დიდი ციფრული განახლების შემდეგ, WINDFOR’S-ის თბილისის გუნდში კვლავ სიახლეა. შეგახსენებთ, რომ სულ რამდენიმე თვის წინ, WINDFOR’S-ის ციფრულ განყოფილებას ახალი ხელმძღვანელი და პარტნიორი ჩაუდგა სათავეში. სააგენტომ მისამართი შეიცვალა და ბინა „სტამბაში“ დაიდო (ოფისის ფოტოებს სტატიაში იხილავთ). სიახლეა სტრუქტურული მიმართულებითაც. WINDFOR’S-ის კლიენტთა მომსახურების განყოფილება ანა დონდუამ ჩაიბარა და სააგენტოში ახალ მიმართულებასა და სტრატეგიაზე აქტიურად დაიწყო მუშაობა.
ვატო ქავთარაძე, WINDFOR’S-ის დამფუძნებელი: „ანა, დაახლოებით, ორი თვის წინ შემოგვიერთდა და უკვე იქცა ჩვენი გუნდის ერთ-ერთ ლიდერად. ისეთი შეგრძნება გვაქვს ყველას, თითქოს უკვე ძალიან დიდი ხანია ერთად ვართ. ვფიქრობ, ანასთან ერთად, ჩვენი ურთიერთობა კლიენტებსა და პარტნიორებთან, თვისობრივად ახალ ეტაპზე გადავა და ამის ნიშნები უკვე ჩანს ჩვენს მიმდინარე პროექტებში.
ანას აქვს არაჩვეულებრივი უნარი აღიქვას პროცესი და გაუძღვეს მას, როგორც სააგენტოს, ისე კლიენტების პრიზმიდან. ეს არც არის გასაკვირი, ვინაიდან პროფესიული კარიერის დიდი დრო მას სწორედ კლიენტის მხარეზე აქვს გატარებული და ზედმიწევნით კარგად ესმის ყველა ის ნიუანსი, რომელიც პროცესის მიმდინარეობისას შეიძლება უჩნდებოდეს დამკვეთს.“
თინათინ ხაფავა, WINDFOR’S-ის ბიზნესის განვითარების მენეჯერი: ჩვენს გუნდში ანას შემომატებას მნიშვნელოვანი სტრუქტურული ცვლილებები მოჰყვა. ერთობლივად გადავაფასეთ სააგენტოს მომსახურების სისტემა და ის ინტენსიურად ჩაერთო სააგენტოს ცხოვრებაში. მისი სამუშაო გამოცდილება უკავშირდება ისეთ გლობალურ ბრენდებთან თანამშრომლობას, როგორებიცაა Wrigley’s, Mars Inc, Skittles და სხვა. ანას შემომატების შემდეგ გუნდმა განიცადა სტრუქტურული ცვლილება, რაზეც უფრო დეტალურად თავად ანა გიამბობთ.
M: ანა, მოკლედ მიმოვიხილოთ, როგორია თქვენი კარიერული გზა WINDFOR’S-მდე?
2008 წლიდან ვიკავებდი მენეჯერულ პოზიციებს სხვადასხვა საერთაშორისო კომპანიაში, როგორიც არის Avon Cosmetics და JTI, სადაც მქონდა შესაძლებლობა მემუშავა მსოფლიო მასშტაბის ბრენდებთან.
2012 წლიდან ვხელმძღვანელობდი Wrigley’s კავკასიის რეგიონის მარკეტინგის დეპარტამენტს, 3 წელიწადში განხორციელდა Wrigley’s-ის შერწყმა Mars Inc-თან, მოხდა სტრუქტურული ცვლილებები და გადავედი ყაზახეთის ოფისში, სადაც პასუხისმგებელი ვიყავი პორტფელის განვითარებაზე რეგიონში გაერთიანებული 11 ბაზრის მასშტაბით.
ძირითადი მიმართულებები საერთაშორისო და ადგილობრივ ბაზრებზე აერთიანებდა ისეთ კომპლექსურ კომპონენტებს, როგორიცაა: ბაზრის და მომხმარებლის ანალიტიკა, მარკეტინგის სტრატეგია, მოკლე და გრძელვადიანი გეგმები, პორტფელის ბაზარზე პოზიციონირება, ახალი პროდუქტების შექმნა ბაზრის სტრატეგიის შესაბამისად, ფასწარმოქმნა და ბიუჯეტირება, ბრენდების ინტეგრირებული მარკეტინგის საკომუნიკაციო როუდმეფების შექმნა და სამოქმედო გეგმაში გაწერა.
2018-ში ჩემი დიდი ოცნების ასრულება გადავწყვიტე და დაიბადა „Pepperboy”, რაც ჩემი კულინარიული მისწრაფებების და პროფესიული გამოცდილების შერწყმის საუკეთესო გადაწყვეტა აღმოჩნდა. „Pepperboy“-მ თავისი არასტანდარტულობით, უკომპრომისო ხარისხით და უნიკალური ბრენდინგით მალევე დაიპყრო ადამიანების გული და გახდა აზიური კულინარიის გრავიტაციული ველი თბილისში.
