in

როგორ მიიღოთ მოლაპარაკებიდან სასურველი შედეგი?

კვლევებით ირკვევა, რომ ქალების 20% საერთოდ არ აწარმოებს მოლაპარაკებას. ამის გამო, ისინი საკმაოდ დიდ თანხას კარგავენ გრძელვადიან პერსპექტივაში. მაინც, რატომ არ ცდილობენ ქალები უფრო მეტი შემოსავლისთვის ბრძოლას? აქ რამდენიმე ფაქტორია. საქმე ისაა, რომ მოლაპარაკების პროცესი ქალებისა და მამაკაცებისთვის სხვადასხვა მეტაფორასთან ასოცირდება – მამაკაცებისთვის მოლაპარაკება შეჯიბრივითაა, რომელიც უნდა მოიგონ, ქალებისთვის კი, ის უფრო რუტინულ მოვლენასთან ასოცირდება და გარკვეულწილად, შიშთანაც, რომ მოლაპარაკების შედეგად, მათზე ცუდი შთაბეჭდილება დარჩებათ. კარგი ამბავი ისაა, რომ მოლაპარაკების უნარის გამომუშავება და დახვეწა შესაძლებელია. ამაში კი, ეს სტრატეგიები დაგეხმარებათ:

pasha-statiebi
pasha-statiebi

სრული მზადყოფნა

საერთო ჯამში, ადამიანებს არ მოსწონთ იმის კეთება, რაც, მათი აზრით, კარგად არ გამოსდით. შესაბამისად, თავს არიდებენ იმ საქმეზე შეჭიდებას, რაშიც, სავარაუდოდ, მარცხს განიცდიან. რაც მეტად გვეშინია რამის, მით მეტად ვცდილობთ მისგან თავის არიდებას და ეს მოჯადოებულ წრეზე გვატარებს, მიუხედავად იმისა, რომ ხშირად ძალიან კარგად გვესმის გაბედული ნაბიჯების გადადგმის აუცილებლობა. გამოსავალი საფუძვლიან მომზადებაშია. დაუთმეთ საკმარისი ძალისხმევა და მოემზადეთ მოლაპარაკებისთვის, იცოდეთ, რა გსურთ და რატომ, მოიფიქრეთ მისაღები ალტერნატივები და განავითარეთ დარწმუნების უნარი – ეს მნიშვნელოვნად გაზრდის თქვენს თავდაჯერებულობასაც და თქვენს კომპეტენციასაც ღირსეულად წარმოაჩენთ. ამას გარდა, მოიფიქრეთ რამდენიმე სასურველი და მისაღები გამოსავალი, ეს მეტად მოქნილს გახდის თქვენს მოლაპარაკებას და სასურველ შედეგამდე მისვლის უფრო დიდი ალბათობა გექნებათ.

განეწყვეთ დადებითად

დადებითი ემოციები მოლაპარაკების ეფექტურად წარმოებაში მნიშვნელოვან როლს თამაშობს, ამარტივებს ურთიერთობას, ორივე მხარის ჩართულობას და უფრო მოგებიანი შედეგის მიღებასაც უწყობს ხელს. კარგი განწყობა შეჯიბრების ნაცვლად, ადამიანებში თანამშრომლობის სურვილს აღძრავს.

კვლევებით დასტურდება, რომ დადებითი განწყობა ადამიანებში უფრო ლოიალური ურთიერთობის გარდა, ფიქრის თავისუფალ, სტერეოტიპებისგან დაცლილ მოდელს აყალიბებს, ზრდის კრეატიული ხედვის უნარს და არასტანდარტული გადაწყვეტილების წინაპირობას ქმნის. ამიტომ, იფიქრეთ, როგორ დაიწყოთ მოლაპარაკება დადებითი მუხტით.

აიმაღლეთ ემოციური ინტელექტი

ემოციური ინტელექტი გეხმარებათ საკუთარი და სხვების ემოციების გაანალიზებაში. ამგვარად, უფრო მეტი ინფორმაციაც გაქვთ საერთო განწყობაზე და უფრო თავდაჯერებულიც ხართ შეხვედრისას. ამას გარდა, იკლებს, ემოციების ინტენსივობაც და რეაქტიულობაც, რაკი გრჩებათ დრო, გაიაზროთ, როგორი რეაქცია გქონდეთ კონკრეტულ მომენტში. ემოციების კონტროლი საშუალებას მოგცემთ გაერკვიოთ საკუთარ სურვილებში, წარმატებულად აწარმოოთ მოლაპარაკება და რთული სიტუაციებიც მარტივად გაანეიტრალოთ. გაზრდილი თავდაჯერებულობით შეამცირებთ შფოთვის ხარისხსაც და საკუთარი მოთხოვნების დაკმაყოფილებას უფრო მარტივად შეძლებთ.

