ბიზნესისა და ტექნოლოგიების უნივერსიტეტმა (BTU) მასშტაბური სასწავლო პროექტის “ქალები ხელოვნურ ინტელექტში” (Women in AI) პირველი ნაკადის სწავლება დაასრულა. შესაბამისი სერტიფიკატები მონაწილეებს სპეციალურ ღონისძიებაზე გადაეცათ.
გადამზადება, რომელიც გაეროს ქალთა ორგანიზაციასთან პარტნიორობით, ევროკავშირისა და ნორვეგიის მთავრობის ფინანსური მხარდაჭერით მიმდინარეობს, საწყის ეტაპზე წარმატებით 100-მა გოგომ გაიარა. უკვე შერჩეულია მომდევნო 100 მონაწილეც, რომლებიც მომდევნო 9 თვის განმავლობაში ხელოვნური ინტელექტისა და ვებდევლოპმენტის მიმართულებებით გადამზადდებიან.
სერტიფიკატების გადაცემის ღონისძიებას ბიზნესისა და ტექნოლოგიების უნივერსიტეტის რექტორი, პროფესორი ნინო ენუქიძე, გაეროს ქალთა ორგანიზაციის წარმომადგენელი საქართველოში კაორი იშიკავა, საქართველოში ევროკავშირის წარმომადგენლობის ატაშე და გუნდის ლიდერი მარია სტოგოვა და საქართველოში ნორვეგიის ელჩის მოადგილე რებეკა ლი ესწრებოდნენ.
ღონისძიებას 15 ადგილობრივი და საერთაშორისო კომპანიის წარმომადგენელი ესწრებოდა, რომლებიც მზად არიან დაასაქმონ Women in AI პროექტის ბენეფიციარები იმ მიმართულებების ფარგლებში, რომლებშიც მათ გადამზადება გაიარეს. ღონისძიების ოფიციალური ნაწილის დასრულების შემდეგ, კომპანიებსა და ბენეფიციარებს შორის ინდივიდუალური კომუნიკაციები შედგა.
ბიზნესისა და ტექნოლოგიების უნივერსიტეტი დაარსების დღიდან, სხვადასხვა აქტივობის ფარგლებში, ცდილობს, ტექნოლოგიებში ქალების ჩართულობა გაზარდოს. აღსანიშნავია, რომ BTU-მ, გაეროს ქალთა ორგანიზაციისა და ნორვეგიის მთავრობის მხარდაჭერით უკვე განახორციელა მასშტაბური, წარმატებული პროექტი “500 ქალი ტექნოლოგიებში” და “ქალები ხელოვნურ ინტელექტში” სწორედ ამ წარმატებულ გამოცდილებას ეყრდნობა.
ევროკავშირის შესახებ
30 წელზე მეტია ევროკავშირს საქართველოსთან მჭიდრო პარტნიორული ურთიერთობა აკავშირებს. ქვეყნის განვითარებას ევროკავშირი ცოდნისა და გამოცდილების გაზიარებით და ექსპერტული, ინოვაციებისა და ფინანსური მხარდაჭერის გზით ახორციელებს. ევროკავშირსა და საქართველოს მოქალაქეებს შორის ურთიერთობა მშვიდობის, თავისუფლების, დემოკრატიის, ადამიანის უფლებებისა და ინკლუზიური ეკონომიკური ზრდის საერთო ღირებულებებს ეფუძნება. საქართველოში ევროკავშირის მხარდაჭერის შესახებ მეტი ინფორმაცია იხილეთ მითითებულ ბმულზე.
Women in AI პროექტის შესახებ
Women in AI ხორციელდება ევროკავშირის მხარდაჭერით, რეგიონული პროგრამის „ევროკავშირი გენდერული თანასწორობისათვის: ერთად გენდერული სტერეოტიპებისა და გენდერული ძალადობის დასაძლევად” ფარგლებში და, ასევე, გაეროს ქალთა ორგანიზაციის პროექტის „კარგი მმართველობა გენდერული თანასწორობისთვის საქართველოში“ ქალთა ეკონომიკური გაძლიერების კომპონენტის ფარგლებში, რომელიც ნორვეგიის მთავრობის მხარდაჭერით, BTU-ს მიერ ხორციელდება.
[პარტნიორის კონტენტი]
