in

„კეთილი მგზავრობა“ — ახალი ეტაპი „ვისოლის“ განვითარების ისტორიაში

როგორია „ვისოლ ჯგუფის“ განახლებული სტრატეგია და ვიზუალური იდენტობა?

ვისოლმა 23 წლის შემდეგ სტრატეგია და ვიზუალური იდენტობა გაანახლა, ვინაიდან ბრენდი ახლებური ხედვით განაგრძობს პოზიციონირებას — ამიერიდან მომხმარებლებს საუკეთესო სამოგზაურო გამოცდილებას გაუმჯობესებული ინფრასტრუქტურით, ახალი დიზაინ კონცეფციით, ლოიალობის სრულყოფილი სისტემით და მარტივი, მაგრამ ყველაზე ზუსტი სლოგანით, „კეთილი მგზავრობა“, შეუქმნის.

რებრენდინგი და განახლებული ვიზუალური იდენტობა

სტრატეგიულ განახლებაზე დაყრდნობით, საჭირო იყო ვიზუალური გარდაქმნა, რადგან საზოგადოების კოლექტიური თვალი ცვლილებებს ყველაზე აშკარად, ხელშესახებად და პირველად სწორედ მისი მეშვეობით აღიქვამს. ამჯერად ვისოლისა და სმარტის ბრენდების ვიზუალურ განახლებაზე სტრატეგიულმა ბრენდინგ სააგენტომ More Studio-მ და „მილენიალ ჰაბმა“ იმუშავეს, რომელსაც ვასკა ჩუბინიძე და გიორგი ტაბატაძე წარმოადგენდნენ.

ვისოლის ლოგო

როგორც ვასკა ჩუბინიძე გვიყვება, ლოგოზე მუშაობის პროცესი საკმაოდ შემოქმედებითი და საინტერესო იყო, ვინაიდან განახლებული სტრატეგია ვიზუალურად ზუსტად უნდა ეთარგმნათ. ასე მიიღეს სიმბოლო, რომელიც სიტყვანიშანში დიდი იდეური დატვირთვაა მოთავსებული: ერთი მხრივ, გზამკვლევი ვარსკვლავი კომპასის, საქართველოს დროშისა და გზაჯვარედინის მეტაფორაზე მიგვანიშნებს — ყველაფერ იმაზე, რაც ქვეყნის მასშტაბით მოგზაურობასთანაა დაკავშირებული.

„მუშაობისას ბრენდის შესახებ სწავლობ და მასთან დაკავშირებულ პირებს აქტიურად ესაუბრები — ცდილობ, მის ძლიერ მხარეებში გაერკვე და მათზე დააშენო გამორჩეული კონცეფცია. შემდეგ ამ კონცეფციას გარკვეულ ჩარჩოებს უსაზღვრავ, თუ როგორ უნდა განვითარდეს დროთა განმავლობაში, რათა რაც ჩაიფიქრე, დროთა განმავლობაში თანმიმდევრულად გაიზარდოს. ხშირად ვამბობ, რომ ბრენდის სტრატეგია ჩაფიქრების პროცესს ჰგავს. ვისოლისა და სმარტის შემთხვევაში კი ეს უფრო მეტად თვითგამორკვევის გზას ჰგავდა, რადგან ქართული რეალობისთვის ორივე ძალიან ცნობილია, მაგრამ პანდემიურმა რეალობამ „ხელახლა დაბადების“ საჭიროება გააჩინა“,აღნიშნავს ვასკა ჩუბინიძე.

ვიზუალურ იდეებამდე „მილენიალ ჰაბმა“ ბრენდის არქეტიპი განსაზღვრა, როგორც „მმართველი“, რომელიც სიძლიერესთანაა დაკავშირებული. ამაზე დაფუძნებით, გადაწყვიტეს, ლოგოს მთავარი სიმბოლო გზამკვლევი ვარსკვლავი ყოფილიყო — ნებისმიერ გზაზე წინ გამძღოლი ციური სხეული; თავის მხრივ, ამას დაემატა სხვა იდეური დატვირთვები, რომლებიც ზემოთ უკვე განვიხილეთ.