ემოციური ინტელექტი, გაცნობიერებულობის საშუალებით, Mindfulness-ის პრაქტიკის შედეგად მატულობს. ესაა მოცემულ მომენტზე დაკვირვების პრაქტიკა, თუ რა ხდება თქვენ ირგვლივ, რას ფიქრობთ, რას გრძნობთ. საამისოდ, ერთ-ერთი საუკეთესო გზა მედიტაციაა. მოიკრიბეთ ყურადღება და ფოკუსირდით თქვენს სუნთქვაზე, თუნდაც, დღეში რამდენიმე წუთის განმავლობაში. ამით გონებასაც გაასუფთავებთ დაჭიმული ფიქრებისგან და დაღლილობასაც მოიხსნით.

მოლაპარაკება “სხვისი სახელით”

მოლაპარაკებისას, მარცხი შეიძლება განიცადოთ როგორც ცალკეულ ბრძოლაში, ისე მთლიანად, ომში. მიზეზი კონკურენტულ და აგრესიულ მიდგომაშია, რაც მეორე მხარეს მეტოქეობის შეგრძნებას უღვივებს და ნეგატიურად აისახება სიტუაციაზე. ამ გამოწვევის გადალახვა შესაძლებელია, თუკი წარმოიდგენთ, რომ სხვა ადამიანის ან გუნდის სახელით საუბრობთ. ასე ვთქვათ, შუამავლის როლში თუ წარმოიდგენთ თავს, მეტად გახსნილი იქნებით საუბრის მიმართ და აგრესიაც ნაკლები იქნება. კვლევებით დასტურდება, რომ მოლაპარაკებისას მზრუნველობის განცდა ბევრად მოგებიანია, აგრესიულ მიდგომასთან შედარებით.

მოლაპარაკების ამგვარად გადაფასება, როდესაც თქვენთვის მნიშვნელოვანია ორივე მხარის კმაყოფილება, აუცილებლად დაგიფასდებათ. ის, რომ თქვენ მეორე მხარის ინტერესებსაც ითვალისწინებთ, დადებითად განაწყობთ მათ და საბოლოო ჯამში, თავადაც კმაყოფილს დაგტოვებთ. მხოლოდ საკუთარ ინტერესებზე ნუ ისაუბრებთ, ნუ იტყვით მხოლოდ იმას, რა გსურთ თქვენ, აჩვენეთ ის ნაწილიც, სადაც ამ მოლაპარაკების შედეგად, სხვებიც დარჩებიან კმაყოფილები.

მოლაპარაკების მიდგომა

სხვადასხვა კულტურის ადამიანები მოლაპარაკებებს განსხვავებულად აწარმოებენ. თუკი, მაგალითად, ამერიკელები და გერმანელები წრფივ მიდგომას ამჯობინებენ (ერთი საკითხი დროის ერთ მონაკვეთში), ფრანგები უფრო ჰოლისტიკურ მიდგომას ამჯობინებენ და შეიძლება ისეთ საკითხებს მიუბრუნდნენ ხელახლა, რაც, მომლაპარაკებელი მხარის აზრით, კარგა ხნის წინ დაიხურა. მიუხედავად იმისა, რომ ეს მიდგომა ზოგისთვის შეიძლება დამაბნეველი აღმოჩნდეს, მრავალსაკითხიანი ან ფართო მიდგომა ნაკლებად კონკურენტულად და აგრესიულად აღიქმება. როდესაც მოსალაპარაკებელი მხოლოდ ერთი საკითხია, შედეგი მოგება ან წაგებაა. მრავალი საკითხის ერთად განხილვა კი, მოქნილი მიდგომისთვის ტოვებს ადგილს.

არ აქვს მნიშვნელობა, ანაზღაურებაზე გაქვთ მოლაპარაკება, კომპანიის რესურსებზე, მრავალწლიან კონტრაქტებზე თუ სხვა საკითხებზე, უნდა გადალახოთ გამოწვევა და მოძებნოთ ოქროს შუალედი საკუთარ საჭიროებებს, სურვილებსა და სხვების მოლოდინებს შორის. ასე ბევრად გაგიადვილდებათ სასურველ შედეგამდე მისვლა.

 

წყარო: HBR



მოძრავი ასო-ბგერა “H” არქიტექტურული კომპანია HORIZON-ის ლოგოდ – BRID-ის ბრენდინგ-ნამუშევარი

ახალი ერა! ახალი გმირები! – Mercedes-Benz-ის რეკლამა