სანამ უშუალოდ ამ საკითხის განხილვას დავიწყებთ, დაფიქრდით, როცა სიტყვა წუხილი გესმით, რა ხდება თქვენს გონებაში? ბევრი აზრი ერთად ჩნდება, გული გიჩქარდებათ თუ საერთოდ არ გსურთ იმაზე ფიქრი, რაც გაწუხებთ?
დარდი შფოთვის ის ნაწილია, რომელიც ბევრ ფიქრს მოითხოვს, გვიბიძგებს, განვსაზღვროთ, რატომ ვწუხვართ და რა მოვუხერხოთ მას. ეს იპყრობს ჩვენს ყურადღებას და მას გაურკვეველი მომავლისკენ მიმართავს, რაც გამოსადეგი ნაბიჯების გადადგმისთვის გვამზადებს. წუხილი, პრობლემის გადაჭრის ფორმაა, სადაც „ნეტავ“ ფორმულირებას ვიყენებთ, რათა გამოსავლის საპოვნელად ყველაზე ცუდი და კარგი შედეგები დავაფიქსიროთ. ამგვარად, დარდი მომავლის გაკონტროლების მცდელობაც შეიძლება იყოს. სწორედ ამიტომ, გვაღიზიანებს — ცდილობს, მომავლის გაურკვევლობების დაძლევაში დაგვეხმაროს.
რა თქმა უნდა, ეს სათქმელად უფრო მარტივია, თანაც, რაც უფრო დიდია წუხილის გრძნობა, მით უფრო რთულია მისგან გათავისუფლება. თუმცა უნდა გახსოვდეთ, რომ წუხილი ადამიანური მდგომარეობაა, შესაძლოა, უპირატესობადაც იქცეს რთულ სიტუაციებში ან, პირიქით, სერიოზული პრობლემა გახდეს. შფოთვის უბრალოდ ჩახშობა კი ნამდვილად არ არის გამოსავალი, ამიტომ ჩვენ იმ გზებს შემოგთავაზებთ, რომლებიც ამ პროცესის თქვენთვის სასარგებლოდ წარმართვაში დაგეხმარებათ:
იპოვეთ წუხილი თქვენს სხეულში
როცა თავს დამწუხრებულად იგრძნობთ, შეჩერდით და ხელახლა გაამახვილეთ ყურადღება თქვენს შეგრძნებებზე. დააკვირდით ჩვეულებრივ ნიშნებს — სწრაფი გულისცემა, სისუსტე, სიცივის ან სითბოს მძაფრი შეგრძნება, სწრაფი სუნთქვა ან პეპლები თქვენს მუცელში. გამოიკვლიეთ ისინი. დააკვირდით, ცვლის თუ არა ეს თქვენს შეგრძნებებს. გაიწელეთ, სწორად მოკალათდით, ისუნთქეთ, ივარჯიშეთ თქვენი გრძნობების ტალღების მართვაში, რომლებიც აიწევა და დაიწევა, თუნდაც, თქვენ არაფერს აკეთებდეთ…
დააკონკრეტეთ, რა გაწუხებთ
დააკვირდით თქვენს მწუხარე აზრებს. მოექეცით საკუთარ თავს ისე, როგორც მეგობარს, რომელსაც მოსმენა სჭირდება. თუ უამრავი აზრი გიტივტივებთ თავში, რომელი იპყრობს ყველაზე მეტად თქვენს ყურადღებას? მეტიც, შეგიძლიათ წუხილის დრო გამოყოთ: აიღეთ დროის კონკრეტული პერიოდი, მაგალითად, 15 წუთი, ჩამოწერეთ ყველაფერი, რაზეც წუხხართ, აღწერეთ ისინი მკაფიოდ და კონკრეტულად. განიხილეთ ნეგატიური შედეგები პოზიტიურ შესაძლებლობებთან ერთად. ამაზე მხოლოდ სპეციალურად გამოყოფილ წუხილის 15 წუთში უნდა იდარდოთ. შესაძლოა, გაგაკვირვოთ კიდეც იმან, რომ დარდი მოგბეზრდებათ და დროზე ადრეც დაამთავრებთ.
გაუმკლავდით პრობლემებს
ის, რაც წუხილს ამარცხებს, გეგმები და ქმედებებია. ასე რომ, ჯერ დაადგინეთ, შემდეგ კი მის გადაჭრაზე ეტაპობრივად იზრუნეთ:
- განიხილეთ ის გადაწყვეტილებები, რომლებიც თქვენ კონტროლ ქვეშაა
- შეაფასეთ მათი უარყოფითი და დადებითი მხარეები
- გამოყავით დრო თქვენს იდეებზე ფიქრისთვის
- შეადგინეთ მყარი გეგმა, რათა სცადოთ ამ გადაწყვეტილებებიდან ერთი ან რამდენიმე. რაც უფრო მეტ დეტალს ჩამოწერთ, მით უკეთესია.
- დაიწყეთ პატარა, რეალური ნაბიჯებით — თუ თქვენი გეგმა ბუნდოვანი ან ზედმეტად ამბიციური იქნება, ნაკლებად სავარაუდოა, რომ მის შესრულებას შეძლებთ.
- ცადეთ და შეაფასეთ, როგორ მუშაობს.
- განიხილეთ, სად არის საჭირო პრობლემების გადაჭრის დამატებითი გზების პოვნა
გათავისუფლდით წუხილისგან
წუხილი მომავალში გვგზავნის, როცა იქ მოვხვდებით, დროა, გავუშვათ და აწმყოში დავბრუნდეთ. თან ამის კეთების მრავალი გზა არსებობს: ვარჯიში, ხანგრძლივი სეირნობა, ჩანაწერების გაკეთება, ხატვა ან მეგობართან ლაპარაკი, სოციალური მხარდაჭერა — საუბარი იმ ადამიანთან, ვისაც ენდობით და თქვენი წუხილის სიტყვებად გადაქცევაში დაგეხმარებათ იმის ნაცვლად, რომ უფრო მეტად დაგსტრესოთ — ეს წუხილისგან გათავისუფლების საუკეთესო გზაა.
დაბოლოს, როცა ამ ნაბიჯების თანმიმდევრულად გადადგმას დაიწყებთ, გაიაზრებთ, რომ წუხილი, შესაძლოა, მოქმედებისკენ მოწოდება იყოს. ხოლო, როცა ამას წარმატებით მოახერხებთ, მიხვდებით, რომ მისია შესრულებულია!