რაც შეეხება ფერებს, აქაც სიმბოლური ხედვით მიუდგნენ: მუქი მწვანე კვლავ შეინარჩუნეს, რადგან, როგორც აღნიშნავენ, მათი ობიექტები, გარდა ქალაქებისა, ბუნებასთან სიახლოვითაცაა აგებული — მთელი საქართველოს მასშტაბით, იქ, სადაც ნათელ, დამხმარე და საჭირო წერტილად გვევლინება. ხოლო ყვითელი ფოსფორისფერმა ჩაანაცვლა —  საგზაო თვალსაზრისით უსაფრთხოების გამომხატველი მეტაფორა.

განახლებული სლოგანი — „კეთილი მგზავრობა“

ეს მარტივი ფრაზა, რომელსაც ადამიანები, ალბათ, ჯერ კიდევ იმ დროიდან მოყოლებული ვიყენებთ, ვიდრე ტრანსპორტად კომპლექსური კონსტრუქციის მქონე ავტომობილებს მივმართავდით, ბრენდის მთავარ სლოგანად იქცა. „გასაკვირია, რომ აქამდე არავის გამოუყენებია მარკეტინგულად, მაგრამ სწორედ სიმარტივეშია მთავარი ხიბლი. თან, გულწრფელად გითხრა, მიხარია, რომ „კეთილ მგზავრობაში“ რასაც ვგულისხმობთ, რეალური პროდუქტებით და შეთავაზებებითაა მხარდაჭერილი“, განმარტავს ვასკა ჩუბინიძე.

საგულისხმოა, რომ სმარტის შემთხვევაშიც აღნიშნული სლოგანი დატოვეს.

სმარტის განახლებული ლოგო

ეს არის ბრენდი, რომლის ლოგოდ ქცეულ ციყვსაც ძალიან კარგად იცნობს საზოგადოება — მეოჯახეობასთან დაკავშირებული სიმბოლო, ციყვთან გაიგივებული ფუსფუსი, პროდუქტების გულმოდგინედ მომარაგება მთელი ოჯახისთვის და შემდეგ უსაფრთხოების განცდა… ვინაიდან ბრენდს საკმაოდ მკაფიოდ განსაზღვრული სიმბოლური დატვირთვა დიდი ხნის წინ ჰქონდა შემუშავებული, ამჟამინდელი რებრენდინგის დროს აზრი ორად იყოფოდა: შეეცვალათ თუ არა მთავარი ლოგო.

„დიდხანს ვმსჯელობდით, უნდა შეგვენარჩუნებინა თუ არა ციყვი, მაგრამ საბოლოოდ გადაწყვეტილება მის სასარგებლოდ მივიღეთ, უბრალოდ, უნდა გაგვეთანამედროვებინა. უფრო მეტად ამერიკული ესთეტიკა შევძინეთ და მეოჯახე, სტატიკური იდენტობიდან მოძრავ, აქტიურ ტიპაჟად ვაქციეთ. იდეურად ეს იმაზე მიანიშნებს, რომ თან მუდმივ მოძრაობაში ხარ გზაზე და თან ამ გზაზევე ყიდულობ ყველაფერს“,გვიხსნის ვასკა ჩუბინიძე.

გარდა ლოგოს ცვლილებისა, მოხდა სტრუქტურული განახლებაც: თუ აქამდე სმარტი მხოლოდ სუპერმარკეტის სახით პოზიციონირებდა და დამატებით სერვისად მიიჩნეოდა სმარტ-კაფე, ამიერიდან ეს მოცემულობა იცვლება — კერძოდ, ლოგოშიც აწერია: market and cafe.

ვისოლისა და სმარტის ინფრასტრუქტურული ცვლილება

რა თქმა უნდა, სტრატეგიულ და ვიზუალურ განახლებასთან ერთად, ბრენდების ობიექტების სახეცვლილებაც საჭირო იყო. ვისოლ ჯგუფმა გადაწყვიტა, მომხმარებლებისთვის გაუმჯობესებული სივრცეები შეეთავაზებინათ, თანამედროვე სტანდარტებსა და ესთეტიკას მორგებული გარემო — ასე იცვლება ბენზინგასამართ სადგურებში ნაცრისფერი თეთრით და ფორმებიც უფრო მეტად დახვეწილია.

