MS Paint-სა და Photos-ს ვიზუალური განახლება ახალ თანამედროვე ინტერფეისს წარმოადგენს, რომელიც Windows 11 დიზაინის ენას შეესაბამება. ალბათ, ბევრი თქვენგანი ფიქრობს, რომ ეს განახლება დაგვიანებულიც კია… თუმცა ნუ ღელავთ, Microsoft ვინდოუსის თითქმის ყველა სტანდარტული პროგრამის რედიზაინზე მუშაობს – მათ შორის, საათის, ხმის ჩამწერის, კალკულატორის, ფოტოების და Microsoft Paint-ის.
კომპანიამ სულ ახლახან წარადგინა Paint და Photos ახალი სახე. პირველ მათგანს გამარტივებული ინსტრუმენტთა პანელი აქვს. არსებული ლენტის ინტერფერისი ახალ დიზაინს ატარებს, სადაც სტანდარტულად მოცემულია რედაქტირების ღილაკი, ფუნჯები, ფერები და სხვ. ამასთან, კუთხოვან ფორმებს მომრგვალებული ანაცვლებს და, რა თქმა უნდა, აპლიკაციას WinUI კონტროლიც აქვს, როგორც ვინდოუს 11-ის განახლების ნაწილი.
როგორც დასაწყისში აღვნიშნეთ, განახლება Microsoft Photos-საც შეეხო – აპლიკაციის ახალი ინტერფეისი, გაუმჯობესებული შესრულება და განახლებული ფუნქციები. ფოტოების აპლიკაცია რედაქტირების ახალ გამოცდილებას მიიღებს, რომელშიც რედაქტირების ინსტრუმენტები გამოსახულების ზემოთაა განთავსებული.
ახალი Windows 11 პროგრამები მალე გამოჩნდება
Microsoft უახლოეს კვირებში ვინდოუს 11-ის განახლებული სტანდარტული პროგრამების გამოშვებას გეგმავს. გარდა ამ პროგრამებისა, კომპანია Outlook და Microsoft Teams-ზეც მუშაობს, რომლებიც Microsoft Edge WebViewer-ზე იქნება დაფუძნებული.
Teams 2.0 უკვე ხელმისაწვდომია Windows Insiders-ისთვის, ხოლო განახლებული Microsoft Outlook ამ წლის ბოლოს გამოვა.