M: როგორ შედგა თქვენი და WINDFOR’S-ის თანამშრომლობა?
2020-ში, პანდემიის გამო, მივიღე უმძიმესი გადაწყვეტილება შემეჩერებინა „ფეფერბოი“-ს მუშაობა განუსაზღვრელი ვადით, თუმცა მჯერა, რომ „ფეფერბოი“-სთვის ჯერ ყველაფერი წინ არის. ჩემი თავგადასავლები გაგრძელდა და სრულიად მოულოდნელად გადავიკვეთე WINDFOR’S-ის გუნდთან და ჩვენი თანამშრომლობა შედგა რაღაც უხილავი კარმული ძალებით. ჩემი, როგორც მარკეტერის ცნობისმოყვარეობას ყოველთვის აღვივებდა WINDFOR’S-ის საქმიანობა, პროექტები და შემოქმედებითი ძალა.
WINDFOR’S ათწლეულზე მეტია ამ სფეროს დამსახურებული მძიმე წონის მოთამაშეა და უნდა ითქვას, რომ სწორედ WINDFOR’S-ის დამსახურებაა თავის დროზე საქართველოს ბაზარზე შემოქმედებითი თამასის დასმა, მას შემდეგაც მრავალგზის განიმტკიცა ამ სფეროს უპირობო ლიდერის პოზიცია.
M: როგორია WINDFOR’S-ში კლიენტებთან ურთიერთობის განვითარების თქვენეული ხედვა?
კლიენტების მომსახურების მიმართულება შესაძლოა არ განიხილებოდეს როგორც სააგენტოს ყველაზე გლამურული ნაწილი, მაგრამ კლიენტებთან ურთიერთობის დაწყება და მისი სწორად წარმართვა შესაძლოა იყოს ისეთივე არტი, როგორსაც სააგენტოს კრეატიული ფრთა ქმნის. კლიენტსა და სააგენტოს შორის პარტნიორული ურთიერთობების ჩამოყალიბების გარეშე, საუკეთესო იდეებსაც კი არ უწერიათ დღის შუქის ხილვა.
იმის თქმა მინდა, რომ:
- კლიენტების სერვისის დანაყოფი ასრულებს „Social glue’-ს როლს და პასუხისმგებელია ჯანსაღი ეკოსისტემის ჩამოყალიბებაზე.
- ეს არის ფრონტი, სადაც ხდება საჭიროებების განსაზღვრა და დავალებების სწორი ფორმულირება.
- კლიენტ სერვისი არის ის იმიჯი, რომელსაც სააგენტო აპროეცირებს მისი პოტენციური და არსებული პარტნიორების თვალში და უზრუნველყოფს პოზიტიური განწყობის შექმნას.
M: კონკრეტულად, რა სიახლეებზეა საუბარი და რამ განაპირობა ასეთი ცვლილებები სააგენტოს სერვისების მიმართულებით?
ჩემი როლი ვინდფორსში სწორედ სტრატეგიული მიმართულების განვითარება იქნება. ეს სერიოზული გამოწვევაა ტიპური კრეატიული სააგენტოსთვის, რადგან ბიზნეს კონსალტინგის დნმ-ში დევს უფრო ღრმა და მჭიდრო პარტნიორობის ელემენტები. სიღრმისეული კავშირების შექმნის უნარი სააგენტოს მხრიდან, კლიენტის პარტნიორობის სტერეოტიპს ცვლის.
შემოქმედებით სფეროში მოღვაწე ნებისმიერმა ბიზნესმა იცის, რომ მარკეტინგულმა ლანდშაფტმა ბოლო პერიოდში არნახული რყევები განიცადა და კრიტიკულად მნიშვნელოვანია სიტუაციის სწორი დიაგნოსტიკა და მოქნილი ბიზნეს მოდელის შეთავაზება ბაზარზე წარმოდგენილი მოთამაშეებისთვის. მაგალითად, „Big Data” არის ექსპონენციურად მზარდი ფენომენი კომერციული მიზნებით გამოსაყენებლად და ბრენდებისთვის არ არის საკმარისი შთამბეჭდავი, არასტანდარტული კრეატიული გადაწყვეტების მოფიქრება. მნიშვნელოვანია იმის გააზრება, თუ რა ხელშესახებ გამოსავალს სთავაზობ მათ არსებული „პრობლემების“ გადასაჭრელად, რაც საბოლოო ჯამში, კომპანიის მოგება-ზარალის უწყისზე პოზიტიურად აისახება. ეს არის ის მაჩვენებლები, რაც ჭეშმარიტად აღელვებს ნებისმიერი ბიზნესის მფლობელს.
ეს გულისხმობს სერვისების განტოლებაში სტრატეგიული ბიზნეს კონსალტინგის ჩასმას და განვითარებას. სწორედ ამ მიმართულებით დაუბერავს WINDFOR’S-ის „ზურგის ქარი“, რაც მნიშვნელოვან სტრუქტურულ ცვლილებებს მოიაზრებს უახლოეს მომავალში.
ავტორი: თამარ მეფარიშვილი