მიუხედავად სურვილისა, ერთიანად ვერ მოხერხდებოდა ყველა არსებული სადგურის გარემონტება, ამიტომ პროცესი ეტაპობრივად მიმდინარეობს და წლის ბოლომდე თვალშისაცემი იქნება ცვლილების მასშტაბი.

ხოლო სმარტის შემთხვევაში მარკეტ-კაფე უფრო მეტად ამერიკული სასადილოების ხასიათს იძენს, რაც ვიზუალური თვალსაზრისით, საკმაოდ მომხიბვლელ და შთამბეჭდავ განწყობას ქმნის. ამერიკასთან კავშირი კი რეალურ ფაქტებს ეფუძნება, ვინაიდან აქ ბევრი ისეთი პროდუქტი შემოდის ამერიკიდან, რომელიც წამყვან ბრენდებს ეკუთვნის და დიდი პოპულარობითაც სარგებლობს.

ამ რეალობამდე მოსვლამდე, ვისოლი თავდაპირველად „კანარგო სტანდარტ ოილის“ სახელით პოზიციონირებდა“ — მთელი ამ წლების განმავლობაში კი მრავალი სირთულე გაიარა, ბევრი რამ შეიცვალა დასახელებით დაწყებული, გავრცელების მასშტაბებითა და ბრენდინგით დასრულებული.

რატომ გაჩნდა ბრენდის სტრატეგიული განახლების საჭიროება?

„ყველა დიდი ბრენდის არსებობის გარკვეულ ეტაპზე ცვლილებების საჭიროება ჩნდება; მასშტაბური და აქტუალური კომპანიები ყოველთვის ცდილობენ, განახლებული სახით წარდგნენ საზოგადოების წინაშე, რაც სრულიად ბუნებრივი პროცესია. ვისოლის შემთხვევაშიც აშკარა საჭიროება იდგა როგორც ინფრასტრუქტურის გაუმჯობესების, ისე რებრენდინგის თვალსაზრისით. ცვლილებების ხარჯზე კი გვსურს, მომხმარებლებს იმაზე მეტი შევთავაზოთ, ვიდრე მხოლოდ საწვავი და კონკრეტული პროდუქტია; ასევე, სათანადო მოლოდინები უნდა გავუჩინოთ და ჩამოვაყალიბოთ ურთიერთობა, რომლისგანაც ყველას მეტის მიღების იმედი ექნება, ვიდრე მანქანის ავზის ბენზინით ან დიზელით გავსებაა. ამიტომაც, მომხმარებლებს მგზავრობის სრულ კომფორტს ვუქმნით — დაწყებული საწვავით, სხვა საჭირო სერვისების დაფარვით დასრულებული“,აღნიშნავს „ვისოლისა“ და „სმარტის“ გენერალური დირექტორი ვასილ ხორავა.

სარეკლამო სააგენტო „ვინდფორსისა“ და „მეტრო ფროდაქშენის“ მიერ გადაღებული ვიდეორგოლიც მიანიშნებს, თუ საწვავის გარდა, რამდენ სერვისს აერთიანებს ვისოლ ჯგუფი:

სწორედ ამ სურვილსა და მსოფლმხედველობაზე დაყრდნობით, რომელიც ქვეყანაში გადაადგილებისთვის საუკეთესო ინფრასტრუქტურის შექმნას მოიაზრებს, „ვისოლ ჯგუფი“ დღეს აერთიანებს ვისოლს, სმარტს, ავტომომსახურების ქსელ ვინტოს, ამერიკულ რესტორნებს „ვენდისსა და „დანკინს — ყველაფერი ერთ სივრცეში იყრის თავს, რათა „კეთილი მგზავრობისთვის“ ყველა პირობა შექმნას. „ახალი ლოიალობის სისტემით კი ვისოლის ერთგულებისთვის სარგებელი კიდევ უფრო ხელშესახებია. შესაბამისად, „ვისოლი“ ახალ დანაპირებს ბრენდის ახალი სტრატეგიით სრულფასოვნად შეასრულებს“, — აცხადებს ვასილ ხორავა.

