნიშნული ნამუშევარი კონკურსის კიდევ ორი კატეგორიის (PR, Cyber) ფინალისტი იყო.
Windfor’s-ის წარმატება საკომუნიკაციო სააგენტოების ასოციაციის (ACAG) მიერ შედგენილ რეიტინგებზე აისახა, რომლის წარმოებაც ასოციაციის წევრი 17 საკომუნიკაციო კომპანიის მიერ შედგენილი წესების მიხედვით მიმდინარეობს. აღნიშნულ ფესტივალზე მიღწეული წარმატების შედეგად, ACAG-ის წევრმა სააგენტო Windfor’s-მა გაუსწრო Leavingstone-ს და ორივე რეიტინგში პირველ ადგილს იკავებს. რეიტინგის ბაზისური ღირებულებების მიხედვით, ფესტივალის გრან პრის მფლობელს 15 ქულა ენიჭება, კატეგორიის საუკეთესო ნამუშევრის ტიტულის მფლობელს – 10, ოქროს – 8, ვერცხლს – 6, ბრინჯაოს – 4, ფინალში გასვლა კი 2 ქულით ფასდება. ასოციაციის წევრთა მიერაა განსაზღვრული ფესტივალთა კოეფიციენტებიც, რომლის მიხედვითაც Cannes Lions-ის კოეფიციენტი 15-ს შეადგენს. ACAG აწარმოებს ორ რეიტინგს; ერთში კომპანიები იბრძვიან წლის კრეატიული სააგენტოს, მეორეში კი – წლის დიზაინ სტუდიის ტიტულისთვის. აღსანიშნავია, რომ საკომუნიკაციო სააგენტოების ასოციაციის ამ ორი რეიტინგის გამარჯვებულები ქართული საერთაშორისო სარეკლამო ფესტივალის Ad Black Sea დასრულების შემდეგ გახდება ცნობილი.