უფრო დეტალურად, ახალი ლოიალობის სისტემით, მომხმარებელი სატელეფონო აპლიკაციის საშუალებით მომენტალურად იღებს 15-თეთრიან ფასდაკლებას თითოეულ ლიტრ საწვავზე. „ვისოლში“, „სმარტსა“ და „ვინტოში“ განხორციელებული ტრანზაქციების მიხედვით კი, 25 თეთრამდე ფასდაკლების მიღებაც შეუძლიათ. მომხმარებელს სამივე ბრენდში გადახდილი თანხის 1% ქულების სახით  ერიცხება. ქულების დახარჯვა კი შესაძლებელია როგორც ვისოლის, ისე „სმარტისა“ და „ვინტოს“ ობიექტებში.

მარკეტინგული თვალსაზრისით, რამდენად მნიშვნელოვანი იყო ბრენდის სტრატეგიული განახლება?

„უკვე დიდი ხანია, ვისოლის ბრენდს მკაფიო მესიჯი არ ჰქონია მომხმარებელთან ურთიერთობაში, ეს პაუზა სხვადასხვა სუბიექტური თუ ობიექტური მიზეზებით იყო გამოწვეული. შესაბამისად, მისი მთავარი სათქმელიც, ინფრასტრუქტურასთან ერთად, საკმაოდ მოძველებული იყო — თავის მხრივ, ამან რაღაც ახლის შემუშავების საჭიროება გააჩინა, რათა ბუნებრივად არსებული კონკურენტული უპირატესობა სწორად მიგვეტანა მომხმარებლებამდე. კომპანიაში დიდი ხნის წინ დაიწყო დასავლური გამოცდილების დანერგვა – ბენზინგასამართი სადგურების განვითარება აღარაა საკმარისი და სრულყოფილი სერვისების დაფარვაა საჭირო — მგზავრობისას, საწვავთან ერთად, წახემსების, ყავის დალევის, გზაზე საჭირო სასურველი პროდუქტის შეძენის შესაძლებლობას რომ სთავაზობ ნებისმიერი ასაკის ადამიანს, დიდი უპირატესობაა.

მართალია, უკვე წლებია, ვისოლი მსგავსი მოდელით ფუნქციონირებს, მაგრამ ეს ბრენდის სტრატეგიასა და კომუნიკაციებში ნათლად არ ჩანდა; ინფრასტრუქტურაშიც კი ისე იყო ერთმანეთის გვერდით ობიექტები განლაგებული, რომ ერთიან სივრცედ არ აღიქმებოდა“,  განმარატვს ვისოლისა და სმარტის მარკეტინგის დირექტორი სალომე გველესიანი.

იმისათვის, რომ კომუნიკაციის საკითხი, შემდეგ კი „ინფრასტრუქტურული ქაოსი“ ეფექტურად მოეგვარებინათ, ეტაპობრივად დაიწყეს ბრენდის სტრატეგიული განახლება. სალომე გველესიანის თქმით, ასე დაადგნენ ახალ სეგმენტზე გასვლის, საზოგადოებასთან სრულიად ახლებური კომუნიკაციის დამყარების ახალ შესაძლებლობას. „შედეგად, ჩვენ შევძელით, კომპანიის დნმ-ის შენარჩუნებით, განახლებული ინფრასტრუქტურით, სრულყოფილი ლოიალობის სისტემის შექმნით და ახალი მკაფიო სათქმელით — „კეთილი მგზავრობა“, ვისოლი განვთარების ახალ ეტაპზე გადაგვეყვანა“.

როგორ აისახება შვებულება თქვენს კეთილდღეობაზე?

Theneo: „სტარტაპისთვის არსებითია სისწრაფე და უამრავი სიახლის მოსინჯვა“